ਨਵੀਂ ਦਿੱਲੀ, 16 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਪੁਲਿਸ ਦੀ ਅਪਰਾਧ ਸ਼ਾਖਾ ਨੇ ਹਨੀ ਟ੍ਰੈਪ ਅਤੇ ਫਿਰੌਤੀ ਰੈਕਟ (ਗਰੋਹ) ਦਾ ਪਰਦਾਫਾਸ਼ ਕੀਤਾ ਹੈ, ਜੋ ਨਕਲੀ ਪੁਲਿਸ ਵਾਲੇ ਬਣ ਕੇ ਲੋਕਾਂ ਤੋਂ ਪੈਸੇ ਵਸੂਲਦੇ ਸਨ | ਪੁਲਿਸ ਨੂੰ ਇਸ ਗਰੋਹ ਬਾਰੇ ਖੁਫੀਆ ਜਾਣਕਾਰੀ ਮਿਲੀ | ਪੁਲਿਸ ਨੇ ਤੇਜ਼ੀ ਨਾਲ ਕਾਰਵਾਈ ਕਰਦੇ ਹੋਏ ਆਪਣੀ ਇਕ ਟੀਮ ਬਣਾਈ | ਪੁਲਿਸ ਨੇ ਆਪਣੇ ਆਪ੍ਰੇਸ਼ਨ ਦੌਰਾਨ ਇਕ ਸ਼ੱਕੀ ਗੱਡੀ ਨੂੰ ਰੋਕਿਆ ਅਤੇ ਉਸ ਵਿਚੋਂ ਤਿੰਨ ਲੋਕ ਭੱਜਣ ਵਿਚ ਸਫਲ ਹੋ ਗਏ | ਪੁਲਿਸ ਨੇ ਇਕ ਦੋਸ਼ੀ ਸੁਸ਼ੀਲ ਕੁਮਾਰ ਨੂੰ ਕਾਬੂ ਕੀਤਾ, ਜਿਸ ਨੇ ਪੁਲਿਸ ਦੀ ਨਕਲੀ ਵਰਦੀ ਪਾਈ ਹੋਈ ਸੀ | ਪੁਲਿਸ ਨੇ ਜਦੋਂ ਉਸ ਦੇ ਸਾਥੀਆਂ ਬਾਰੇ ਪੁੱਛ-ਪੜਤਾਲ ਕੀਤੀ ਤਾਂ ਉਸ ਨੇ ਆਪਣੇ ਸਾਥੀਆਂ ਦੇ ਨਾਂਅ ਦੀਪਕ, ਨੀਰਜ ਤਿਆਗੀ, ਵਿਨੋਦ ਪੰਡਤ ਅਤੇ ਕੀਰਤੀ ਦੱਸੇ | ਬਾਅਦ ਵਿਚ ਪੁਲਿਸ ਨੇ ਦੀਪਕ (ਹਰਿਆਣਾ), ਵਿਨੋਦ (ਦਿੱਲੀ), ਨੀਰਜ (ਦਿੱਲੀ), ਸੁਸ਼ੀਲ (ਦਿੱਲੀ) ਨੂੰ ਵੀ ਕਾਬੂ ਕਰ ਲਿਆ | ਪੁਲਿਸ ਨੇ ਇਨ੍ਹਾਂ 'ਤੇ ਮਾਮਲਾ ਦਰਜ ਕਰ ਲਿਆ ਅਤੇ ਨਾਲ ਹੀ ਇਨ੍ਹਾਂ ਤੋਂ ਹੋਰ ਪੁੱਛ-ਪੜਤਾਲ ਕਰਨ ਵਿਚ ਲੱਗੀ ਹੋਈ ਹੈ | ਪੁਲਿਸ ਇਸ ਗਰੋਹ ਦੁਆਰਾ ਕੀਤੀਆਂ ਗਈਆਂ ਲੁੱਟ-ਖਸੁੱਟਾਂ ਅਤੇ ਹੋਰ ਮਾਮਲਿਆਂ ਦੀ ਵੀ ਜਾਂਚ ਕਰ ਰਹੀ ਹੈ |
