ਹੁਸ਼ਿਆਰਪੁਰ, 27 ਦਸੰਬਰ (ਬਲਜਿੰਦਰਪਾਲ ਸਿੰਘ)-ਡੀ.ਏ.ਵੀ. ਕਾਲਜ ਹੁਸ਼ਿਆਰਪੁਰ ਦੇ ਸਾਬਕਾ ਪਿ੍ੰ. ਤੇ ਪ੍ਰਬੰਧਕ ਕਮੇਟੀ ਦੇ ਸਕੱਤਰ ਸਵ. ਡੀ. ਐਲ. ਆਨੰਦ ਦੀ ਬਰਸੀ ਮੌਕੇ ਉਨ੍ਹਾਂ ਦੀ ਪਤਨੀ ਸ਼ਸ਼ੀ ਬਾਲਾ ਆਨੰਦ ਨੇ 1 ਲੱਖ ਦੀ ਸਹਿਯੋਗ ਰਾਸ਼ੀ ਦਾ ਚੈੱਕ ਪਿ੍ੰ. ਡਾ. ਵਿਨੇ ਕੁਮਾਰ ਨੂੰ ਸੌਂਪਦੇ ਹੋਏ ਇੱਛਾ ਪ੍ਰਗਟ ਕੀਤੀ ਕਿ ਹਰ ਸਾਲ ਇਸ ਰਾਸ਼ੀ ਦਾ ਸਾਲਾਨਾ ਵਿਆਜ ਸੰਸਥਾ ਦੇ ਅਰਥ ਸ਼ਾਸਤਰ ਦੇ ਹੋਣਹਾਰ ਵਿਦਿਆਰਥੀ ਨੂੰ ਵਜ਼ੀਫ਼ੇ ਦੇ ਰੂਪ ਵਿਚ ਦਿੱਤਾ ਜਾਵੇ | ਇਸ ਮੌਕੇ ਉਨ੍ਹਾਂ ਦੀਆਂ ਪੁੱਤਰੀਆਂ ਪ੍ਰੀਤੀ ਸ਼ਰਮਾ ਤੇ ਰੰਜਨਾ ਵੀ ਹਾਜ਼ਰ ਸਨ | ਪਿ੍ੰ. ਵਿਨੇ ਕੁਮਾਰ ਨੇ ਡੀ.ਐਲ. ਆਨੰਦ ਨੂੰ ਸ਼ਰਧਾਂਜਲੀ ਦਿੰਦਿਆਂ ਪਿ੍ੰ. ਡੀ.ਐਲ. ਆਨੰਦ ਮੈਮੋਰੀਅਲ ਸਕਾਲਰਸ਼ਿਪ ਲਈ ਦਿੱਤੀ ਸਹਿਯੋਗ ਰਾਸ਼ੀ ਲਈ ਪਰਿਵਾਰਿਕ ਮੈਂਬਰਾਂ ਦਾ ਧੰਨਵਾਦ ਕਰਦਿਆਂ ਦੱਸਿਆ ਕਿ ਡੀ.ਐਲ. ਆਨੰਦ ਨੇ ਜਿੱਥੇ ਇਕ ਸਿਖਸ਼ਕ ਦੇ ਤੌਰ 'ਤੇ ਵਿਦਿਆਰਥੀਆਂ ਦਾ ਇਕਨੋਮੀਕਸ ਵਿਸ਼ੇ ਪ੍ਰਤੀ ਰੁਝਾਨ ਵਧਾਇਆ ਉੱਥੇ 1990 ਤੋਂ 1999 ਤੱਕ ਸੰਸਥਾ ਦੇ ਪਿ੍ੰਸੀਪਲ ਵਜੋਂ ਸੇਵਾਵਾਂ ਦਿੱਤੀਆਂ | ਡਾ. ਅਨੂਪ ਕੁਮਾਰ, ਆਰ.ਐਮ. ਭਲਾ ਅਤੇ ਕਾਲਜ ਪ੍ਰਬੰਧਕ ਕਮੇਟੀ ਦੇ ਮੈਂਬਰਾਂ ਨੇ ਇਸ ਸਹਿਯੋਗ ਰਾਸ਼ੀ ਲਈ ਧੰਨਵਾਦ ