ਮੈਟਰੋ ਸਟੇਸ਼ਨ 'ਤੇ ਇੰਟਰਚੇਂਜ ਦੀ ਸਹੂਲਤ ਮਿਲਣ ਨਾਲ ਲੋਕਾਂ ਨੂੰ ਹੋਈ ਆਸਾਨੀ

ਅ

ਅਜੀਤ ਡੈਸਕ 10-05-2026

ਨਵੀਂ ਦਿੱਲੀ, 9 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)- ਦਿੱਲੀ ਵਿਚ ਪਿਛਲੇ ਕਈ ਸਾਲਾਂ ਤੋਂ ਮੈਟਰੋ ਰੇਲ ਦਾ ਲਗਾਤਾਰ ਵਿਸਥਾਰ ਹੋ ਰਿਹਾ ਹੈ ਅਤੇ ਜਿਨ੍ਹਾਂ ਇਲਾਕਿਆਂ ਵਿਚ ਮੈਟਰੋ ਨਹੀਂ ਜਾਂਦੀ ਸੀ ਉਥੇ ਵੀ ਜਾਣੀ ਸ਼ੁਰੂ ਹੋ ਰਹੀ ਹੈ | ਇਸ ਨਾਲ ਹੀ ਕੁਝ ਮੈਟਰੋ ਸਟੇਸ਼ਨ 'ਤੇ ਇੰਟਰਚੇਂਜ ਦੀ ਵੀ ਯਾਤਰੀਆਂ ਨੂੰ ਸਹੂਲਤ ਮਿਲ ਰਹੀ ਹੈ | ਹੁਣ ਕੇਂਦਰੀ ਸਕੱਤਰੇਤ ਅਤੇ ਲਾਜਪਤ ਨਗਰ ਦਿੱਲੀ ਮੈਟਰੋ ਦੇ ਵੱਡੇ ਟਰਾਂਜ਼ਿਟ ਪੁਆਇੰਟ ਦੇ ਰੂਪ ਵਿਚ ਬਣ ਜਾਣਗੇ | ਇਥੇ ਆਉਣ ਵਾਲੇ ਦਿਨਾਂ ਵਿਚ ਇਕ ਦੋ ਤਿੰਨ ਨਹੀਂ ਬਲਕਿ ਚਾਰ ਕੋਰੀਡੋਰ ਲਈ ਮੈਟਰੋ ਬਦਲਣ ਦੀ ਯਾਤਰੀਆਂ ਨੂੰ ਸਹੂਲਤ ਮਿਲੇਗੀ | ਹੁਣ ਦੇ ਸਮੇਂ ਵਿਚ ਦਿੱਲੀ ਮੈਟਰੋ ਦੇ ਨੈੱਟਵਰਕ ਵਿਚ 271 ਮੈਟਰੋ ਸਟੇਸ਼ਨ ਸਨ | ਫੇਜ਼ ਚਾਰ ਵਿਚ ਹੁਣ 88.375 ਕਿੱਲੋਮੀਟਰ ਦਾ ਮੈਟਰੋ ਕਾਰੀਡੋਰ ਨਿਰਮਾਣ ਅਧੀਨ ਹੈ ਅਤੇ ਫੇਜ਼ 5-ਏ ਵਿਚ 16.076 ਕਿੱਲੋਮੀਟਰ ਦੇ ਤਿੰਨ ਕਾਰੀਡੋਰ ਅਜੇ ਬਣਾਏ ਜਾਣਗੇ | ਇਹ ਪ੍ਰੀਯੋਜਨਾਵਾਂ ਸਾਲ 2029 ਵਿਚ ਪੂਰੀਆਂ ਹੋਣਗੀਆਂ ਇਸ ਦੇ ਨਾਲ ਅਜ਼ਾਦਪੁਰ, ਨਵੀਂ ਦਿੱਲੀ, ਇੰਦਰਲੋਕ, ਕੇਂਦਰੀ ਸਕੱਤਰੇਤ ਤੇ ਲਾਜਪਤ ਨਗਰ ਤੀਹਰੇ ਇੰਟਰਚੇਂਜ ਸਟੇਸ਼ਨ ਬਣ ਜਾਵੇਗਾ | ਲਾਜਪਤ ਨਗਰ ਵਾਇਲਟ ਲਾਇਨ ਅਤੇ ਪਿੰਕ ਲਾਇਨ ਨਾਲ ਇੰਟਰਚੇਂਜ ਹੋਵੇਗਾ | ਹੁਣੇ ਹੀ ਦਿੱਲੀ ਸਰਕਾਰ ਨੇ ਫੇਜ਼ 5 'ਬੀ' ਵਿਚ 7 ਕਾਰੀਡੋਰ ਬਣਾਉਣ ਦਾ ਐਲਾਨ ਕੀਤਾ ਹੈ |
ਵਰਨਣਯੋਗ ਹੈ ਕਿ ਦਿੱਲੀ ਮੈਟਰੋ ਰੇਲ ਦਾ ਜਾਲ ਪੂਰੀ ਦਿੱਲੀ ਵਿਚ ਫੈਲਦਾ ਜਾ ਰਿਹਾ ਹੈ | ਜਿਨ੍ਹਾਂ ਇਲਾਕਿਆਂ ਵਿਚ ਟਰਾਂਸਪੋਰਟ ਦੀ ਸਹੂਲਤ ਦੀ ਘਾਟ ਹੈ | ਮੈਟਰੋ ਰੇਲ ਉਥੇ ਵੀ ਪੁੱਜਣੀ ਸ਼ੁਰੂ ਹੋ ਗਈ ਹੈ ਅਤੇ ਲੋਕ ਵੀ ਮੈਟਰੋ ਆਉਣ 'ਤੇ ਖ਼ੁਸ਼ ਹਨ |