ਜਲੰਧਰ, 4 ਫਰਵਰੀ (ਸ਼ਿਵ)- ਨਗਰ ਨਿਗਮ ਦੀ ਲੰਬਾ ਪਿੰਡ ਚੌਕ ਦੇ ਨਾਲ ਚਾਰਾ ਮੰਡੀ ਵਿਚ ਰੇਤਾ, ਬਜਰੀ ਤੇ ਹੋਰ ਸਾਮਾਨ ਰੱਖਿਆ ਹੁੰਦਾ ਹੈ | ਇੱਥੇ ਰੇਤ, ਬਜਰੀ ਨਾਲ ਭਰੀਆਂ ਟਰੈਕਟਰ ਟਰਾਲੀਆਂ ਵੀ ਖੜੀਆਂ ਹੁੰਦੀਆਂ ਹਨ | ਵਰਕਸ਼ਾਪ ਦੇ ਪਿਛਲੇ ਪਾਸੇ ਜਿੱਥੇ ਕਿ ਨਿਗਮ ਦਾ ਪੈਟਰੋਲ ਪੰਪ ਬੰਦ ਹੈ ਉੱਥੇ ਹੀ ਨਿਗਮ ਦੀ ਕੰਧ ਟੁੱਟ ਗਈ ਹੈ | ਇਸ ਬਾਰੇ ਨਗਰ ਨਿਗਮ ਦੇ ਡਰਾਈਵਰ ਤੇ ਟੈਕਨੀਕਲ ਅਤੇ ਹੈਲਥ ਬਰਾਂਚ ਦੇ ਪ੍ਰਧਾਨ ਸ਼ੰਮੀ ਲੁਥਰ ਨੇ ਦੱਸਿਆ ਕਿ ਜਦੋਂ ਸਵੇਰੇ ਉਹ ਵਰਕਸ਼ਾਪ ਗਏ ਤਾਂ ਦੇਖਿਆ ਕਿ ਪੈਟਰੋਲ ਪੰਪ ਦੀ ਕੰਧ ਤੋੜੀ ਹੋਈ ਸੀ ਜਿਸ ਦੀ ਉਨ੍ਹਾਂ ਨੇ ਨਗਰ ਨਿਗਮ ਦੇ ਸੁਰੱਖਿਆ ਦਸਤੇ ਦੇ ਇੰਚਾਰਜ ਭੂਸ਼ਨ ਨੂੰ ਜਾਣਕਾਰੀ ਦਿੱਤੀ | ਉਨ੍ਹਾਂ ਨੇ ਕਿਹਾ ਹੈ ਕਿ ਇਸ ਮਾਮਲੇ ਵਿਚ ਨਗਰ ਨਿਗਮ ਕਮਿਸ਼ਨਰ ਤੇ ਪੁਲਿਸ ਕਮਿਸ਼ਨਰ ਨੂੰ ਮਿਲ ਕੇ ਕੰਧ ਟੁੱਟਣ ਦੀ ਸ਼ਿਕਾਇਤ ਕੀਤੀ ਜਾਵੇਗੀ |