ਸ੍ਰੀਨਗਰ, 19 ਦਸੰਬਰ (ਪੀ. ਟੀ. ਆਈ.)-ਪੀ. ਡੀ. ਪੀ. ਆਗੂ ਇਲਤਿਜਾ ਮੁਫ਼ਤੀ ਨੇ ਬਿਹਾਰ ਦੇ ਮੁੱਖ ਮੰਤਰੀ ਨਿਤਿਸ਼ ਕੁਮਾਰ ਦੇ ਵਿਰੁੱਧ ਹਾਲ ਹੀ ਵਿਚ ਇਕ ਔਰਤ ਡਾਕਟਰ ਦੇ ਚਿਹਰੇ ਤੋਂ ਨਕਾਬ ਖਿੱਚਣ ਦੇ ਲਈ ਐੱਫ. ਆਰ. ਆਈ. ਦਰਜ ਕਰਨ ਦੀ ਮੰਗ ਕਰਦੇ ਹੋਏ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ | ਬੇਸ਼ੱਕ, ਪੁਲਿਸ ਵਲੋਂ ਇਸ ਬਾਰੇ 'ਚ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ ਕਿ ਜੇ.ਡੀ.ਯੂ ਮੁਖੀ ਦੇ ਵਿਰੁੱਧ ਐੱਫ.ਆਈ.ਆਰ ਦਰਜ ਕੀਤੀ ਗਈ ਹੈ ਜਾਂ ਨਹੀਂ | ਮੁਫ਼ਤੀ ਨੇ ਕੋਠੀਬਾਗ ਐੱਸ.ਐੱਚ.ਓ ਨੂੰ ਦਿੱਤੀ ਆਪਣੀ ਸ਼ਿਕਾਇਤ 'ਚ ਕਿਹਾ ਹੈ ਕਿ ਮੈਂ ਤੁਹਾਡਾ ਧਿਆਨ ਇਕ ਅਜਿਹੀ ਘਿਣੌਨੀ ਘਟਨਾ ਵੱਲ ਦਿਵਾਉਣਾ ਚਾਹੁੰਦੀ ਹਾਂ ਜਿਸ ਵਿਚ ਮੁਸਲਮਾਨਾਂ, ਖ਼ਾਸ ਕਰਕੇ ਔਰਤਾਂ ਨੂੰ ਬਹੁਤ ਤਕਲੀਫ਼ ਹੋਈ ਹੈ | ਮੁਫ਼ਤੀ ਨੇ ਦੋਸ਼ ਲਗਾਇਆ ਕਿ ਜ਼ਬਰਦਸਤੀ 'ਨਕਾਬ' ਲਾਹੁਣਾ ਸਿਰਫ਼ ਇਕ ਮੁਸਲਮਾਨ ਔਰਤ 'ਤੇ ਨਹੀਂ ਸਗੋਂ ਹਰ ਭਾਰਤੀ ਔਰਤ ਦੀ ਆਜ਼ਾਦੀ, ਪਛਾਣ ਅਤੇ ਇੱਜ਼ਤ 'ਤੇ ਵੀ ਬੇਰਹਿਮ ਹਮਲਾ ਸੀ |
