ਭੀਖੀ ਨਹਿਰ ’ਚ ਦੁਬਾਰਾ ਪਏ ਪਾੜ ਨੂੰ ਪੂਰਨ ਤੇ ਮੁਰੰਮਤ ਦਾ ਕੰਮ ਜਾਰੀ ਨਹਿਰ ਟੁੱਟਣ ਕਾਰਨ ਜ਼ਿਲ੍ਹੇ ਦੇ 150 ਪਿੰਡ ਹੋਏ ਪ੍ਰਭਾਵਿਤ ਸੋਮਵਾਰ ਤੱਕ ਬਹਾਲ ਹੋ ਜਾਵੇਗੀ ਪਾਣੀ ਦੀ ਸਪਲਾਈ-ਕਾਰਜਕਾਰੀ ਇੰਜੀਨੀਅਰ

ਅ

ਅਜੀਤ ਡੈਸਕ 20-06-2026

ਭੀਖੀ, 19 ਜੂਨ (ਬਲਕਾਰ ਸਿੰਘ ਸਹੋਤਾ)- ਭੀਖੀ ਡਿਸਟ੍ਰੀਬਿਊਟਰੀ ਵਿਚ ਕੱਲ੍ਹ ਦੁਪਹਿਰ ਬਾਅਦ ਦੁਬਾਰਾ ਪਏ ਪਾੜ ਨੂੰ ਪੂਰਨ ਅਤੇ ਮੁਰੰਮਤ ਲਈ ਬੇਸ਼ੱਕ ਸਿੰਚਾਈ ਵਿਭਾਗ ਬੀਤੀ ਕੱਲ੍ਹ ਤੋਂ ਹੀ ਕਾਰਜਸ਼ੀਲ ਹੈ, ਪਰ 4 ਦਿਨਾਂ ਵਿਚ ਇਕੋ ਥਾਂ ਤੋਂ 2 ਵਾਰ ਟੁੱਟੀ ਨਹਿਰ ਨੇ ਲੋਕਾਂ ਵਿਚ ਵਿਭਾਗ ਦੀ ਕਾਰਜਕਾਰੀ ਨੂੰ ਇਕੱਲਾ ਲਾਪਰਵਾਹੀ ਹੀ ਨਹੀਂ ਮੰਨਿਆ ਬਲਕਿ ਜ਼ਿੰਮੇਵਾਰ ਵਿਭਾਗਾਂ ਖਿਲਾਫ ਬਣਦੀ ਕਾਰਵਾਈ ਦੀ ਵੀ ਮੰਗ ਕਰ ਰਹੇ ਹਨ। ਨੇੜਲੇ ਪਿੰਡ ਸਮਾ�ਂ ਦੇ ਸਾਈਫ਼ਨ ਪੁਲ ਕੋਲ ਮੁੜ ਨਹਿਰ ਤੋੜ ਕੇ ਸਹੋਕੇ ਡਰੇਨ ‘ਚ ਪਾਣੀ ਪਾਇਆ ਗਿਆ ਤਾਂ ਜਾ ਕੇ ਕਿਤੇ ਪਾੜ ਵਾਲੀ ਥਾਂ ‘ਤੇ ਪਾਣੀ ਦੀ ਸਪਲਾਈ ਰੁਕੀ। ਦੱਸਣਯੋਗ ਇਹ ਵੀ ਹੈ ਕਿ ਨਿਰਮਾਣ ਅਧੀਨ ਪੁਲ ਕੋਲੋਂ ਜਿੱਥੇ ਪਾੜ ਪਿਆ ਉੱਥੇ ਪਾੜ ਪੈਣ ਦੀ ਇਕ ਵਜ੍ਹਾ ਤਾਂ ਇਹ ਵੀ ਸੀ ਕਿ ਨਗਰ ਪੰਚਾਇਤ ਵਲੋਂ ਨਹਿਰ ਹੇਠੋਂ ਜ਼ਮੀਨਦੋਜ਼ ਗੰਦੇ ਪਾਣੀ ਦੀ ਨਿਕਾਸੀ ਲਈ ਪਾਈਪਲਾਈਨ ਪਾਉਣਾ, ਦੇ ਨਾਲ ਹੀ ਇਸੇ ਥਾਂ ‘ਤੇ ਇਕ ਅੰਗਰੇਜ਼ਾਂ ਦੇ ਸਮੇਂ ਦੇ ਪੁਲ ਦਾ ਢਾਂਚਾ ਵੀ ਮੌਜੂਦ ਸੀ, ਜਿਸ ਕਾਰਨ ਉਸ ਢਾਂਚੇ ਦੇ ਨੇੜਲੇ ਥਾਂ ‘ਤੇ ਮਿੱਟੀ ਦੀ ਦਬਾਈ ਸੰਭਵ ਨਹੀ ਸੀ ਅਤੇ ਉਸੇ ਜਗ੍ਹਾ ਤੋਂ ਮੁੜ ਪਾੜ ਪੈ ਗਿਆ। ਸਿੰਚਾਈ ਵਿਭਾਗ ਵਲੋਂ ਜਿੱਥੇ ਬੜੀ ਮਸ਼ੱਕਤ ਨਾਲ ਇਹ ਢਾਂਚਾ ਤੋੜਿਆ ਗਿਆ ਉੱਥੇ ਕਿਸੇ ਵੀ ਤਰ੍ਹਾਂ ਦੇ ਸੰਭਾਵੀ ਪਾੜ ਨੂੰ ਰੋਕਣ ਲਈ ਨਹਿਰ ਦੇ ਬੈੱਡ ‘ਤੇ ਕੰਕਰੀਟ ਦੀ ਸਲੈਬ ਵੀ ਪਾਈ ਜਾ ਰਹੀ ਹੈ। ਇਸ ਮੌਕੇ ਕਾਰਜਕਾਰੀ ਇੰਜੀਨੀਅਰ ਗੁਰਸਾਗਰ ਸਿੰਘ ਚਹਿਲ ਨੇ ਦੱਸਿਆ ਕਿ ਇਸ ਡਿਸਟ੍ਰੀਬਿਊਟਰੀ ਦੀ ਸਮਰੱਥਾ 500 ਕਿਊਸਕ ਦੀ ਹੈ ਅਤੇ ਬੀਤੇ ਦਿਨੀਂ ਜ਼ਿਆਦਾ ਮਿਕਦਾਰ ‘ਚ ਪਾਣੀ ਦੀ ਸਪਲਾਈ ਕਾਰਨ ਲਾਇਨਿੰਗ ਬੈਠ ਗਈ ਅਤੇ ਇਸ ਦੇ ਪੱਕੇ ਹੱਲ ਲਈ ਨਹਿਰ ਦੇ ਬੈੱਡ ‘ਚ 20 ਗੁਣਾ 40 ਖੇਤਰ ਦੀ ਇਕ ਸਰੀਏ ਵਾਲੀ ਸਲੈਬ ਪਾਈ ਜਾਵੇਗੀ ਤਾਂ ਜੋ ਇੱਥੇ ਮੁੜ ਪਾੜ ਨਾ ਪਵੇ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਵਿਭਾਗ ਨੇ ਇਸ ਥਾਂ ‘ਤੇ ਇਕ ਅੰਗਰੇਜ਼ਾਂ ਦੇ ਸਮੇਂ ਦੇ ਪੁਰਾਤਨ ਪੁਲ ਦਾ ਢਾਂਚਾ ਸੀ, ਉਹ ਵੀ ਪਾੜ ਦਾ ਕਾਰਨ ਬਣਿਆ, ਨੂੰ ਵੀ ਸਖ਼ਤ ਮਿਹਨਤ ਨਾਲ ਤੋੜਿਆ ਗਿਆ ਹੈ। ਉਨ੍ਹਾਂ ਜਾਣਕਾਰੀ ਦਿੱਤੀ ਕਿ ਕੁਝ ਦਿਨਾਂ ਤੱਕ ਪਾਣੀ ਦੀ ਸਪਲਾਈ ਬਹਾਲ ਹੋਵੇਗੀ ਅਤੇ ਇਸ ਵਾਰ ਸਪਲਾਈ 50-50 ਕਿਊਸਕ ਵਿਚ ਛੱਡੀ ਜਾਵੇਗੀ ਅਤੇ ਇਸ ਪਾੜ ‘ਤੇ 150 ਕਿਊਸਕ ਪਾਰ ਹੋਣ ਤੱਕ ਵਿਭਾਗ ਪੂਰਨ ਨਿਗਰਾਨੀ ਰੱਖੇਗਾ ਅਤੇ ਨਾਲ ਹੀ ਨਿਰਮਾਣ ਅਧੀਨ ਪੁਲ ਦੀ ਸਮਰੱਥਾ ਨੂੰ ਬਰਕਰਾਰ ਰੱਖਣ ਲਈ ਇਸ ਦੀ ਮਜ਼ਬੂਤੀ ਲਈ ਬਕਾਇਦਾ ਵਿਸ਼ੇਸ਼ ਡਰਾਇੰਗ ‘ਤੇ ਕੰਮ ਕਰਾਂਗੇ। ਉਨ੍ਹਾਂ ਕਿਸਾਨਾਂ ਨੂੰ ਅਪੀਲ ਕੀਤੀ ਕਿ ਉਹ ਕੁਝ ਦਿਨਾਂ ਲਈ ਆਪਣਾ ਸੰਯਮ ਬਣਾਈ ਰੱਖਣ ਅਤੇ ਵਿਭਾਗ ਦਾ ਸਾਥ ਦੇਣ।
ਨਹਿਰ ਟੁੱਟਣ ਕਾਰਨ ਮਾਨਸਾ ਜ਼ਿਲ੍ਹੇ ਦੇ 150 ਪਿੰਡ ਪ੍ਰਭਾਵਿਤ
ਭੀਖੀ ਡਿਸਟ੍ਰੀਬਿਊਟਰੀ ਦੀ ਜਲ ਸਪਲਾਈ 22 ਮਈ ਤੋਂ ਬੰਦ ਸੀ ਅਤੇ 12 ਜੂਨ ਨੂੰ ਇਸ ‘ਚ ਜਦੋਂ ਪਾਣੀ ਛੱਡਿਆ ਗਿਆ ਤਾਂ ਅਗਲੇ ਦਿਨ ਨਹਿਰ ਵਿਚ ਪਾੜ ਪੈਣ ਕਾਰਨ ਸਪਲਾਈ ਮੁੜ ਠੱਪ ਹੋ ਗਈ, ਜੋ ਹੁਣ ਤੱਕ ਨਿਰੰਤਰ ਬੰਦ ਹੈ। ਇਹ ਨਹਿਰ ਜ਼ਿਲ੍ਹੇ ਦੇ 150 ਦੇ ਕਰੀਬ ਪਿੰਡਾਂ ਦੇ ਕਿਸਾਨਾਂ ਦੀ ਲਾਇਫਲਾਇਨ ਕਹੀ ਜਾ ਸਕਦੀ ਹੈ। ਇਸ ਨਹਿਰ ਦੇ ਪਾਣੀ ਨੂੰ ਸਿੰਚਾਈ ਤੋਂ ਇਲਾਵਾ ਦਰਜਨਾਂ ਪਿੰਡਾਂ ਵਿਚ ਵਾਟਰ ਵਰਕਸ ਰਾਹੀਂ ਪੀਣ ਵਾਲੇ ਪਾਣੀ ਲਈ ਵੀ ਵਰਤਿਆ ਜਾਂਦਾ ਹੈ। ਜ਼ਿਲ੍ਹੇ ਵਿਚ 9 ਜੂਨ ਤੋਂ ਝੋਨੇ ਦੀ ਲਵਾਈ ਸ਼ੁਰੂ ਹੈ ਪ੍ਰੰਤੂ ਇਹ ਨਹਿਰ ਟੁੱਟਣ ਦਾ ਖ਼ਮਿਆਜ਼ਾ ਜਿੱਥੇ ਸਿੱਧੇ ਤੌਰ ‘ਤੇ ਭੀਖੀ ਦੇ ਕਿਸਾਨਾਂ ਨੇ ਝੱਲਿਆ ਉੱਥੇ 150 ਦੇ ਕਰੀਨ ਪਿੰਡ ਵੀ ਪ੍ਰਭਾਵਿਤ ਹੋਏ ਹਨ। ਇਸ ਤੋਂ ਇਲਾਵਾ ਇਸ ਨਹਿਰ ਦਾ ਪਾਣੀ ਮਾਨਸਾ ਦੇ ਵਾਟਰ ਵਰਕਸ ਲਈ ਵੀ ਵਰਤਿਆ ਜਾਂਦਾ ਹੈ ਉੱਥੇ ਵੀ ਦਿੱਕਤ ਖੜੀ ਹੋਈ ਹੈ।
ਨਹਿਰ ਦੀ ਮੁਰੰਮਤ ਦਾ ਕੰਮ ਜੰਗੀ ਪੱਧਰ ‘ਤੇ ਜਾਰੀ- ਚੁਸਪਿੰਦਰਬੀਰ ਸਿੰਘ ਚਹਿਲ
ਜ਼ਿਲ੍ਹਾ ਪ੍ਰੀਸ਼ਦ ਮਾਨਸਾ ਦੇ ਚੇਅਰਮੈਨ ਚੁਸਪਿੰਦਰਬੀਰ ਸਿੰਘ ਚਹਿਲ ਵਲੋਂ ਨਹਿਰ ‘ਤੇ ਪਏ ਪਾੜ ਦਾ ਜਾਇਜ਼ਾ ਲੈਣ ਉਪਰੰਤ ਜਿੱਥੇ ਵਿਭਾਗੀ ਅਧਿਕਾਰੀਆਂ ਨਾਲ ਗੱਲਬਾਤ ਕੀਤੀ ਉੱਥੇ ਪ੍ਰਭਾਵਿਤ ਕਿਸਾਨਾਂ ਅਤੇ ਪਿੰਡ ਦੇ ਮੋਹਤਬਰਾਂ ਨਾਲ ਵਿਚਾਰ ਵਟਾਂਦਰਾ ਕਰਦਿਆਂ ਕਿਹਾ ਕਿ ਸਰਕਾਰ ਲੋਕ ਹਿਤ ਲਈ ਪ੍ਰਤੀਬੱਧ ਹੈ, ਜਿੱਥੇ ਇਸ ਪਾੜ ਨੂੰ ਪੂਰਨ ਦਾ ਕੰਮ ਜੰਗੀ ਪੱਧਰ ‘ਤੇ ਜਾਰੀ ਹੈ ਉੱਥੇ ਪ੍ਰਭਾਵਿਤ ਕਿਸਾਨਾਂ ਦੇ ਹੋਏ ਵਿੱਤੀ ਨੁਕਸਾਨ ਨੂੰ ਪੂਰਿਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਇਹ ਸਾਰਾ ਮਾਮਲਾ ਉਹ ਜ਼ਿਲ੍ਹਾ ਪ੍ਰਸ਼ਾਸਨ ਨਾਲ ਵਿਚਾਰਨਗੇ ਤਾਂ ਜੋ ਹਰ ਤਰਾਂ ਦੇ ਨੁਕਸਾਨ ਦੀ ਪੂਰਤੀ ਕੀਤੀ ਜਾ ਸਕੇ। ਉਨ੍ਹਾਂ ਨਾਲ ਆਪ ਆਗੂ ਕੁਲਵੰਤ ਸਿੰਘ, ਰਜਨੀਸ਼ ਸ਼ਰਮਾ, ਬਲਰਾਜ ਬਾਂਸਲ, ਸੁਰਿੰਦਰ ਸਿੰਘ ਹੀਰੋਂ ਕਲਾਂ ਆਦਿ ਹਾਜ਼ਰ ਸਨ।

ਸੰਬੰਧਿਤ ਖ਼ਬਰਾਂ