ਟਰੰਪ ਦੀ ਲਾਂਗ ਆਈਲੈਂਡ ਫੇਰੀ ਮੌਕੇ ਆਈਸ ਤੇ ਮਹਿੰਗਾਈ ਖ਼ਿਲਾਫ਼ ਪ੍ਰਦਰਸ਼ਨਕਾਰੀ ਡਟੇ — ਟਰੰਪ ਦੀਆਂ ਨੀਤੀਆਂ ਖ਼ਿਲਾਫ਼ ਰੋਸ

ਨਿਊਯਾਰਕ, 16 ਅਗਸਤ (ਰਾਜੂ ਸਹਿਬਾਜ਼ਪੁਰਾ)-ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਲਾਂਗ ਆਈਲੈਂਡ ਫੇਰੀ ਨੇ ਨਸਾਊ ਕਾਊਂਟੀ ਦਾ ਸਿਆਸੀ ਮਾਹੌਲ ਗਰਮਾ ਦਿੱਤਾ। ਉਨ੍ਹਾਂ ਦੇ ਪਹੁੰਚਣ ਤੋਂ ਕਈ ਘੰਟੇ ਪਹਿਲਾਂ ਹੀ ਇੱਕ ਪਾਸੇ ਵਿਰੋਧ ਦੇ ਨਾਅਰੇ ਗੂੰਜਣ ਲੱਗੇ, ਜਦਕਿ ਦੂਜੇ ਪਾਸੇ ਸਮਰਥਕ ਤੜਕੇ ਤੋਂ ਲਾਈਨਾਂ ਵਿੱਚ ਡਟ ਗਏ। ਟਰੰਪ ਨਸਾਊ ਕਾਊਂਟੀ ਪੁਲਿਸ ਅਕੈਡਮੀ ਦਾ ਦੌਰਾ ਕਰਨ ਅਤੇ ਪਹਿਲਾਂ ਤੋਂ ਸੱਦਾ ਪ੍ਰਾਪਤ ਲੋਕਾਂ ਨੂੰ ਸੰਬੋਧਨ ਕਰਨ ਲਈ ਇੱਥੇ ਪਹੁੰਚੇ ਸਨ। ਅਟਾਰਨੀ ਜਨਰਲ ਟੌਡ ਬਲਾਂਚ ਅਤੇ ਐੱਫਬੀਆਈ ਮੁਖੀ ਕਸ਼ ਪਟੇਲ ਵੀ ਲਾਂਗ ਆਈਲੈਂਡ ਵਿੱਚ ਮੌਜੂਦ ਰਹੇ। ਨਸਾਊ ਕਮਿਊਨਿਟੀ ਕਾਲਜ ਨੇੜੇ ਇਕੱਠੇ ਹੋਏ ਪ੍ਰਦਰਸ਼ਨਕਾਰੀਆਂ ਨੇ ਟਰੰਪ ਪ੍ਰਸ਼ਾਸਨ ਦੀਆਂ ਇਮੀਗ੍ਰੇਸ਼ਨ ਨੀਤੀਆਂ, ਆਈਸ ਦੀਆਂ ਕਾਰਵਾਈਆਂ ਅਤੇ ਵਧਦੀ ਮਹਿੰਗਾਈ ਵਿਰੁੱਧ ਆਵਾਜ਼ ਬੁਲੰਦ ਕੀਤੀ। ਕਈ ਲੋਕਾਂ ਦੇ ਹੱਥਾਂ ਵਿੱਚ ‘ਸੱਤਾ ਲੋਕਾਂ ਦੇ ਹੱਥਾਂ ਵਿੱਚ’, ‘ਵਿਰੋਧ ਕਰੋ’ ਅਤੇ ‘ਲੋਕਤੰਤਰ ਤੋਂ ਹੱਥ ਪਿੱਛੇ ਰੱਖੋ’ ਵਰਗੇ ਸੁਨੇਹਿਆਂ ਵਾਲੀਆਂ ਤਖ਼ਤੀਆਂ ਸਨ। ਭੀੜ ਨੇ ਸਸਤੇ ਮਕਾਨਾਂ ਦੀ ਮੰਗ ਕਰਦਿਆਂ ਵੀ ਨਾਅਰੇ ਲਾਏ। ਰੋਸ ਵਿੱਚ ਸ਼ਾਮਲ ਲੋਕਾਂ ਨੇ ਨਸਾਊ ਕਾਊਂਟੀ ਦੇ ਐਗਜ਼ੀਕਿਊਟਿਵ ਬਰੂਸ ਬਲੇਕਮੈਨ ਵੱਲੋਂ ਸੰਘੀ ਇਮੀਗ੍ਰੇਸ਼ਨ ਏਜੰਸੀ ਆਈਸ ਨਾਲ ਕੀਤੇ ਜਾ ਰਹੇ ਸਹਿਯੋਗ ਉੱਤੇ ਸਵਾਲ ਚੁੱਕੇ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਇਮੀਗ੍ਰੇਸ਼ਨ ਕਾਰਵਾਈਆਂ ਨੇ ਪਰਵਾਸੀ ਪਰਿਵਾਰਾਂ ਵਿੱਚ ਡਰ ਪੈਦਾ ਕੀਤਾ ਹੈ ਅਤੇ ਜਨਤਕ ਸੁਰੱਖਿਆ ਦੇ ਨਾਂ ਉੱਤੇ ਕਿਸੇ ਵੀ ਭਾਈਚਾਰੇ ਨੂੰ ਨਿਸ਼ਾਨਾ ਨਹੀਂ ਬਣਾਇਆ ਜਾਣਾ ਚਾਹੀਦਾ। ਫ੍ਰੀਪੋਰਟ ਦੀ ਲਿੰਡਾ ਰਾਈਟ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਮਕਾਨਾਂ, ਕਰਿਆਨੇ ਅਤੇ ਰੋਜ਼ਾਨਾ ਵਰਤੋਂ ਦੀਆਂ ਵਸਤਾਂ ਦੀਆਂ ਵਧਦੀਆਂ ਕੀਮਤਾਂ ਕਾਰਨ ਉਸ ਦੇ ਬੱਚੇ ਨਿਊਯਾਰਕ ਛੱਡਣ ਬਾਰੇ ਸੋਚ ਰਹੇ ਹਨ। ਮਾਲਵਰਨ ਦੀ ਸੇਵਾਮੁਕਤ ਵਕੀਲ ਜੀਨ ਡੀ’ਐਸਪੋਜ਼ੀਟੋ ਨੇ ਕਾਨੂੰਨੀ ਪ੍ਰਕਿਰਿਆ ਪ੍ਰਤੀ ਕਥਿਤ ਅਣਗਹਿਲੀ ਨੂੰ ਆਪਣੀ ਸਭ ਤੋਂ ਵੱਡੀ ਚਿੰਤਾ ਦੱਸਿਆ। ਪ੍ਰਦਰਸ਼ਨ ਵਿੱਚ ਡੈਮੋਕ੍ਰੇਟਿਕ ਪਾਰਟੀ ਵੱਲੋਂ ਲੈਫਟੀਨੈਂਟ ਗਵਰਨਰ ਅਹੁਦੇ ਦੀ ਉਮੀਦਵਾਰ ਐਡਰੀਅਨ ਐਡਮਜ਼, ਸੂਬਾਈ ਸੈਨੇਟਰ ਸਿਏਲਾ ਬਾਈਨੋ, ਅਸੈਂਬਲੀ ਮੈਂਬਰ ਮਿਸ਼ੇਲ ਸੀ. ਸੋਲੇਜਸ ਅਤੇ ਕਾਊਂਟੀ ਵਿਧਾਇਕ ਕੈਰੀ ਸੋਲੇਜਸ ਸਮੇਤ ਕਈ ਆਗੂ ਸ਼ਾਮਲ ਹੋਏ। ਨਾਗਰਿਕ ਅਧਿਕਾਰਾਂ ਦੇ ਵਕੀਲ ਫਰੈੱਡ ਬ੍ਰਿਊਇੰਗਟਨ ਨੇ ਲੋਕਾਂ ਨੂੰ ਆਪਣੇ ਰੋਸ ਨੂੰ ਵੋਟ ਦੀ ਤਾਕਤ ਵਿੱਚ ਬਦਲਣ ਦੀ ਅਪੀਲ ਕੀਤੀ।ਪ੍ਰਦਰਸ਼ਨ ਵਿੱਚ ਡੈਮੋਕ੍ਰੇਟਿਕ ਪਾਰਟੀ ਵੱਲੋਂ ਲੈਫਟੀਨੈਂਟ ਗਵਰਨਰ ਅਹੁਦੇ ਦੀ ਉਮੀਦਵਾਰ ਐਡਰੀਅਨ ਐਡਮਜ਼, ਸੂਬਾਈ ਸੈਨੇਟਰ ਸਿਏਲਾ ਬਾਈਨੋ, ਅਸੈਂਬਲੀ ਮੈਂਬਰ ਮਿਸ਼ੇਲ ਸੀ. ਸੋਲੇਜਸ ਅਤੇ ਕਾਊਂਟੀ ਵਿਧਾਇਕ ਕੈਰੀ ਸੋਲੇਜਸ ਸਮੇਤ ਕਈ ਆਗੂ ਸ਼ਾਮਲ ਹੋਏ । ਨਾਗਰਿਕ ਅਧਿਕਾਰਾਂ ਦੇ ਵਕੀਲ ਫਰੈੱਡ ਬ੍ਰਿਊਇੰਗਟਨ ਨੇ ਲੋਕਾਂ ਨੂੰ ਆਪਣੀ ਨਾਰਾਜ਼ਗੀ ਵੋਟ ਦੀ ਤਾਕਤ ਵਿੱਚ ਬਦਲਣ ਦੀ ਅਪੀਲ ਕੀਤੀ। ਸਿਆਸੀ ਪੱਖੋਂ ਅਜਿਹੇ ਪ੍ਰਦਰਸ਼ਨ ਸਿਰਫ਼ ਸੜਕੀ ਰੋਸ ਤੱਕ ਸੀਮਤ ਨਹੀਂ ਰਹਿੰਦੇ, ਸਗੋਂ ਮਹਿੰਗਾਈ, ਇਮੀਗ੍ਰੇਸ਼ਨ ਅਤੇ ਨਾਗਰਿਕ ਅਧਿਕਾਰਾਂ ਵਰਗੇ ਮੁੱਦਿਆਂ ਉੱਤੇ ਸਵਿੰਗ ਵੋਟਰਾਂ ਦੀ ਸੋਚ ਨੂੰ ਵੀ ਪ੍ਰਭਾਵਿਤ ਕਰ ਸਕਦੇ ਹਨ। ਅਮਰੀਕਾ ਵਿੱਚ ਕਈ ਸੀਟਾਂ ਦਾ ਫ਼ੈਸਲਾ ਥੋੜ੍ਹੇ ਜਿਹੇ ਵੋਟਾਂ ਦੇ ਫ਼ਰਕ ਨਾਲ ਹੁੰਦਾ ਹੈ, ਇਸ ਲਈ ਇਹ ਨਾਰਾਜ਼ਗੀ ਮਿਡਟਰਮ ਚੋਣਾਂ ਵਿੱਚ ਰਿਪਬਲਿਕਨ ਪਾਰਟੀ ਲਈ ਚੁਣੌਤੀ ਬਣ ਸਕਦੀ ਹੈ। ਸੁਰੱਖਿਆ ਦੇ ਮੱਦੇਨਜ਼ਰ ਪੁਲਿਸ ਨੇ ਐਂਡੋ ਡਰਾਈਵ ਅਤੇ ਪੈਰੀਮੀਟਰ ਰੋਡ ਉੱਤੇ ਪ੍ਰਦਰਸ਼ਨ ਲਈ ਵੱਖਰਾ ਖੇਤਰ ਬਣਾਇਆ ਸੀ। ਨਸਾਊ ਕਾਊਂਟੀ ਦੇ ਪੁਲਿਸ ਕਮਿਸ਼ਨਰ ਪੈਟਰਿਕ ਰਾਈਡਰ ਨੇ ਸਪੱਸ਼ਟ ਕੀਤਾ ਕਿ ਪ੍ਰਦਰਸ਼ਨਕਾਰੀ ਨਿਰਧਾਰਤ ਹੱਦ ਵਿੱਚ ਹੀ ਰਹਿਣਗੇ ਅਤੇ ਕਿਸੇ ਮਾਰਚ ਦੀ ਇਜਾਜ਼ਤ ਨਹੀਂ ਹੋਵੇਗੀ। ਉੱਧਰ ਟਰੰਪ ਦੇ ਸਮਰਥਕ ‘ਮੇਕ ਅਮਰੀਕਾ ਗ੍ਰੇਟ ਅਗੇਨ’ ਟੋਪੀਆਂ ਪਾ ਕੇ ਸਵੇਰੇ 10 ਵਜੇ ਤੋਂ ਪਹਿਲਾਂ ਹੀ ਲਾਈਨਾਂ ਵਿੱਚ ਲੱਗ ਗਏ ਸਨ। ਸਭ ਤੋਂ ਅੱਗੇ ਖੜ੍ਹੇ ਨਿਊ ਜਰਸੀ ਦੇ ਐਡਵਰਡ ਨੇ ਦੱਸਿਆ ਕਿ ਉਹ ਤੜਕੇ 2:50 ਵਜੇ ਹੀ ਮੌਕੇ ਉੱਤੇ ਪਹੁੰਚ ਗਿਆ ਸੀ। ਉਸ ਮੁਤਾਬਕ ਇਹ ਟਰੰਪ ਦੀ 118ਵੀਂ ਰੈਲੀ ਸੀ, ਜਿਸ ਵਿੱਚ ਉਹ ਸ਼ਾਮਲ ਹੋਇਆ। ਦੋਵਾਂ ਧਿਰਾਂ ਵਿਚਾਲੇ ਇੱਕ ਮੌਕੇ ਉੱਤੇ ਤਿੱਖੀ ਬਹਿਸ ਜ਼ਰੂਰ ਹੋਈ, ਪਰ ਸਮੁੱਚਾ ਪ੍ਰਦਰਸ਼ਨ ਸ਼ਾਂਤਮਈ ਰਿਹਾ। ਟਰੰਪ ਦੀ ਇਸ ਫੇਰੀ ਨੇ ਜਨਤਕ ਸੁਰੱਖਿਆ ਦੇ ਨਾਲ-ਨਾਲ ਇਮੀਗ੍ਰੇਸ਼ਨ, ਮਹਿੰਗਾਈ ਅਤੇ ਮਿਡਟਰਮ ਚੋਣਾਂ ਨਾਲ ਜੁੜੀ ਸਿਆਸੀ ਖਿੱਚੋਤਾਣ ਨੂੰ ਵੀ ਖੁੱਲ੍ਹ ਕੇ ਸਾਹਮਣੇ ਲਿਆ ਦਿੱਤਾ।