ਟੋਹਾਣਾ, 2 ਜੁਲਾਈ (ਮਨਜੀਤ ਸਿੰਘ)- ਟੋਹਾਣਾ ਦੇ ਡਾਂਗਰਾ ਰੋਡ ਸਥਿਤ ਇੱਕ ਘਰ ਵਿੱਚ ਬੀਤੀ ਸ਼ਾਮ ਇੱਕ ਬੇਹੱਦ ਜ਼ਹਿਰੀਲਾ ਕਾਮਨ ਕਰੇਟ ਸੱਪ ਦਾਖ਼ਲ ਹੋਣ ਨਾਲ ਪਰਿਵਾਰ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ। ਪਰਿਵਾਰ ਵਲੋਂ ਤੁਰੰਤ ਸਹਾਰਾ ਰੈਸਕਿਊ ਟੀਮ ਦੇ ਸਰਪ੍ਰਸਤ ਅਤੇ ਸਨੇਕ ਰੈਸਕਿਊਰ ਨਵਜੋਤ ਸਿੰਘ ਢਿੱਲੋਂ ਨੂੰ ਸੂਚਨਾ ਦਿੱਤੀ ਗਈ। ਸੂਚਨਾ ਮਿਲਦੇ ਹੀ ਉਹ ਮੌਕੇ ’ਤੇ ਪਹੁੰਚੇ ਅਤੇ ਪੂਰੀ ਸਾਵਧਾਨੀ ਨਾਲ ਸੱਪ ਨੂੰ ਸੁਰੱਖਿਅਤ ਢੰਗ ਨਾਲ ਰੈਸਕਿਊ ਕਰਕੇ ਉਸ ਦੇ ਕੁਦਰਤੀ ਵਾਸ-ਸਥਾਨ ਵਿੱਚ ਛੱਡ ਦਿੱਤਾ। ਰੈਸਕਿਊ ਤੋਂ ਬਾਅਦ ਨਵਜੋਤ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਇਹ ਕਾਮਨ ਕਰੇਟ ਭਾਰਤ ਦੇ ਸਭ ਤੋਂ ਜ਼ਹਿਰੀਲੇ ਸੱਪਾਂ ’ਚੋਂ ਇੱਕ ਹੈ। ਇਹ ਮੁੱਖ ਤੌਰ ’ਤੇ ਰਾਤ ਸਮੇਂ ਸਰਗਰਮ ਰਹਿੰਦਾ ਹੈ ਅਤੇ ਚੂਹਿਆਂ, ਛਿਪਕਲੀਆਂ ਜਾਂ ਹੋਰ ਛੋਟੇ ਜੀਵਾਂ ਦੀ ਭਾਲ ਵਿੱਚ ਘਰਾਂ ਵਿੱਚ ਵੀ ਦਾਖ਼ਲ ਹੋ ਸਕਦਾ ਹੈ। ਕਈ ਵਾਰ ਇਹ ਮਨੁੱਖ ਦੇ ਸਰੀਰ ਦੀ ਗਰਮੀ ਕਾਰਨ ਬਿਸਤਰੇ ’ਚ ਵੀ ਆ ਕੇ ਲੁਕ ਜਾਂਦਾ ਹੈ। ਜਦੋਂ ਸੁੱਤਾ ਹੋਇਆ ਵਿਅਕਤੀ ਨੀਂਦ ਵਿੱਚ ਪਾਸਾ ਵੱਟਦਾ ਹੈ ਜਾਂ ਅਣਜਾਣੇ ਵਿੱਚ ਸੱਪ ਉੱਤੇ ਦਬਾਅ ਪੈਂਦਾ ਹੈ ਤਾਂ ਇਹ ਆਪਣੇ ਬਚਾਅ ਲਈ ਡੱਸ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਕਾਮਨ ਕਰੇਟ ਦੇ ਡੱਸਣ ਵੇਲੇ ਅਕਸਰ ਬਹੁਤ ਘੱਟ ਜਾਂ ਬਿਲਕੁਲ ਦਰਦ ਨਹੀਂ ਹੁੰਦਾ ਅਤੇ ਨਾ ਹੀ ਸੋਜ ਹੁੰਦੀ ਹੈ। ਇਸੇ ਕਰਕੇ ਕਈ ਲੋਕ ਇਸ ਨੂੰ ਗੰਭੀਰਤਾ ਨਾਲ ਨਹੀਂ ਲੈਂਦੇ। ਪਰ ਇਸ ਦਾ ਜ਼ਹਿਰ ਸਿੱਧਾ ਨਰਵਸ ਸਿਸਟਮ ’ਤੇ ਅਸਰ ਕਰਦਾ ਹੈ। ਕੁਝ ਘੰਟਿਆਂ ਬਾਅਦ ਪਲਕਾਂ ਝੁਕਣੀਆਂ, ਬੋਲਣ ਅਤੇ ਨਿਗਲਣ ਵਿੱਚ ਦਿੱਕਤ, ਧੁੰਦਲਾ ਦਿਖਾਈ ਦੇਣਾ, ਲਾਰ ਟਪਕਣੀ, ਸਾਹ ਲੈਣ ਵਿੱਚ ਮੁਸ਼ਕਲ ਅਤੇ ਗੰਭੀਰ ਹਾਲਤ ਵਿੱਚ ਸਾਹ ਬੰਦ ਹੋਣ ਵਰਗੀਆਂ ਸਥਿਤੀਆਂ ਪੈਦਾ ਹੋ ਸਕਦੀਆਂ ਹਨ। ਸਮੇਂ ਸਿਰ ਇਲਾਜ ਨਾ ਮਿਲਣ ’ਤੇ ਇਹ ਜਾਨਲੇਵਾ ਵੀ ਸਾਬਤ ਹੋ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਜੇ ਘਰ ਵਿੱਚ ਸੱਪ ਦਿਖਾਈ ਦੇਵੇ ਤਾਂ ਉਸ ਨੂੰ ਮਾਰਨ ਜਾਂ ਖੁਦ ਫੜਨ ਦੀ ਕੋਸ਼ਿਸ਼ ਨਾ ਕਰੋ। ਤੁਰੰਤ ਸਿੱਖਿਅਤ ਸਨੇਕ ਰੈਸਕਿਊਰ ਜਾਂ ਵਣ ਜੀਵ ਵਿਭਾਗ ਨਾਲ ਸੰਪਰਕ ਕਰੋ। ਜਾਗਰੂਕਤਾ, ਸਾਵਧਾਨੀ ਅਤੇ ਸਮੇਂ ਸਿਰ ਡਾਕਟਰੀ ਇਲਾਜ ਨਾਲ ਸੱਪ ਡੱਸਣ ਕਾਰਨ ਹੋਣ ਵਾਲੀਆਂ ਜ਼ਿਆਦਾਤਰ ਮੌਤਾਂ ਨੂੰ ਰੋਕਿਆ ਜਾ ਸਕਦਾ ਹੈ।
