ਫਿਲੌਰ, 3 ਅਪ੍ਰੈਲ (ਵਿਪਨ ਗੈਰੀ)-ਵਿਧਾਨ ਸਭਾ ਹਲਕਾ ਫਿਲੌਰ ਦੇ ਕੌਮੀ ਰਾਜ ਮਾਰਗ ਤੇ ਰੇਲਵੇ ਲਾਈਨਾਂ ਦੇ ਵਿਚਕਾਰ ਵੱਸਦੇ ਮੁਹੱਲਾ ਕਲਸੀ ਨਗਰ ਨੂੰ ਖਾਲੀ ਕਰਵਾਉਣ ਲਈ ਸਰਕਾਰ ਵਲੋਂ ਉਥੇ ਵੱਸਦੇ ਲੋਕਾਂ ਨੂੰ ਜ਼ਮੀਨ ਛੱਡ ਕੇ ਜਾਣ ਲਈ ਕਿਹਾ ਗਿਆ ਹੈ | ਜਿਸ ਮਗਰੋਂ ਵਸਨੀਕ ਲੋਕਾਂ 'ਚ ਹਫ਼ੜਾ ਦਫ਼ੜੀ ਤੇ ਦਹਿਸ਼ਤ ਦਾ ਮਾਹੌਲ ਬਣਿਆ ਹੋਇਆ ਹੈ | ਜਿਸ ਸੰਬੰਧੀ ਅੱਜ ਸ਼ਾਮ ਬਸਪਾ ਦੇ ਸੂਬਾ ਪ੍ਰਧਾਨ ਡਾ. ਅਵਤਾਰ ਸਿੰਘ ਕਰੀਮਪੁਰੀ ਨੇ ਹਲਕੇ ਦੀ ਟੀਮ ਸਮੇਤ ਪਹੁੰਚ ਕੇ ਮੌਕੇ ਦਾ ਜਾਇਜ਼ਾ ਲਿਆ ਤੇ ਲੋਕਾਂ ਨਾਲ ਗੱਲਬਾਤ ਕੀਤੀ | ਇਸੇ ਦੌਰਾਨ ਡਾ. ਕਰੀਮਪੁਰੀ ਨੇ ਕਿਹਾ ਕਿ ਉਹ ਫਿਲੌਰ ਦੇ 300 ਦੇ ਕਰੀਬ ਬਣੇ ਘਰਾਂ ਤੇ 200 ਦੇ ਕਰੀਬ ਬਣੀਆਂ ਦੁਕਾਨਾਂ ਦਾ ਉਜਾੜਾ ਨਹੀ ਹੋਣ ਦੇਣਗੇ ਤੇ ਬਸਪਾ ਹਮੇਸ਼ਾ ਗਰੀਬ ਮਜ਼ਲੂਮਾ ਨਾਲ ਖੜ੍ਹੀ ਹੈ ਤੇ ਉਨ੍ਹਾਂ ਨੂੰ ਸੁਰੱਖਿਅਤ ਰੱਖਣ ਲਈ ਵਚਨਬੱਧ ਹੈ | ਉਨ੍ਹਾਂ ਲੋਕਾਂ ਨੂੰ ਭਰੋਸਾ ਦਵਾਇਆ ਕਿ ਪਾਰਟੀ ਉਨ੍ਹਾਂ ਨਾਲ ਡਟ ਕੇ ਖੜ੍ਹੀ ਹੈ ਤੇ ਸਰਕਾਰ ਦੇ ਇਸ ਜੁਰਮ ਖ਼ਿਲਾਫ਼ ਬਸਪਾ ਦੇ ਝੰਡੇ ਹੇਠ ਲੜਾਈ ਲੜੀ ਜਾਵੇਗੀ | ਉਨ੍ਹਾਂ ਅੱਗੇ ਕਿਹਾ ਕਿ ਸਰਕਾਰ ਵਲੋਂ ਚੋਣਾਂ ਨੇੜੇ ਆਉਣ 'ਤੇ ਇਸ ਤਰ੍ਹਾਂ ਦੇ ਡਰਾਮੇ ਕਰਕੇ ਗਰੀਬ ਵਰਗ ਨੂੰ ਡਰਾਉਣ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ ਤੇ ਉਹ ਅਜਿਹਾ ਨਹੀ ਹੋਣ ਦੇਣਗੇ | ਉਨ੍ਹਾਂ ਦੱਸਿਆ ਕਿ ਸਰਕਾਰ ਦਾ ਕੰਮ ਲੋਕਾਂ ਨੂੰ ਵਸਾਉਣਾ ਦਾ ਹੁੰਦਾ ਹੈ ਨਾ ਕਿ ਉਨ੍ਹਾਂ ਨੂੰ ਉਜਾੜਨ ਦਾ | ਅੰਤ 'ਚ ਕਰੀਮਪੁਰੀ ਨੇ ਦੱਸਿਆ ਕਿ ਉਨ੍ਹਾਂ ਦੀ ਫਿਲੌਰ ਦੀ ਟੀਮ ਇਹ ਮੋਰਚਾ ਸੰਭਾਲੇਗੀ ਤੇ ਇਸ ਮਾਮਲੇ ਸੰਬੰਧੀ ਪ੍ਰਸ਼ਾਸਨ ਦੇ ਉੱਚ ਅਧਿਕਾਰੀਆਂ ਨਾਲ ਮੀਟਿੰਗ ਕੀਤੀ ਜਾਵੇਗੀ | ਇਸ ਮੌਕੇ ਖ਼ੁਸ਼ੀ ਰਾਮ ਨੰਗਲ, ਰਾਮ ਲੁਭਾਇਆ, ਮਹਿੰਦਰਪਾਲ ਤੇਹਿੰਗ, ਟੀਨੂ ਰਾਮਗੜ੍ਹ, ਬੁੱਧ ਪ੍ਰਕਾਸ਼ ਗੜਾ, ਦੇਵੀ ਲਾਂਦੜਾ ਤੇ ਹੋਰ ਵੱਡੀ ਗਿਣਤੀ 'ਚ ਬਸਪਾ ਆਗੂ ਅਤੇ ਸੈਂਕੜੇ ਮੁਹੱਲਾ ਵਾਸੀ ਹਾਜ਼ਰ ਸਨ |
