ਨਵੀਂ ਦਿੱਲੀ, 23 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਪੁਲਿਸ ਦੀ ਅਪਰਾਧ ਸ਼ਾਖਾ ਨੇ ਮੰਗੋਲਪੁਰੀ ਅਤੇ ਜਹਾਂਗੀਪੁਰੀ ਇਲਾਕੇ ਵਿਚ ਛਾਪਾ ਮਾਰ ਕੇ ਐਲ.ਪੀ.ਜੀ. ਸਿਲੰਡਰਾਂ ਦਾ ਜਮ੍ਹਾਂ ਕੀਤਾ ਗਿਆ ਭੰਡਾਰ ਦਾ ਪਰਦਾਫਾਸ਼ ਕੀਤਾ ਹੈ, ਜੋ ਕਿ ਗ਼ੈਰ-ਕਾਨੂੰਨੀ ਢੰਗ ਨਾਲ ਬਲੈਕ ਕੀਤੇ ਜਾਂਦੇ ਸਨ | ਇਸ ਮਾਮਲੇ ਵਿਚ ਸ਼ਾਮਿਲ ਲੋਕਾਂ ਨੂੰ ਪੁਲਿਸ ਨੇ ਗਿ੍ਫ਼ਤਾਰ ਕਰ ਲਿਆ ਹੈ | ਇਨ੍ਹਾਂ ਕੋਲੋਂ ਪੁਲਿਸ ਨੇ 104 ਐਲ.ਪੀ.ਜੀ. ਸਿਲੰਡਰ, ਗ਼ੈਰ-ਕਾਨੂੰਨੀ ਸਪਲਾਈ ਕਰਨ ਵਾਲੀਆਂ ਚਾਰ ਗੱਡੀਆਂ, ਦੋ ਰੀਫਿਲਿੰਗ ਉਪਕਰਨ, ਤਿੰਨ ਡਿਜੀਟਲ ਇਲੈਕਟਿ੍ਕ ਤੋਲਣ ਵਾਲੀਆਂ ਮਸ਼ੀਨਾਂ, ਰੈਗੂਲੇਟਰ ਅਤੇ ਨੋਜ਼ਲ ਵਾਲੀ ਪਾਈਪ ਬਰਾਮਦ ਕੀਤੀ ਹੈ | ਇਹ ਲੋਕ ਖ਼ਾਲੀ ਸਿਲੰਡਰਾਂ ਵਿਚ ਗੈਸ ਭਰਕੇ ਉਨ੍ਹਾਂ ਨੂੰ ਬਾਜ਼ਾਰ ਵਿਚ ਵੇਚਦੇ ਸਨ ਅਤੇ ਖ਼ੂਬ ਮੁਨਾਫ਼ਾ ਕਮਾਉਂਦੇ ਸਨ | ਇਨ੍ਹਾਂ ਪ੍ਰਤੀ ਪੁਲਿਸ ਨੂੰ ਇਕ ਸੂਚਨਾ ਮਿਲੀ ਸੀ, ਜਿਸ ਦੇ ਆਧਾਰ 'ਤੇ ਪੁਲਿਸ ਨੇ ਛਾਪਾ ਮਾਰਿਆ ਅਤੇ ਉਸ ਸਮੇਂ ਇਹ ਲੋਕ ਗੈਸ ਸਿਲੰਡਰ ਭਰ ਰਹੇ ਸਨ | ਇਨ੍ਹਾਂ ਦੀ ਗਿ੍ਫ਼ਤਾਰੀ ਪ੍ਰਤੀ ਪੁਲਿਸ ਦੀ ਮੁਕਬਰ ਨੇ ਮਦਦ ਕੀਤੀ ਸੀ | ਪੁਲਿਸ ਵਲੋਂ ਜਦੋਂ ਇਨ੍ਹਾਂ ਤੋਂ ਪੁੱਛ-ਪੜਤਾਲ ਕੀਤੀ ਗਈ ਤਾਂ ਇਨ੍ਹਾਂ ਨੇ ਸਾਰੀ ਕਹਾਣੀ ਪੁਲਿਸ ਨੂੰ ਦੱਸ ਦਿੱਤੀ ਕਿ ਉਹ ਮੌਕੇ ਦਾ ਪੂਰੀ ਤਰ੍ਹਾਂ ਨਾਲ ਲਾਭ ਉਠਾਉਂਦੇ ਸਨ ਤੇ ਪੈਸਾ ਕਮਾਉਂਦੇ ਸਨ |
