ਵਾਰਡ ਨੰ. 19 ਦੀ ਚੌੜੀ ਗਲੀ ਦੇ ਲੋਕਾਂ ਨੂੰ ਮਿਲੇਗੀ ਨਿਕਾਸੀ ਤੋਂ ਰਾਹਤ

ਬੁਢਲਾਡਾ, 18 ਜੂਨ (ਸੁਨੀਲ ਮਨਚੰਦਾ)- ਸਥਾਨਕ ਨਗਰ ਕੌਂਸਲ ਚੋਣਾਂ ਤੋਂ ਬਾਅਦ ਜੇਤੂ ਕੌਂਸਲਰ ਨੇ ਆਪਣੇ-ਆਪਣੇ ਵਾਰਡਾਂ ‘ਚ ਵਿਕਾਸ ਤਰੱਕੀ ਅਤੇ ਸਫ਼ਾਈ ਲਈ ਵਿਸ਼ੇਸ਼ ਧਿਆਨ ਦੇਣਾ ਸ਼ੁਰੂ ਕਰ ਦਿੱਤਾ ਹੈ। ਨਵੇਂ ਚੁਣੇ ਗਏ ਕੌਂਸਲਰਾਂ ਨੂੰ ਕੌਂਸਲਰ ਬਣਨ ਦਾ ਹੌਸਲਾ ਕਾਰਨ ਵਾਰਡ ‘ਚ ਖ਼ੁਦ ਦਿਲਚਸਪੀ ਲੈ ਰਹੇ ਹਨ। ਸ਼ਹਿਰ ਦੇ 19 ਵਾਰਡਾਂ ‘ਚੋਂ ਅੱਗਰਵਾਲ ਸਮਾਜ ਦੇ ਇਕੋ ਇਕ ਕੌਂਸਲਰ ਵਨੀਤ ਜਿੰਦਲ ਅੱਜ-ਕੱਲ੍ਹ ਸਵੇਰ ਸਮੇਂ ਹੀ ਵਾਰਡ ਦੀਆਂ ਨਾਲੀਆਂ ਨਿਕਾਸੀ ਲਈ ਸਫ਼ਾਈ ਸੇਵਕਾਂ ਨਾਲ ਖ਼ੁਦ ਵਾਰਡ ਦੀ ਨਿਗਰਾਨੀ ਕਰਦੇ ਨਜ਼ਰ ਆ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਵਾਰਡ ਨੰ. 14 ਦੇ ਵਿਕਾਸ ਤਰੱਕੀ ਅਤੇ ਖ਼ੁਸ਼ਹਾਲੀ ਲਈ ਜੀ ਜਾਨ ਲਗਾ ਦੇਣਗੇ। ਉਨ੍ਹਾਂ ਵਾਰਡ ਵਾਸੀਆਂ ਨੂੰ ਅਪੀਲ ਕੀਤੀ ਕਿ ਉਹ ਪਲਾਸਟਿਕ ਦੇ ਲਿਫ਼ਾਫ਼ੇ ਸੁੱਟਣ ਦੀ ਬਜਾਏ ਘਰ ਅੰਦਰ ਕੂੜੇਦਾਨਾਂ ‘ਚ ਪਾਉਣ। ਉਨ੍ਹਾਂ ਕਿਹਾ ਕਿ ਵਾਰਡ ‘ਚ ਨਿਕਾਸੀ ਲਈ ਵੱਡੀਆਂ ਪਾਈਪਾਂ ਦਾ ਪ੍ਰਬੰਧ ਵੀ ਕੀਤਾ ਜਾ ਚੁੱਕਾ ਹੈ, ਜਿਸ ਦਾ ਕਾਰਜ ਵੱਡੀ ਪੱਧਰ ‘ਤੇ ਚੌੜੀ ਗਲੀ ਤੋਂ ਰੇਲਵੇ ਸਟੇਸ਼ਨ ਤੱਕ 16 ਇੰਚੀ ਪਾਈਪਾਂ ਪਾਉਣ ਦਾ ਕੰਮ ਚੱਲ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਸਮੇਂ ‘ਚ ਚੌੜੀ ਗਲੀ ਵਿਚ ਹੁਣ ਪਾਣੀ ਨਹੀਂ ਖੜ੍ਹੇਗਾ। ਇਹ ਪਹਿਲੀ ਵਾਰੀ ਹੋਵੇਗਾ ਕਿ ਚੌੜੀ ਗਲੀ ਜੋ ਹਰ ਸਾਲ ਮੌਨਸੂਨ ਦੇ ਦਿਨਾਂ ‘ਚ ਹੜ੍ਹ ਦਾ ਰੂਪ ਧਾਰਨ ਕਰ ਲੈਂਦੀ ਸੀ, ਜੋ ਇਸ ਵਾਰ ਨਹੀਂ ਹੋਵੇਗਾ। ਉਨ੍ਹਾਂ ਨਾਲ ਆਸ਼ੂ ਸਿੰਗਲਾ, ਇੰਦਰਾਜ ਬਾਂਸਲ ਆਦਿ ਹਾਜ਼ਰ ਸਨ।