ਨਵੀਂ ਦਿੱਲੀ, 23 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਜਿਵੇਂ-ਜਿਵੇਂ ਗਰਮੀ ਵਧ ਰਹੀ ਹੈ, ਇਸ ਨਾਲ ਹੀ ਬਿਜਲੀ ਦੀ ਮੰਗ ਵੀ ਦਿੱਲੀ ਵਿਚ ਵਧਦੀ ਜਾ ਰਹੀ ਹੈੈ | ਕਿਉਂਕਿ ਗਰਮੀ ਤੋਂ ਬਚਣ ਲਈ ਲੋਕ ਘਰਾਂ, ਦਫ਼ਤਰਾਂ, ਫ਼ੈਕਟਰੀਆਂ ਆਦਿ ਵਿਚ ਏ. ਸੀ., ਕੂਲਰਾਂ ਤੇ ਪੱਖਿਆਂ ਦੀ ਖ਼ੂਬ ਵਰਤੋਂ ਕਰ ਰਹੇ ਹਨ | ਇਨ੍ਹਾਂ ਦਿਨਾਂ ਵਿਚ ਬਿਜਲੀ ਦੀ ਮੰਗ 6020 ਮੈਗਾਵਾਟ ਤੋਂ ਵੀ ਉੱਪਰ ਪੁੱਜ ਗਈ ਹੈ ਅਤੇ ਇਸ ਦੇ ਹੋਰ ਵਧਣ ਦੀ ਉਮੀਦ ਬਣੀ ਹੋਈ ਹੈ | ਬਿਜਲੀ ਵਿਤਰਨ ਕੰਪਨੀਆਂ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਗਰਮੀ ਦੇ ਦਿਨਾਂ ਵਿਚ ਬਿਜਲੀ ਦੀ ਮੰਗ ਹਰ ਵਾਰ ਵਧਦੀ ਹੈ, ਜਿਸ ਦੇ ਪ੍ਰਤੀ ਉਹ ਪਹਿਲਾਂ ਹੀ ਸੁਚੇਤ ਹਨ ਅਤੇ ਵਾਧੂ ਬਿਜਲੀ ਦਾ ਵੀ ਪ੍ਰਬੰਧ ਕਰ ਰਹੇ ਹਨ | ਬਿਜਲੀ ਕੰਪਨੀਆਂ ਵਾਰ-ਵਾਰ ਲੋਕਾਂ ਨੂੰ ਅਪੀਲ ਕਰ ਰਹੀਆਂ ਹਨ ਕਿ ਬਿਜਲੀ ਦੀ ਬਚਤ ਸਭ ਨੂੰ ਕਰਨੀ ਚਾਹੀਦੀ ਹੈ, ਪ੍ਰੰਤੂ ਲੋਕ ਇਸ ਵੱਲ ਧਿਆਨ ਨਹੀਂ ਦਿੰਦੇ | ਬਿਜਲੀ ਦੀ ਜ਼ਿਆਦਾ ਹੀ ਮੰਗ ਵਧ ਜਾਣ 'ਤੇ ਬਿਜਲੀ ਕੰਪਨੀਆਂ ਨੂੰ ਮਜਬੂਰ ਹੋ ਕੇ ਛੋਟੇ-ਮੋਟੇ ਕੱਟ ਵੀ ਲਗਾਉਂਦੀਆਂ ਹਨ, ਪਰ ਕੱਟ ਲਗਾਉਣ ਦਾ ਅਕਸਰ ਲੋਕ ਵਿਰੋਧ ਕਰਦੇ ਹਨ | ਹਾਲਾਂਕਿ ਇਨ੍ਹਾਂ ਦਿਨਾਂ ਵਿਚ ਜ਼ਿਆਦਾ ਏ. ਸੀ., ਕੂਲਰ ਤੇ ਪੱਖਿਆਂ ਦੀ ਖ਼ੂਬ ਵਰਤੋਂ ਕਰਦੇ ਹਨ ਅਤੇ ਉਨ੍ਹਾਂ ਨੂੰ ਬਿਜਲੀ ਦਾ ਜ਼ਿਆਦਾ ਬਿੱਲ ਭਰਨਾ ਪੈਂਦਾ ਹੈ |
