ਏ.ਆਈ.171 ਜਹਾਜ਼ ਹਾਦਸੇ ਦੀ ਜਾਂਚ ਮਿਹਨਤ ਤੇ ਪੇਸ਼ੇਵਰਤਾ ਨਾਲ ਜਾਰੀ-ਨਾਇਡੂ

ਨਵੀਂ ਦਿੱਲੀ, 12 ਜੂਨ (ਪੀ.ਟੀ.ਆਈ.)-ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਕੇ. ਰਾਮਮੋਹਨ ਨਾਇਡੂ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਪਿਛਲੇ ਸਾਲ ਦੇ ਏ.ਆਈ.171 ਜਹਾਜ਼ ਹਾਦਸੇ ਦੀ ਜਾਂਚ ਸਥਾਪਿਤ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਪ੍ਰਕਿਰਿਆਵਾਂ ਅਨੁਸਾਰ ਪੂਰੀ ਮਿਹਨਤ ਅਤੇ ਪੇਸ਼ੇਵਰਤਾ ਨਾਲ ਜਾਰੀ ਹੈ। 260 ਲੋਕਾਂ ਦੀ ਮੌਤ ਵਾਲੇ ਘਾਤਕ ਏਅਰ ਇੰਡੀਆ ਡ੍ਰੀਮਲਾਈਨਰ ਹਾਦਸੇ ਦੀ ਪਹਿਲੀ ਵਰ੍ਹੇਗੰਢ 'ਤੇ, ਨਾਇਡੂ ਨੇ ਕਿਹਾ, 'ਅਸੀਂ ਹਾਦਸੇ ਦੇ ਕਾਰਨਾਂ ਦਾ ਪੂਰੀ ਤਰ੍ਹਾਂ ਅਤੇ ਨਿਰਪੱਖਤਾ ਨਾਲ ਪਤਾ ਲਗਾਉਣ ਅਤੇ ਹਵਾਬਾਜ਼ੀ ਸੁਰੱਖਿਆ ਨੂੰ ਹੋਰ ਬਿਹਤਰ ਬਣਾਉਣ ਲਈ ਵਚਨਬੱਧ ਹਾਂ।' ਉਨ੍ਹਾਂ ਦੀਆਂ ਟਿੱਪਣੀਆਂ ਉਮੀਦਾਂ ਦੇ ਵਿਚਕਾਰ ਆਈਆਂ ਹਨ ਕਿ ਏਅਰਕ੍ਰਾਫਟ ਐਕਸੀਡੈਂਟ ਇਨਵੈਸਟੀਗੇਸ਼ਨ ਬਿਊਰੋ (ਏ ਏ ਆਈ ਬੀ) ਹਾਦਸੇ ਦੀ ਜਾਂਚ 'ਤੇ ਇੱਕ ਅੰਤਰਿਮ ਅਪਡੇਟ ਜਾਰੀ ਕਰ ਸਕਦਾ ਹੈ। ਏਅਰ ਇੰਡੀਆ ਦਾ ਬੋਇੰਗ 787-8 ਜਾਂ ਡ੍ਰੀਮਲਾਈਨਰ (ਰਜਿਸਟ੍ਰੇਸ਼ਨ ਵੀ ਟੀ-ਏ ਐੱਨ ਬੀ) 12 ਜੂਨ, 2025 ਨੂੰ ਲੰਡਨ ਗੈਟਵਿਕ ਲਈ ਜਾ ਰਿਹਾ ਸੀ, ਜਿਸ ਵਿੱਚ ਸਵਾਰ 241 ਲੋਕ ਅਤੇ ਜ਼ਮੀਨ 'ਤੇ 19 ਲੋਕ ਮਾਰੇ ਗਏ ਸਨ। ਉਡਾਣ ਭਰਨ ਦੇ ਸ਼ੁਰੂਆਤੀ ਪੜਾਅ ਦੌਰਾਨ ਹੋਈ ਇਸ ਦੁਰਘਟਨਾ 'ਚ ਇਕ ਯਾਤਰੀ ਬਚ ਗਿਆ, ਜਦੋਂ ਕਿ ਸਾਰੇ 12 ਚਾਲਕ ਦਲ ਦੇ ਮੈਂਬਰ ਵੀ ਮਾਰੇ ਗਏ ਸਨ। ਹਾਦਸੇ ਵਿੱਚ ਮਾਰੇ ਗਏ ਯਾਤਰੀ ਭਾਰਤ, ਯੂ.ਕੇ., ਪੁਰਤਗਾਲ ਅਤੇ ਕੈਨੇਡਾ ਦੇ ਨਾਗਰਿਕ ਸਨ।