ਨਵੀਂ ਦਿੱਲੀ, 9 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਪੁਲਿਸ ਦੀ ਅਪਰਾਧ ਸ਼ਾਖਾ ਪਿਛਲੇ ਸਮੇਂ ਤੋਂ ਗੁਆਚੇ ਅਤੇ ਘਰੋਂ ਫਰਾਰ ਹੋਏ ਬੱਚਿਆਂ ਨੂੰ ਲੱਭ ਕੇ ਉਨ੍ਹਾਂ ਦੇ ਘਰ ਪਹੁੰਚਾ ਰਹੀ ਹੈ ਜੋ ਕਿ ਇਕ ਸ਼ਲਾਘਾਯੋਗ ਉਪਰਾਲਾ ਹੈ | ਹੁਣ ਅਪਰਾਧ ਸ਼ਾਖਾ ਨੇ ਇਕ 28 ਸਾਲਾਂ ਦੀ ਔਰਤ ਜੋ ਲਾਪਤਾ ਹੋ ਗਈ ਸੀ ਅਤੇ ਉਸ 'ਤੇ 20 ਹਜ਼ਾਰ ਰੁਪਏ ਦਾ ਇਨਾਮ ਵੀ ਰੱਖਿਆ ਹੋਇਆ ਸੀ | ਇਸ ਔਰਤ ਨੂੰ ਪੁਲਿਸ ਨੇ ਹਰਿਆਣਾ ਦੇ ਗੋਹਾਣਾ ਖੇਤਰ ਤੋਂ ਬਰਾਮਦ ਕੀਤਾ ਹੈ | ਇਸ ਤੋਂ ਇਲਾਵਾ ਅਪਰਾਧ ਸ਼ਾਖਾ ਨੇ ਇਕ 16 ਸਾਲ ਦੀ ਲੜਕੀ ਨੂੰ ਫ਼ਤਹਿਗੜ੍ਹ, ਉੱਤਰ ਪ੍ਰਦੇਸ਼ ਤੋਂ ਬਰਾਮਦ ਕੀਤਾ ਹੈ | ਜਦੋਂ ਪੁਲਿਸ ਨੇ ਉਸ ਤੋਂ ਪੁੱਛ-ਪੜਤਾਲ ਕੀਤੀ ਤਾਂ ਪਤਾ ਲੱਗਾ ਕਿ ਇੰਸਟਾਗ੍ਰਾਮ 'ਤੇ ਉਸ ਦੇ ਸੰਪਰਕ ਵਿਚ ਇਕ ਲੜਕਾ ਆਇਆ ਸੀ ਅਤੇ ਦੋਵੇਂ ਦੋਸਤ ਬਣੇ | ਇਹ ਮੁੰਡਾ ਦਿੱਲੀ ਆਇਆ ਤੇ ਕੁੜੀ ਨੂੰ ਫ਼ਤਹਿਗੜ੍ਹ ਲੈ ਗਿਆ | ਇਸ ਕੁੜੀ ਨੂੰ ਪੁਲਿਸ ਨੇ ਉਸ ਦੇ ਮਾਪਿਆਂ ਦੇ ਸਪੁਰਦ ਕਰ ਦਿੱਤਾ ਹੈ | ਇਨ੍ਹਾਂ ਦੋਵੇਂ ਉਪਰਾਲਿਆਂ ਦੇ ਪ੍ਰਤੀ ਪੁਲਿਸ ਨੇ ਤਕਨੀਕੀ ਨਿਗਰਾਨੀ, ਪੁੱਛ-ਪੜਤਾਲ, ਸੋਸ਼ਲ ਮੀਡੀਆ ਦੇ ਪਲੇਟਫਾਰਮਾਂ ਦੀ ਜਾਂਚ ਅਤੇ ਹੋਰ ਢੰਗ ਨੂੰ ਆਪਣਾ ਕੇ ਅਖੀਰ ਸਫਲਤਾ ਪ੍ਰਾਪਤ ਕੀਤੀ |
