ਫ਼ਰੀਦਕੋਟ, 31 ਜਨਵਰੀ (ਜਸਵੰਤ ਸਿੰਘ ਪੁਰਬਾ)-ਬੀਤੀ ਦੇਰ ਸ਼ਾਮ ਫ਼ਰੀਦਕੋਟ ਦੇ ਪਿੰਡ ਟਹਿਣਾ ਟੀ ਪੁਆਇੰਟ 'ਤੇ ਬਣੇ ਹਾਈ ਟੇਕ ਨਾਕੇ 'ਤੇ ਰੁਟੀਨ ਚੈਕਿੰਗ ਦੌਰਾਨ ਜਦ ਇਕ ਤੇਜ਼ ਰਫਤਾਰ ਆ ਰਹੀ ਥਾਰ ਗੱਡੀ ਨੂੰ ਪੁਲਿਸ ਨੇ ਰੋਕਣ ਦੀ ਕੋਸ਼ਿਸ ਕੀਤੀ ਤਾਂ ਪਹਿਲਾਂ ਤਾਂ ਥਾਰ ਚਾਲਕਾਂ ਨੇ ਗੱਡੀ ਹੋਲੀ ਕਰ ਲਈ ਪਰ ਬਾਅਦ 'ਚ ਅਚਾਨਕ ਸਪੀਡ ਤੇਜ਼ ਕਰ ਨਾਕੇ ਨੂੰ ਤੋੜਦੀ ਹੋਈ ਗੱਡੀ ਭਜਾ ਕੇ ਲੈ ਗਏ | ਇਸੇ ਦੌਰਾਨ ਇਕ ਪੁਲਿਸ ਮੁਲਾਜ਼ਮ 'ਤੇ ਗੱਡੀ ਚੜਨੋਂ ਮਸਾਂ ਬਚੀ | ਨਾਕੇ 'ਤੇ ਖੜੇ ਪੁਲਿਸ ਅਧਿਕਾਰੀ ਵਲੋਂ ਤੁਰੰਤ ਵਾਇਰਲੈਸ 'ਤੇ ਗੱਡੀ ਸਬੰਧੀ ਸੂਚਨਾ ਨਸ਼ਰ ਕੀਤੀ ਗਈ ਜਿਸ 'ਤੇ ਉਕਤ ਗੱਡੀ ਨੂੰ ਕੁਝ ਸਮੇਂ ਬਾਅਦ ਹੀ ਮੈਡੀਕਲ ਕਾਲਜ ਵੱਲ ਲੱਗੇ ਦੂਜੇ ਨਾਕੇ 'ਤੇ ਕਾਬੂ ਕਰ ਲਿਆ ਗਿਆ | ਡੀ.ਐਸ.ਪੀ ਤਰਲੋਚਨ ਸਿੰਘ ਨੇ ਦੱਸਿਆ ਕਿ ਗੱਡੀ ਅੰਦਰ ਚਾਰ ਨੌਜਵਾਨ ਸਵਾਰ ਸਨ, ਜਿਨ੍ਹਾਂ 'ਚੋਂ ਗੱਡੀ ਚਲਾਉਣ ਵਾਲਾ ਮੌਕੇ ਤੋਂ ਫ਼ਰਾਰ ਹੋ ਗਿਆ ਜਦਕਿ ਬਾਕੀ ਤਿੰਨਾਂ ਨੂੰ ਪੁਲਿਸ ਨੇ ਕਾਬੁ ਕਰ ਲਿਆ ਜਿਨ੍ਹਾਂ ਖਿਲਾਫ਼ ਬਣਦੀਆਂ ਧਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ | ਉਨ੍ਹਾਂ ਦੱਸਿਆ ਕਿ ਉਕਤ ਨੌਜਵਾਨਾਂ ਵਲੋਂ ਸ਼ਰਾਬ ਪੀਤੀ ਹੋਈ ਸੀ |
