ਪੰਜਾਬ-ਹਰਿਆਣਾ ਦੇ ਸਰਹੱਦੀ ਪਿੰਡਾਂ 'ਚ ਖੇਤੀ ਮੋਟਰਾਂ ਦੀ ਚੋਰੀ, ਪਿਉ-ਪੁੱਤ ਤੇ ਕਬਾੜੀਆ ਕਾਬੂ
ਅਜੀਤ ਡੈਸਕ
08-03-2026
ਮੰਡੀ ਕਿੱਲਿਆਂਵਾਲੀ, 7 ਮਾਰਚ (ਇਕਬਾਲ ਸਿੰਘ ਸ਼ਾਂਤ)-ਡੱਬਵਾਲੀ ਅਤੇ ਲੰਬੀ ਹਲਕੇ ਦੇ ਪੰਜਾਬ-ਹਰਿਆਣਾ ਸਰਹੱਦੀ ਪਿੰਡਾਂ ਵਿਚ ਖੇਤਾਂ ਵਿਚੋਂ ਬਿਜਲੀ ਮੋਟਰਾਂ ਅਤੇ ਸੋਲਰ ਸਿਸਟਮਾਂ ਦੇ ਸਾਮਾਨ ਦੀਆਂ ਚੋਰੀਆਂ ਦੇ ਮਾਮਲੇ ਵਿਚਕਾਰ ਕਿਸਾਨਾਂ ਨੇ ਪਿੰਡ ਫੱਤਾਕੇਰਾ ਦੇ ਪਿਉ-ਪੁੱਤ ਨੂੰ ਕਾਬੂ ਕਰਕੇ ਕਿੱਲਿਆਂਵਾਲੀ ਪੁਲਿਸ ਦੇ ਹਵਾਲੇ ਕਰ ਦਿੱਤਾ | ਦੋਵਾਂ ਦੀ ਪਛਾਣ ਗੁਰਜੀਤ ਸਿੰਘ ਅਤੇ ਉਸ ਦੇ ਪੁੱਤਰ ਲਖਵਿੰਦਰ ਸਿੰਘ ਵਜੋਂ ਹੋਈ ਹੈ | ਪੁਲਿਸ ਨੇ ਉਨ੍ਹਾਂ ਕੋਲੋਂ ਦੋ ਬਿਜਲੀ ਮੋਟਰਾਂ ਬਰਾਮਦ ਕੀਤੀਆਂ ਹਨ | ਪੁਲਿਸ ਜਾਂਚ ਦੌਰਾਨ ਪਿੰਡ ਸਕਤਾਖੇੜਾ ਦੇ ਕਬਾੜੀਏ ਪਾਲਾ ਸਿੰਘ ਨੂੰ ਵੀ ਕਾਬੂ ਕੀਤਾ ਗਿਆ ਹੈ | ਦੱਸਿਆ ਜਾਂਦਾ ਹੈ ਕਿ ਮੁਲਜ਼ਮ ਚੋਰੀ ਕੀਤੀਆਂ ਮੋਟਰਾਂ ਉਸ ਨੂੰ ਵੇਚਦੇ ਸਨ | ਪੁਲਿਸ ਨੇ ਉਸ ਕੋਲੋਂ ਪੰਜ ਚੋਰੀਸ਼ੁਦਾ ਖੇਤੀ ਮੋਟਰਾਂ ਬਰਾਮਦ ਕਰਕੇ ਅਗਲੀ ਪੁੱਛਗਿੱਛ ਲਈ ਇਕ ਦਿਨ ਦੇ ਪੁਲਿਸ ਰਿਮਾਂਡ 'ਤੇ ਲਿਆ ਹੈ, ਜਦਕਿ ਪਿਉ-ਪੁੱਤ ਨੂੰ ਅਦਾਲਤ ਵਿਚ ਪੇਸ਼ ਕਰਕੇ ਜੇਲ੍ਹ ਭੇਜ ਦਿੱਤਾ ਗਿਆ ਹੈ | ਪੁਲਿਸ ਸੂਤਰਾਂ ਮੁਤਾਬਕ ਦੋਵੇਂ ਦੋਸ਼ੀ ਦਿਹਾੜੀ ਮਜ਼ਦੂਰੀ ਕਰਨ ਦਾ ਦਿਖਾਵਾ ਕਰਦੇ ਸਨ ਅਤੇ ਰਾਤ ਦੇ ਸਮੇਂ ਖੇਤਾਂ ਵਿਚੋਂ ਮੋਟਰਾਂ, ਸਟਾਰਟਰਾਂ ਤੇ ਸੋਲਰ ਸਿਸਟਮਾਂ ਦੀਆਂ ਤਾਰਾਂ ਚੋਰੀ ਕਰਦੇ ਸਨ |
