ਪੀ.ਟੀ. ਊਸ਼ਾ ਵਲੋਂ ਬੀ.ਐਫ.ਆਈ. ਚੋਣਾਂ 'ਚ ਦੇਰੀ ਦਾ ਪਤਾ ਲਗਾਉਣ ਲਈ ਕਮੇਟੀ ਦਾ ਗਠਨ

ਨਵੀਂ ਦਿੱਲੀ, 13 ਜੁਲਾਈ (ਪੀ.ਟੀ.ਆਈ.)-ਇੰਡੀਅਨ ਓਲੰਪਿਕ ਐਸੋਸੀਏਸ਼ਨ (ਆਈ. ਓ. ਏ.) ਦੇ ਪ੍ਰਧਾਨ ਪੀਟੀ ਊਸ਼ਾ ਨੇ ਬਾਕਸਿੰਗ ਫੈਡਰੇਸ਼ਨ ਆਫ਼ ਇੰਡੀਆ (ਬੀ. ਐਫ. ਆਈ.) ਦੀਆਂ ਚੋਣਾਂ 'ਚ ਦੇਰੀ ਦੇ ਕਾਰਨਾਂ ਦਾ ਪਤਾ ਲਗਾਉਣ ਅਤੇ ਨਿਰਪੱਖ ਤੇ ਸਮੇਂ ਸਿਰ ਚੋਣਾਂ ਨੂੰ ਯਕੀਨੀ ਬਣਾਉਣ ਲਈ ਇਕ ਰੋਡਮੈਪ ਦੀ ਸਿਫ਼ਾਰਸ਼ ਕਰਨ ਲਈ 3 ਮੈਂਬਰੀ 'ਤੱਥ ਖੋਜ' ਕਮੇਟੀ ਦਾ ਗਠਨ ਕੀਤਾ ਹੈ | ਸ਼ੁੱਕਰਵਾਰ ਨੂੰ ਗਠਿਤ ਇਸ ਕਮੇਟੀ ਦੀ ਅਗਵਾਈ ਆਈ.ਓ.ਏ. ਦੇ ਖਜ਼ਾਨਚੀ ਸਹਿਦੇਵ ਯਾਦਵ ਕਰਨਗੇ, ਜਦੋਂ ਕਿ ਆਈ.ਓ.ਏ. ਕਾਰਜਕਾਰੀ ਕੌਂਸਲ ਦੇ ਮੈਂਬਰ ਭੂਪੇਂਦਰ ਸਿੰਘ ਬਾਜਵਾ ਤੇ ਵਕੀਲ ਪਾਇਲ ਕਾਕੜਾ ਇਸ ਦੇ ਮੈਂਬਰ ਹਨ | 11 ਜੁਲਾਈ ਦੇ ਆਈ.ਓ.ਏ. ਦੇ ਦਫ਼ਤਰੀ ਹੁਕਮ 'ਚ ਊਸ਼ਾ ਨੇ ਕਿਹਾ ਕਿ ਬੀ.ਐਫ.ਆਈ. ਦੀ ਮੌਜੂਦਾ ਕਾਰਜਕਾਰੀ ਕਮੇਟੀ ਦਾ ਕਾਰਜਕਾਲ 2 ਫਰਵਰੀ ਨੂੰ ਖਤਮ ਹੋ ਗਿਆ ਸੀ ਤੇ ਉਦੋਂ ਤੋਂ ਕੋਈ ਨਵੀਂ ਚੋਣ ਨਹੀਂ ਹੋਈ ਹੈ | ਹੁਕਮ 'ਚ ਕਿਹਾ ਗਿਆ ਕਿ ਇਹ ਕਮੇਟੀ ਬੀ.ਐਫ.ਆਈ. ਦੀ ਮੌਜੂਦਾ ਕਾਨੂੰਨੀ ਤੇ ਪ੍ਰਸ਼ਾਸਕੀ ਸਥਿਤੀ ਦੀ ਜਾਂਚ ਕਰੇਗੀ ਤੇ ਭਾਰਤ 'ਚ ਮੁੱਕੇਬਾਜ਼ੀ ਦੇ ਸੰਚਾਲਨ ਅਤੇ ਕੰਮਕਾਜ 'ਤੇ ਦੇਰੀ ਦੇ ਪ੍ਰਭਾਵਾਂ ਦਾ ਮੁਲਾਂਕਣ ਕਰੇਗੀ | ਇਹ ਕਮੇਟੀ ਵਿਸ਼ਵ ਮੁੱਕੇਬਾਜ਼ੀ ਨਾਲ ਗੱਲਬਾਤ ਸਮੇਤ ਜ਼ਰੂਰੀ ਕਾਰਵਾਈ ਦੀ ਸਿਫ਼ਾਰਸ਼ ਕਰੇਗੀ ਅਤੇ ਨਿਰਪੱਖ ਅਤੇ ਸਮੇਂ ਸਿਰ ਚੋਣਾਂ ਕਰਵਾਉਣ ਲਈ ਇਕ ਸਪੱਸ਼ਟ ਰੋਡਮੈਪ ਸੁਝਾਏਗੀ |