ਸ਼ਰਾਬੀ ਹਾਲਤ ’ ਚ ਕਾਰ ਚਲਾ ਰਹੀ ਸਾਬਕਾ ਲੈਕਚਰਾਰ ਨੇ ਲਈ ਸੀ ਪੰਜਾਬੀ ਜੋੜੇ ਦੀ ਜਾਨ ਅਦਾਲਤ ’ਚ ਕਬੂਲਿਆ ਦੋਸ਼, 7 ਅਕਤੂਬਰ ਨੂੰ ਸੁਣਾਈ ਜਾਵੇਗੀ ਸਜ਼ਾ

ਅ

ਅਜੀਤ ਡੈਸਕ 04-09-2026

ਗਲਾਸਗੋ, 3 ਸਤੰਬਰ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਸਕਾਟਲੈਂਡ ਦੇ ਫਾਈਫ ਵਿਚ ਸ਼ਰਾਬ ਦੇ ਨਸ਼ੇ ਵਿਚ ਕਾਰ ਚਲਾਉਂਦਿਆਂ ਵਾਪਰੇ ਭਿਆਨਕ ਹਾਦਸੇ ਵਿਚ ਪੰਜਾਬੀ ਜੋੜੇ ਜਤਿੰਦਰ ਕੌਰ (48) ਅਤੇ ਸਤਵੰਤ ਸਿੰਘ (64) ਦੀ ਮੌਤ ਦੇ ਮਾਮਲੇ ਵਿਚ 33 ਸਾਲਾ ਸਾਬਕਾ ਕਾਲਜ ਲੈਕਚਰਾਰ ਸੋਫੀ ਹਾਇੰਡ ਨੇ ਐਡਿਨਬਰਾ ਹਾਈ ਕੋਰਟ ਵਿਚ ਆਪਣਾ ਦੋਸ਼ ਕਬੂਲ ਕਰ ਲਿਆ ਹੈ। 19 ਦਸੰਬਰ 2025 ਨੂੰ ਕਲੂਨੀ ਨੇੜੇ ਬੀ981 ’ਤੇ ਹੋਏ ਆਹਮੋ-ਸਾਹਮਣੇ ਹਾਦਸੇ ਵਿਚ ਜੋੜੇ ਦਾ 10 ਸਾਲਾ ਪੁੱਤਰ ਵੀ ਗੰਭੀਰ ਜ਼ਖ਼ਮੀ ਹੋ ਗਿਆ ਸੀ। ਅਦਾਲਤ ਨੂੰ ਦੱਸਿਆ ਗਿਆ ਕਿ ਹਾਇੰਡ ਨੇ ਸਟਾਫ਼ ਨਾਲ ਕ੍ਰਿਸਮਸ ਲੰਚ ਅਤੇ ਬਾਅਦ ਵਿਚ ਪੱਬ ਵਿਚ ਕਾਫ਼ੀ ਸ਼ਰਾਬ ਪੀਤੀ ਸੀ। ਰਾਤ ਨੂੰ ਉਹ ਆਪਣੀ ਕਾਰ ਲੈ ਕੇ ਨਿਕਲੀ ਅਤੇ ਰਸਤੇ ਵਿਚ ਉਸ ਨੂੰ ਬੇਤਰਤੀਬ ਢੰਗ ਨਾਲ ਗੱਡੀ ਚਲਾਉਂਦਿਆਂ ਦੇਖਿਆ ਗਿਆ। ਰਿਕਾਰਡ ਮੁਤਾਬਕ ਹਾਇੰਡ ਦੀ ਕਾਰ ਡਬਲ ਸਫੈਦ ਲਾਈਨਾਂ ਪਾਰ ਕਰਕੇ ਗਲਤ ਲੇਨ ਵਿਚ ਚਲੀ ਗਈ ਅਤੇ ਸਾਹਮਣਿਓਂ ਆ ਰਹੀ ਜਤਿੰਦਰ ਕੌਰ ਦੀ ਕਾਰ ਨਾਲ ਸਿੱਧੀ ਟਕਰਾ ਗਈ। ਜਤਿੰਦਰ ਕੌਰ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ, ਜਦਕਿ ਸਤਵੰਤ ਸਿੰਘ ਨੇ ਦੋ ਦਿਨ ਬਾਅਦ ਹਸਪਤਾਲ ਵਿਚ ਦਮ ਤੋੜ ਦਿੱਤਾ। ਕਾਰ ਵਿਚ ਸਵਾਰ ਉਨ੍ਹਾਂ ਦਾ 10 ਸਾਲਾ ਪੁੱਤਰ ਗੰਭੀਰ ਜ਼ਖ਼ਮੀ ਹੋਇਆ ਸੀ, ਜਦਕਿ 19 ਸਾਲਾ ਧੀ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਸਨ। ਹਾਇੰਡ ਨੂੰ 7 ਅਕਤੂਬਰ ਨੂੰ ਸਜ਼ਾ ਸੁਣਾਏ ਜਾਣ ਦੀ ਉਮੀਦ ਹੈ।