ਇਲਾਕੇ ਦੇ ਫੱਤਾਕੇਰਾ, ਹਾਕੂਵਾਲਾ, ਮਿੱਡੂਖੇੜਾ, ਸਕਤਾਖੇੜਾ ਤੇ ਜੋਤਾਂਵਾਲੀ ਪਿੰਡਾਂ ਵਿਚ ਪਿਛਲੇ ਕੁਝ ਮਹੀਨਿਆਂ ਦੌਰਾਨ ਕਈ ਦਰਜਨ ਖੇਤੀ ਮੋਟਰਾਂ ਅਤੇ ਸੋਲਰ ਸਿਸਟਮਾਂ ਦੇ ਸਾਮਾਨ ਦੀਆਂ ਚੋਰੀਆਂ ਸਾਹਮਣੇ ਆਈਆਂ ਹਨ | ਸਕਤਾਖੇੜਾ ਦੇ ਕਿਸਾਨ ਵਿਨੋਦ ਕੁਮਾਰ ਦੇ ਮੁਤਾਬਕ ਉਨ੍ਹਾਂ ਦੇ ਪਿੰਡ ਵਿਚ ਕਈ ਖੇਤਾਂ ਸੋਲਰ ਸਿਸਟਮ ਦਾ ਸਾਮਾਨ ਅਤੇ ਸੈਂਕੜੇ ਫ਼ੁੱਟ ਬਿਜਲੀ ਤਾਰਾਂ ਵੀ ਚੋਰੀ ਹੋਈਆਂ ਹਨ | ਉਨ੍ਹਾਂ ਕਿਹਾ ਕਿ ਜਦੋਂ ਸੋਲਰ ਸਿਸਟਮਾਂ ਦੀਆਂ ਤਾਰਾਂ ਪੁੱਟ ਲਈਆਂ ਜਾਂਦੀਆਂ ਹਨ, ਤਾਂ ਪੂਰਾ ਸਿਸਟਮ ਨਿਕੰਮਾ ਹੋ ਜਾਂਦਾ ਹੈ | ਕਿਸਾਨਾਂ ਮੁਤਾਬਕ ਫੱਤਾਕੇਰਾ ਦੇ ਖੇਤਾਂ ਵਿਚੋਂ ਲਗਪਗ 15 ਖੇਤੀ ਮੋਟਰਾਂ ਅਤੇ ਹਾਕੂਵਾਲਾ ਵਿਚੋਂ ਵੀ ਦਰਜਨ ਭਰ ਮੋਟਰਾਂ ਚੋਰੀ ਹੋ ਚੁੱਕੀਆਂ ਹਨ | ਥਾਣਾ ਕਿੱਲਿਆਂਵਾਲੀ (ਆਰਜੀ) ਦੇ ਮੁਖੀ ਜਗਸੀਰ ਸਿੰਘ ਨੇ ਦੱਸਿਆ ਕਿ ਜੀਵਨਜੋਤ ਸਿੰਘ ਵਾਸੀ ਫੱਤਾਕੇਰਾ ਦੀ ਸ਼ਿਕਾਇਤ 'ਤੇ ਦਰਜ ਮਾਮਲੇ ਵਿਚ ਗਿ੍ਫ਼ਤਾਰ ਕੀਤੇ ਗਏ ਪਿਉ-ਪੁੱਤ ਨੇ ਦਰਜਨ ਭਰ ਮੋਟਰਾਂ ਦੀ ਚੋਰੀ ਕਬੂਲ ਕੀਤੀ ਹੈ | ਉਨ੍ਹਾਂ ਕਿਹਾ ਕਿ ਰਿਮਾਂਡ ਦੌਰਾਨ ਕਬਾੜੀਏ ਪਾਲਾ ਸਿੰਘ ਤੋਂ ਹੋਰ ਬਰਾਮਦਗੀਆਂ ਦੀ ਸੰਭਾਵਨਾ ਹੈ |
