ਇੱਟਾਂ ਦੇ ਭੱਠਿਆਂ ਨੂੰ ਦਰਪੇਸ਼ ਸਮੱਸਿਆਵਾਂ ਸੰਬੰਧੀ ਭੱਠਾ ਮਾਲਕਾਂ ਨੇ ਟੋਹਾਣਾ 'ਚ ਕੀਤੀ ਮੀਟਿੰਗ <br/>

ਟੋਹਾਣਾ, 3 ਮਾਰਚ (ਮਨਜੀਤ ਸਿੰਘ) - ਟੋਹਾਣਾ ਸਰਕਲ ਦੇ ਆਲੇ-ਦੁਆਲੇ ਦੇ ਸਾਰੇ ਇੱਟਾਂ ਦੇ ਭੱਠਾ ਮਾਲਕਾਂ ਦੀ ਇੱਕ ਮੀਟਿੰਗ ਟੋਹਾਣਾ ਵਿਖੇ ਹੋਈ | ਮੀਟਿੰਗ ਵਿਚ ਕਨ੍ਹੜੀ, ਨਹਿਰਾ, ਟੋਹਾਣਾ, ਖਨੌਰੀ, ਨਰਵਾਣਾ, ਜੀਂਦ ਅਤੇ ਮੂਨਕ ਮਾਰਕੀਟ ਦੇ ਭੱਠਾ ਮਾਲਕ ਸ਼ਾਮਲ ਸਨ | ਇੱਟਾਂ ਬਣਾਉਣ ਲਈ ਵਰਤੀ ਜਾਂਦੀ ਮਿੱਟੀ ਅਤੇ ਕੋਲੇ ਦੀਆਂ ਕੀਮਤਾਂ ਵਿਚ ਭਾਰੀ ਵਾਧੇ ਕਾਰਨ ਇੱਟਾਂ ਬਣਾਉਣ ਦੀ ਲਾਗਤ ਵਿਚ ਆ ਰਹੀਆਂ ਮੁਸ਼ਕਲਾਂ ਬਾਰੇ ਚਰਚਾ ਕਰਨ ਤੋਂ ਬਾਅਦ ਇਹ ਐਲਾਨ ਕੀਤਾ ਗਿਆ ਕਿ ਪੰਜਾਬ ਦੇ ਸਾਰੇ ਇੱਟਾਂ ਦੇ ਭੱਠੇ 20 ਮਈ 2026 ਤੋਂ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤੇ ਜਾਣਗੇ | ਇਹ ਵੀ ਐਲਾਨ ਕੀਤਾ ਗਿਆ ਕਿ ਇਸ ਸੀਜ਼ਨ ਵਾਂਗ ਅਗਲੇ ਸੀਜ਼ਨ ਵਿਚ ਵੀ ਇੱਟਾਂ ਦੇ ਭੱਠੇ 15 ਨਵੰਬਰ 2026 ਤੱਕ ਕੰਮ ਕਰਨਗੇ | ਇਹ ਸਮਝੌਤਾ ਅਗਲੇ ਸੀਜ਼ਨ ਲਈ ਵੀ ਹੋਇਆ ਹੈ | ਮੀਟਿੰਗ ਵਿਚ ਆਏ ਸਾਰੇ ਮਾਲਕਾਂ ਨੇ ਆਪਸ ਵਿਚ ਵਿਚਾਰ-ਵਟਾਂਦਰਾ ਕੀਤਾ ਅਤੇ ਇੱਟਾਂ ਦੇ ਨਵੇਂ ਰੇਟ ਵੀ ਤੈਅ ਕੀਤੇ | ਮੌਜੂਦਾ ਸਥਿਤੀ ਨੂੰ ਦੇਖਦੇ ਹੋਏ ਐਨਸੀਆਰ ਤੋਂ ਬਾਹਰ ਇੱਟਾਂ ਦੀ ਕੀਮਤ 7000 ਰੁਪਏ ਪ੍ਰਤੀ ਹਜ਼ਾਰ ਅਤੇ ਨਰਵਾਣਾ ਖੇਤਰ ਵਿਚ 7500 ਰੁਪਏ ਪ੍ਰਤੀ ਹਜ਼ਾਰ ਨਿਰਧਾਰਿਤ ਕਰਨ 'ਤੇ ਸਹਿਮਤੀ ਪ੍ਰਗਟਾਈ ਗਈ |