ਵੇਦਾਂਤਾ ਪਾਵਰ ਦੀ ਪਹਿਲੀ ਤਿਮਾਹੀ ਦੌਰਾਨ ਬਿਜਲੀ ਵਿੱਕਰੀ 38 ਫ਼ੀਸਦੀ ਵਧੀ

 ਮਾਨਸਾ, 6 ਜੁਲਾਈ (ਬਲਵਿੰਦਰ ਸਿੰਘ ਧਾਲੀਵਾਲ)- ਵੇਦਾਂਤਾ ਪਾਵਰ ਨੇ ਚਾਲੂ ਸਾਲ ਦੀ ਪਹਿਲੀ ਤਿਮਾਹੀ ਅਪ੍ਰੈਲ ਤੋਂ ਜੂਨ ਦੌਰਾਨ ਮਜ਼ਬੂਤ ਸੰਚਾਲਨ ਪ੍ਰਦਰਸ਼ਨ ਦਰਜ ਕਰਦਿਆਂ ਬਿਜਲੀ ਵਿੱਕਰੀ ’ਚ ਸਾਲਾਨਾ ਆਧਾਰ ’ਤੇ ਕੁੱਲ 38 ਫ਼ੀਸਦੀ ਵਾਧਾ ਕੀਤਾ ਹੈ ਅਤੇ ਕੰਪਨੀ ਨੇ ਇਸ ਦੌਰਾਨ 5 ਹਜ਼ਾਰ 225 ਮਿਲੀਅਨ ਯੂਨਿਟ ਬਿਜਲੀ ਦੀ ਵਿੱਕਰੀ ਕੀਤੀ। ਇਹ ਵਾਧਾ ਮੁੱਖ ਤੌਰ ’ਤੇ ਮੀਨਾਕਸ਼ੀ ਐਨਰਜੀ ਦੇ ਬਿਹਤਰ ਉਤਪਾਦਨ ਅਤੇ ਤਲਵੰਡੀ ਸਾਬੋ ਥਰਮਲ ਪਲਾਂਟ ਬਣਾਂਵਾਲਾ ਦੀ ਸੰਚਾਲਕੀ ਕੁਸ਼ਲਤਾ ’ਚ ਸੁਧਾਰ ਕਾਰਨ ਸੰਭਵ ਹੋਇਆ ਹੈ। ਜ਼ਿਲੇ੍ਹ ਦੇ ਪਿੰਡ ਬਣਾਂਵਾਲਾ ਵਿਖੇ ਸਥਾਪਿਤ ਤਾਪ ਘਰ ਦੇ ਬੁਲਾਰੇ ਨੇ ਦੱਸਿਆ ਕਿ ਮੀਨਾਕਸ਼ੀ ਐਨਰਜੀ ਨੇ 1 ਹਜ਼ਾਰ 350 ਮਿਲੀਅਨ ਯੂਨਿਟ ਬਿਜਲੀ ਵਿੱਕਰੀ ਨਾਲ ਸਾਲਾਨਾ ਆਧਾਰ ’ਤੇ 245 ਫ਼ੀਸਦੀ ਅਤੇ ਤਲਵੰਡੀ ਸਾਬੋ ਪਲਾਂਟ ਨੇ ਪਹਿਲੀ ਤਿਮਾਹੀ ਦੌਰਾਨ 2 ਹਜ਼ਾਰ 723 ਮਿਲੀਅਨ ਯੂਨਿਟ ਬਿਜਲੀ ਵਿੱਕਰੀ ਕੀਤੀ ਹੈ। ਪਲਾਂਟ ਦਾ ਅਵੇਲੇਬਿਲਟੀ ਫੈਕਟਰ 77 ਫ਼ੀਸਦੀ ਤੋਂ ਵੱਧ ਕੇ 86 ਫ਼ੀਸਦੀ ਹੋ ਗਿਆ ਹੈ ਜੋ ਪੰਜਾਬ ਸਰਕਾਰ ਨਾਲ ਹੋਏ ਬਿਜਲੀ ਖ਼ਰੀਦ ਸਮਝੌਤੇ (ਪੀ.ਪੀ.ਏ.) ਤਹਿਤ ਨਿਰਧਾਰਿਤ 80 ਫ਼ੀਸਦੀ ਦੇ ਮਾਪਦੰਡ ਤੋਂ ਉੱਪਰ ਹੈ। ਬੁਲਾਰੇ ਅਨੁਸਾਰ ਝਾਰਸੁਗੁਡਾ ਥਰਮਲ ਪਲਾਂਟ ਨੇ 93 ਫ਼ੀਸਦੀ ਪਲਾਂਟ ਅਵੇਲੇਬਿਲਟੀ ਨਾਲ 687 ਮਿਲੀਅਨ ਯੂਨਿਟ ਬਿਜਲੀ ਦੀ ਵਿੱਕਰੀ ਕੀਤੀ। ਸ਼ਕਤੀ ਥਰਮਲ ਪਲਾਂਟ ’ਚ ਅਪ੍ਰੈਲ ਮਹੀਨੇ ਦੌਰਾਨ ਵਾਪਰੀ ਬਾਇਲਰ ਘਟਨਾ ਕਾਰਨ ਉਤਪਾਦਨ ਪ੍ਰਭਾਵਿਤ ਰਿਹਾ ਅਤੇ ਇਸ ਪਲਾਂਟ ਤੋਂ 465 ਮਿਲੀਅਨ ਯੂਨਿਟ ਬਿਜਲੀ ਵਿੱਕਰੀ ਦਰਜ ਕੀਤੀ ਗਈ।