ਢਾਕਾ, 21 ਦਸੰਬਰ (ਪੀ. ਟੀ. ਆਈ.)-ਭਾਰਤ ਨੇ ਐਤਵਾਰ ਨੂੰ ਬੰਗਲਾਦੇਸ਼ ਦੇ ਦੱਖਣ-ਪੂਰਬੀ ਬੰਦਰਗਾਹ ਸ਼ਹਿਰ ਚਿਟਗਾਉਂ 'ਚ ਭਾਰਤੀ ਵੀਜ਼ਾ ਅਰਜ਼ੀ ਕੇਂਦਰ 'ਚ ਵੀਜ਼ਾ ਸੰਚਾਲਨ ਨੂੰ ਅਗਲੇ ਆਦੇਸ਼ ਤੱਕ ਮੁਅੱਤਲ ਕਰ ਦਿੱਤਾ ਹੈ, ਸਥਾਨਕ ਮੀਡੀਆ ਨੇ ਦੱਸਿਆ ਕਿ ਉੱਘੇ ਨੌਜਵਾਨ ਆਗੂ ਸ਼ਰੀਫ ਉਸਮਾਨ ਹਾਦੀ ਦੀ ਮੌਤ ਤੋਂ ਬਆਦ ਵਧੇ ਤਣਾਅ ਦੇ ਕਾਰਨ ਇਹ ਕਦਮ ਚੁੱਕਿਆ ਗਿਆ ਹੈ | ਹਾਦੀ, ਪਿਛਲੇ ਸਾਲ ਵਿਦਿਆਰਥੀ-ਅਗਵਾਈ ਵਾਲੇ ਵਿਰੋਧੀ ਪ੍ਰਦਰਸ਼ਨ ਦੇ ਪ੍ਰਮੁੱਖ ਆਗੂ ਸਨ, ਜਿਸ ਦੇ ਕਾਰਨ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੀ ਅਗਵਾਈ ਵਾਲੀ ਅਵਾਮੀ ਲੀਗ ਸਰਕਾਰ ਨੂੰ ਸੱਤਾ ਤੋਂ ਲਾਂਭੇ ਕਰ ਦਿੱਤਾ ਗਿਆ ਸੀ ਅਤੇ ਉਹ 12 ਫਰਵਰੀ ਨੂੰ ਹੋਣ ਵਾਲੀਆਂ ਆਮ ਚੋਣਾਂ ਦੇ ਲਈ ਉਮੀਦਵਾਰ ਸਨ | ਉਨ੍ਹਾਂ ਨੂੰ 12 ਦਸੰਬਰ ਨੂੰ ਕੇਂਦਰੀ ਢਾਕਾ ਦੇ ਬਿਜੋਇਨਗਰ ਇਲਾਕੇ 'ਚ ਇਕ ਚੋਣ ਮੁਹਿੰਮ ਦੇ ਦੌਰਾਨ ਨਕਾਬਪੋਸ਼ ਬੰਦੂਕਧਾਰੀਆਂ ਨੇ ਸਿਰ 'ਚ ਗੋਲੀ ਮਾਰ ਦਿੱਤੀ ਸੀ | ਵੀਰਵਾਰ ਨੂੰ ਸਿੰਗਾਪੁਰ 'ਚ ਇਲਾਜ ਦੇ ਦੌਰਾਨ ਉਨ੍ਹਾਂ ਦੀ ਮੌਤ ਹੋ ਗਈ ਸੀ | ਉਨ੍ਹਾਂ ਦੀ ਮੌਤ ਦੇ ਬਾਅਦ ਪੂਰੇ ਬੰਗਲਾਦੇਸ਼ 'ਚ ਹਮਲੇ ਅਤੇ ਭੰਨਤੋੜ ਹੋਈ, ਜਿਸ ਵਿਚ ਵੀਰਵਾਰ ਨੂੰ ਚਿਟਾਗਾਉਂ 'ਚ ਭਾਰਤੀ ਸਹਾਇਕ ਹਾਈ ਕਮਿਸ਼ਨਰ ਦੀ ਰਿਹਾਇਸ਼ 'ਤੇ ਪੱਥਰ ਮਾਰਨੇ ਵੀ ਸ਼ਾਮਿਲ ਹੈ | ਇੱਕ ਸੰਖੇਪ ਬਿਆਨ ਵਿੱਚ, ਆਈ ਵੀ ਏ ਸੀ ਨੇ ਕਿਹਾ ਕਿ ਭਾਰਤ ਦੇ ਸਹਾਇਕ ਹਾਈ ਕਮਿਸ਼ਨ (ਏ. ਐੱਚ. ਸੀ. ਆਈ.) ਚਿਟਾਗਾਉਂ 'ਚ ਹਾਲ ਹੀ 'ਚ ਵਾਪਰੀ ਸੁਰੱਖਿਆ ਘਟਨਾ ਕਾਰਨ, ਆਈ. ਵੀ. ਏ. ਸੀ. ਚਿਟਾਗਾਉਂ ਵਿਖੇ ਭਾਰਤੀ ਵੀਜ਼ਾ ਕਾਰਜ 21/12/2025 ਤੋਂ ਅਗਲੇ ਆਦੇਸ਼ ਤੱਕ ਮੁਅੱਤਲ ਰਹਿਣਗੇ | ਵੀਜ਼ਾ ਕੇਂਦਰ ਨੂੰ ਦੁਬਾਰਾ ਖੋਲ੍ਹਣ ਬਾਰੇ ਐਲਾਨ ਸਥਿਤੀ ਦੀ ਸਮੀਖਿਆ ਕਰਨ ਤੋਂ ਬਾਅਦ ਕੀਤਾ ਜਾਵੇਗਾ |
