ਨਿਊਯਾਰਕ, 22 ਜੁਲਾਈ (ਰਾਜੂ ਸਹਿਬਾਸ਼ਜ਼ਪੁਰਾ )-ਸੋਸ਼ਲ ਮੀਡੀਆ ਇਨਫਲੂਐਂਸਰ ਏਰੀਏਲਾ ਮੇਹੀਆ-ਪੋਲਾਂਕੋ ਦੀ ਹੱਤਿਆ ਦੇ ਮਾਮਲੇ ਵਿਚ ਛੇ ਵਿਅਕਤੀਆਂ ਖ਼ਿਲਾਫ਼ ਸੰਘੀ ਦੋਸ਼ ਤੈਅ ਕੀਤੇ ਗਏ ਹਨ। ਜਾਂਚਕਰਤਾਵਾਂ ਦਾ ਮੰਨਣਾ ਹੈ ਕਿ ਮੁਲਜ਼ਮਾਂ ਨੇ ਉਸ ਦੀਆਂ ਇੰਸਟਾਗ੍ਰਾਮ ਪੋਸਟਾਂ ਅਤੇ ਮਹਿੰਗੀ ਗੱਡੀ ਦੇਖਣ ਮਗਰੋਂ ਕਾਰ ਲੁੱਟਣ ਲਈ ਉਸ ਨੂੰ ਨਿਸ਼ਾਨਾ ਬਣਾਇਆ ਸੀ। ਏਰੀਏਲਾ ਪਿਛਲੇ ਸਾਲ ਅਗਸਤ ’ਚ ਮਾਊਂਟ ਵਰਨਨ ਸਥਿਤ ਆਪਣੇ ਘਰ ਨੇੜੇ ਕ੍ਰਾਸ ਕਾਊਂਟੀ ਪਾਰਕਵੇਅ ਉੱਤੇ ਆਪਣੀ ਮਰਸਿਡੀਜ਼ ਐੱਸ.ਯੂ.ਵੀ. ਵਿੱਚ ਗੋਲੀਆਂ ਨਾਲ ਮ੍ਰਿਤਕ ਮਿਲੀ ਸੀ। ਅਧਿਕਾਰੀਆਂ ਅਨੁਸਾਰ ਉਸ ਦਾ ਕਥਿਤ ਹਮਲਾਵਰਾਂ ਨਾਲ ਪਹਿਲਾਂ ਕੋਈ ਸੰਬੰਧ ਨਹੀਂ ਸੀ।ਇਸ ਮਾਮਲੇ ਦੀ ਜਾਂਚ ਦੌਰਾਨ ਟ੍ਰਿਨੀਟਾਰੀਓਸ ਗੈਂਗ ਦੇ ਕਥਿਤ ਧੜੇ ‘ਬੈਡ ਬੁਆਇਜ਼ ਸੈਵਨ’ ਨਾਲ ਜੁੜੇ ਕੁੱਲ 11 ਵਿਅਕਤੀ ਕਾਨੂੰਨੀ ਘੇਰੇ ਵਿਚ ਆਏ ਹਨ। ਇਨ੍ਹਾਂ ਵਿਚੋਂ ਕੁਝ ਮੁਲਜ਼ਮਾਂ ਨੂੰ ਨਿਊਯਾਰਕ ਅਤੇ ਨਿਊਜਰਸੀ ਦੀਆਂ ਹੋਰ ਹੱਤਿਆਵਾਂ, ਗੋਲੀਬਾਰੀ ਅਤੇ ਗਹਿਣਿਆਂ ਦੀ ਲੁੱਟ ਦੇ ਮਾਮਲਿਆਂ ਨਾਲ ਵੀ ਜੋੜਿਆ ਗਿਆ ਹੈ। ਲੱਗੇ ਦੋਸ਼ਾਂ ਦਾ ਅੰਤਿਮ ਫ਼ੈਸਲਾ ਅਦਾਲਤ ਕਰੇਗੀ।
