ਨਾਗੋਯਾ, 23 ਸਤੰਬਰ (ਏਜੰਸੀ)- ਏਸ਼ਿਆਈ ਖੇਡਾਂ ’ਚ ਭਾਰਤੀ ਪੁਰਸ਼ ਅਤੇ ਮਹਿਲਾ ਨਿਸ਼ਾਨੇਬਾਜ਼ (ਸਕੀਟ ਸ਼ੂਟਿੰਗ) ਟੀਮਾਂ ਨੇ ਕਾਂਸੀ ਦੇ ਤਗਮੇ ਜਿੱਤੇ, ਪਰ ਵਿਅਕਤੀਗਤ ਮੁਕਾਬਲਿਆਂ ਵਿਚ ਉਹ ਤਗਮਾ ਜਿੱਤਣ ਤੋਂ ਖੁੰਝ ਗਈਆਂ ਕਿਉਂਕਿ ਫਾਈਨਲ ਵਿਚ ਪਹੁੰਚੇ ਤਿੰਨ ਖਿਡਾਰੀਆਂ ਵਿਚੋਂ ਦੋ ਚੌਥੇ ਸਥਾਨ ’ਤੇ ਰਹੇ। ਭਾਰਤੀ ਮਹਿਲਾ ਸਕੀਟ ਟੀਮ ਨੇ ਇਤਿਹਾਸਿਕ ਉਪਲੱਬਧੀ ਹਾਸਿਲ ਕਰਦੇ ਹੋਏ ਕਾਂਸੀ ਦਾ ਤਗਮਾ ਆਪਣੇ ਨਾਂਅ ਕੀਤਾ।
ਰਾਈਜ਼ਾ ਢਿੱਲੋਂ, ਮਹੇਸ਼ਵਰੀ ਚੌਹਾਨ ਤੇ ਪਰਿਨਾਜ਼ ਧਾਲੀਵਾਲ ਦੇ ਤਿਕੜੀ ਨੇ ਮਹਿਲਾ ਟੀਮ ਮੁਕਾਬਲੇ ’ਚ ਭਾਰਤ ਨੂੰ ਪਹਿਲੀ ਵਾਰ ਤਗਮਾ ਦਿਵਾਇਆ। ਚੀਨ ਨੇ ਸੋਨ ਤੇ ਕਜ਼ਾਕਿਸਤਾਨ ਨੇ ਚਾਂਦੀ ਦਾ ਤਗਮਾ ਜਿੱਤਿਆ। ਰਾਈਜ਼ਾ ਅਤੇ ਪਰਿਨਾਜ਼ ਨੇ ਵੀ ਵਿਅਕਤੀਗਤ ਫਾਈਨਲ ਵਿਚ ਜਗ੍ਹਾ ਬਣਾਈ, ਪਰ ਉਹ ਕੋਈ ਤਗਮਾ ਜਿੱਤਣ ਵਿਚ ਕਾਮਯਾਬ ਨਹੀਂ ਹੋ ਸਕੀਆਂ। ਜਿੱਥੇ ਰਾਈਜ਼ਾ 23 ਦੇ ਸਕੋਰ ਨਾਲ ਚੌਥੇ ਸਥਾਨ ’ਤੇ ਰਹੀ, ਉੱਥੇ ਹੀ ਪਰਿਨਾਜ਼ ਕੁੱਲ 8 ਅੰਕਾਂ ਨਾਲ ਸਭ ਤੋਂ ਹੇਠਲੇ ਸਥਾਨ ’ਤੇ ਰਹੀ।
ਪੁਰਸ਼ਾਂ ਦੇ ਮੁਕਾਬਲੇ ਵਿਚ ਅਨੰਤਜੀਤ ਸਿੰਘ ਨਾਰੂਕਾ (119), ਮਿਰਾਜ਼ ਅਹਿਮਦ ਖਾਨ (116) ਅਤੇ ਭਾਵਤੇਗ ਸਿੰਘ ਗਿੱਲ (111) ਨੇ ਕੁੱਲ 346 ਅੰਕਾਂ ਨਾਲ ਪੁਰਸ਼ ਟੀਮ ਲਈ ਕਾਂਸੀ ਦਾ ਤਗਮਾ ਜਿੱਤਿਆ। ਏਸ਼ੀਅਨ ਚੈਂਪੀਅਨਸ਼ਿਪ ਸੋਨ ਤਗਮਾ ਜੇਤੂ ਅਨੰਤਜੀਤ ਜੋ ਖੇਡਾਂ ਦੇ ਪਿਛਲੇ ਸੰਸਕਰਣ ਵਿਚ ਚਾਂਦੀ ਦਾ ਤਗਮਾ ਜੇਤੂ ਵੀ ਰਿਹਾ ਸੀ, ਨੇ ਵਿਅਕਤੀਗਤ ਫਾਈਨਲ ਲਈ ਤਾਂ ਕੁਆਲੀਫਾਈ ਕਰ ਲਿਆ ਪਰ ਕੋਈ ਤਗਮਾ ਨਹੀਂ ਜਿੱਤ ਸਕਿਆ।
