ਗ੍ਰਾਮ ਸਭਾਵਾਂ ਦੇ ਮੈਂਬਰਾਂ ਨੇ ਡੀ.ਸੀ. ਨੂੰ ਮੰਗ ਪੱਤਰ ਦਿੱਤਾ

ਮਾਨਸਾ, 25 ਜੂਨ (ਸ.ਰਿ.)- ਪਿੰਡ ਮੋਫਰ ਅਤੇ ਉੱਡਤ ਭਗਤ ਰਾਮ ਦੀ ਗ੍ਰਾਮ ਸਭਾ ਦੇ ਮੈਂਬਰਾਂ ਵਲੋਂ ਐਨ. ਐਸ. ਡਬਲਯੂ. ਐਸ. ਵਿਦਿਆਰਥੀ ਜਥੇਬੰਦੀ ਦੇ ਸੂਬਾ ਪ੍ਰਧਾਨ ਇੰਜ: ਰਜਿੰਦਰ ਸਿੰਘ ਮੌੜ ਤੇ ਸੂਬਾ ਆਗੂ ਰਾਮ ਸਿੰਘ ਮੋਫਰ ‘ਤੇ ਦਰਜ ਮੁਕੱਦਮੇ ਨੂੰ ਰੱਦ ਕਰਵਾਉਣ ਲਈ ਨਵਜੋਤ ਕੌਰ ਡਿਪਟੀ ਕਮਿਸ਼ਨਰ ਮਾਨਸਾ ਨੂੰ ਮੰਗ ਪੱਤਰ ਦਿੱਤਾ ਗਿਆ। ਉਨ੍ਹਾਂ ਦੱਸਿਆ ਕਿ ਹੱਕੀ ਮੰਗਾਂ ਨੂੰ ਲੈ ਕੇ 13 ਜੂਨ ਤੋਂ ਜ਼ਿਲ੍ਹਾ ਪ੍ਰੀਸ਼ਦ ਦਫ਼ਤਰ ਬਠਿੰਡਾ ਅੱਗੇ ‘ਲੋਕ ਹਿਤ ਸੰਘਰਸ਼ ਪੱਕੇ ਮੋਰਚੇ’ ‘ਤੇ ਬੈਠੇ ਵਿਦਿਆਰਥੀ ਜਥੇਬੰਦੀ ਆਗੂਆਂ ‘ਤੇ ਨਜਾਇਜ਼ ਪਰਚੇ ਦਰਜ ਕਰਨਾ ਕਾਨੂੰਨ ਅਤੇ ਸੰਵਿਧਾਨ ਦੀ ਤੌਹੀਨ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਪ੍ਰਸ਼ਾਸਨ ਨੇ ਪਰਚਾ ਰੱਦ ਨਾ ਕੀਤਾ ਅਤੇ ਧਰਨਾਕਾਰੀਆਂ ਨੂੰ ਸ਼ਾਂਤਮਈ ਧਰਨੇ ‘ਚ ਕਿਸੇ ਕਿਸਮ ਦੀ ਪ੍ਰੇਸ਼ਾਨੀ ਦਿੱਤੀ ਗਈ ਤਾਂ ਸੰਘਰਸ਼ ਤਿੱਖਾ ਕੀਤਾ ਜਾਵੇਗਾ । ਇਸ ਮੌਕੇ ਐਡਵੋਕੇਟ ਸੁਰੇਸ਼ ਕੁਮਾਰ, ਰਾਮ ਸਿੰਘ, ਰੂਪ ਸਿੰਘ, ਜਸਵੰਤ ਕੌਰ ਮੋਫਰ, ਬੱਬੂ ਕੌਰ, ਬੂਟਾ ਸਿੰਘ, ਬਾਦਲ ਸਿੰਘ, ਸ਼ਿੰਦੂ ਸਿੰਘ, ਪਰਮਜੀਤ ਸਿੰਘ ਉੱਡਤ ਭਗਤ ਰਾਮ ਆਦਿ ਹਾਜ਼ਰ ਸਨ ।