ਬਿਆਸ ਦਰਿਆ ਵਿਚ ਪਾਣੀ ਦਾ ਪੱਧਰ ਪਹਿਲਾਂ ਨਾਲੋਂ ਘਟਿਆ

ਬਿਆਸ, 26 ਅਗਸਤ (ਪਰਮਜੀਤ ਸਿੰਘ ਰੱਖੜਾ)- ਪਹਾੜੀ ਇਲਾਕਿਆਂ ਵਿਚ ਲਗਾਤਾਰ ਹੋ ਰਹੀ ਬਾਰਿਸ਼ ਕਾਰਨ ਬਿਆਸ ਦਰਿਆ ਵਿਚ ਪਾਣੀ ਦਾ ਪੱਧਰ ਲਗਾਤਾਰ ਵੱਧਦਾ ਜਾ ਰਿਹਾ ਸੀ, ਜਿਸ ਕਰਕੇ ਬਿਆਸ ਦਰਿਆ ਨਾਲ ਲਗਦੇ ਮੰਡ‌ ਖੇਤਰ ਵਿਚ ਪਾਣੀ ਦਾ ਕਾਫ਼ੀ ਪ੍ਰਕੋਪ ਦੇਖਣ ਨੂੰ ਮਿਲਿਆ। ਇਸ ਨਾਲ ਸਾਰੇ ਵਿਭਾਗਾਂ ਦੇ ਪ੍ਰਸ਼ਾਸਨਿਕ ਅਧਿਕਾਰੀ ਵੀ ਪੱਬਾਂ ਭਾਰ ਹੋਏ ਹਨ ਅਤੇ ਲੋਕਾਂ ਦੇ ਜਾਨ ਮਾਲ ਦੀ ਰੱਖਿਆ ਲਈ ਲੋੜੀਂਦੇ ਪ੍ਰਬੰਧ ਕੀਤੇ ਜਾ ਰਹੇ ਹਨ। ਇਸ ਮੌਕੇ ਇਰੀਗੇਸ਼ਨ ਵਿਭਾਗ ਦੇ ਅਧਿਕਾਰੀਆਂ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਹੈ ਕਿ ਇਸ ਸਮੇਂ ਬਿਆਸ ਦਰਿਆ ਵਿਚ 741.70 ਦੀ ਗੇਜ ਨਾਲ ਡਿਸਚਾਰਜ 157698 ਕਿਊਸਿਕ ’ਤੇ ਆ ਗਿਆ ਹੈ, ਜੋ ਕਿ ਕੱਲ ਨਾਲੋਂ ਘੱਟ ਹੈ। ਜੇਕਰ ਕੱਲ੍ਹ ਰਾਤ 8 ਵਜੇ ਦੀ ਗੱਲ ਕਰੀਏ ਤਾਂ ਬਿਆਸ ਦਰਿਆ ਵਿਚ ਪਾਣੀ ਦਾ ਪੱਧਰ 742.00 ਜਿਸ ਦਾ ਡਿਸਚਾਰਜ 167900 ਬਣਦਾ ਹੈ, ਇਸ ਸੀਜ਼ਨ ਦਾ ਸਭ ਨਾਲੋਂ ਉੱਚਤਮ ਪੱਧਰ ਸੀ।