ਗ਼ਜ਼ਲ
ਅਜੀਤ ਡੈਸਕ
10-05-2026
ਖ਼ੈਰ ਹੋਵੇ ਪੰਛੀਆਂ ਦੀ, ਮੱਛੀਆਂ ਖ਼ਤਰੇ 'ਚ ਨੇ |
ਸਾਰ ਲਈਏ ਪਿੰਡ ਦੀ ਚੱਲ ਪੈਲੀਆਂ ਖ਼ਤਰੇ 'ਚ ਨੇ |
ਝਾਂਜਰਾਂ ਖ਼ਤਰੇ 'ਚ ਨੇ ਹੁਣ ਚੂੜੀਆਂ ਖ਼ਤਰੇ 'ਚ ਨੇ,
ਸ਼ਮਲਿਆਂ ਦੀ ਸ਼ਾਨ ਹੈ, ਪਰ ਚੁੰਨੀਆਂ ਖ਼ਤਰੇ 'ਚ ਨੇ |
ਉਹ ਨਹੀਂ ਝੁਕਦੇ ਤੇ ਸਾਨੂੰ ਅਕੜਨਾ ਆਉਂਦਾ ਨਹੀਂ,
ਤਾਂ ਹੀ ਸਾਡੇ ਵਿਚਲੀਆਂ ਸਭ ਸੰਧੀਆਂ ਖ਼ਤਰੇ 'ਚ ਨੇ |
ਘਿਰਗੀਆਂ ਤੂਫ਼ਾਨ ਵਿਚ ਜੋ ਕਿਸ਼ਤੀਆਂ ਦੇ ਨਾਲ-ਨਾਲ,
ਘਰ 'ਚ ਮੱਲਾਹਾਂ ਦੀਆਂ ਬਹੂ-ਬੇਟੀਆਂ ਖ਼ਤਰੇ 'ਚ ਨੇ |
ਹੋਇਗਾ ਕਿੰਨਾ ਕੁ ਰੌਸ਼ਨ ਆਉਣ ਵਾਲਾ ਕੱਲ੍ਹ ਓਥੇ,
ਸ਼ਬਦ ਅਜ ਖ਼ਤਰੇ 'ਚ ਜਿੱਥੇ ਪੋਥੀਆਂ ਖ਼ਤਰੇ 'ਚ ਨੇ |
