ਨਵੀਂ ਦਿੱਲੀ, 23 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਦੇ ਲੋਕ-ਨਾਇਕ ਹਸਪਤਾਲ ਵਿਚ ਹੁਣ ਜਲਦੀ ਹੀ ਆਰਥੋਪੈਡਿਕ ਸਰਜਰੀ ਦੇ ਪ੍ਰਤੀ ਮਰੀਜ਼ਾਂ ਨੂੰ ਲੰਬਾ ਇੰਤਜ਼ਾਰ ਨਹੀਂ ਕਰਨਾ ਪਵੇਗਾ ਕਿਉਂਕਿ ਆਰਥੋਪੈਡਿਕ ਵਿਭਾਗ ਦਾ ਨਵੀਨੀਕਰਨ ਸ਼ੁਰੂ ਹੋ ਗਿਆ ਹੈ ਅਤੇ ਇਸ ਦੇ ਅਧੀਨ 10 ਨਵੇਂ ਆਪ੍ਰੇਸ਼ਨ ਥੀਏਟਰ ਬਣਨਗੇ ਅਤੇ ਆਰਥੋ ਸਰਜਰੀ ਦੇ ਮਰੀਜ਼ਾਂ ਦਾ ਜਲਦੀ ਆਪ੍ਰੇਸ਼ਨ ਹੋ ਜਾਵੇਗਾ | ਇਸ ਦੇ ਨਾਲ ਹੀ ਆਧੁਨਿਕ ਲੈਬ ਵੀ ਬਣਾਈ ਜਾਵੇਗੀ, ਜਿੱਥੇ ਕਿ ਮੈਡੀਕਲ ਦੇ ਵਿਦਿਆਰਥੀ ਅਤੇ ਡਾਕਟਰ ਵੀ ਆਧੁਨਿਕ ਸਰਜੀਕਲ ਤਕਨੀਕਾਂ ਦੀ ਜਾਣਕਾਰੀ ਲੈ ਸਕਣਗੇ | ਇਸ ਨਵੀਨੀਕਰਨ ਯੋਜਨਾ ਵਿਚ 10 ਆਧੁਨਿਕ ਓ.ਟੀ. ਅਤੇ ਦੋ ਮੰਜ਼ਿਲਾਂ ਦਾ ਪੁਨਰ-ਨਿਰਮਾਣ ਕੀਤਾ ਜਾਵੇਗਾ ਅਤੇ ਇਸ ਦੇ ਨਾਲ ਸਰਜਰੀ ਦੀ ਸਮਰਥਾ ਪਹਿਲਾਂ ਨਾਲੋਂ ਹੋਰ ਵੀ ਵਧ ਜਾਵੇਗੀ ਅਤੇ ਇੰਤਜ਼ਾਰ ਸੂਚੀ ਵਿਚ ਵੀ ਕਮੀ ਆਵੇਗੀ | ਇਸ ਦੇ ਨਾਲ ਹੀ ਗੰਭੀਰ ਹਾਲਤ ਵਿ ਆਏ ਮਰੀਜ਼ਾਂ ਦਾ ਸਮੇਂ ਸਿਰ ਆਪ੍ਰੇਸ਼ਨ ਹੋ ਸਕੇਗਾ | ਇਸ ਹਸਪਤਾਲ ਦੇ ਆਰਥੋ ਓ.ਪੀ.ਡੀ. ਵਿਚ ਕਾਫੀ ਗਿਣਤੀ ਵਿਚ ਰੋਜ਼ਾਨਾ ਮਰੀਜ਼ ਪਹੁੰਚਦੇ ਹਨ, ਜਿਸ ਕਰਕੇ ਡਾਕਟਰਾਂ ਨੂੰ ਵੀ ਮੁਸ਼ਕਿਲ ਹੁੰਦੀ ਹੈ | ਇਸ ਦੇ ਨਵੀਨੀਕਰਨ ਹੋਣ ਦੇ ਨਾਲ ਸਰਜਰੀ ਦੀ ਸਮਰੱਥਾ 10 ਪ੍ਰਤੀਸ਼ਤ ਤੋਂ ਵਧ ਕੇ 60 ਪ੍ਰਤੀਸ਼ਤ ਹੋ ਜਾਵੇਗੀ | ਡਾਕਟਰਾਂ ਦਾ ਕਹਿਣਾ ਹੈ ਕਿ ਨਵੀਨੀਕਰਨ ਹੋਣਾ ਜ਼ਰੂਰੀ ਹੈ, ਕਿਉਂਕਿ ਆਰਥੋ ਸਰਜਰੀ ਦੀ ਮੰਗ ਪਹਿਲਾਂ ਨਾਲੋਂ ਜ਼ਿਆਦਾ ਵਧੀ ਹੈ |
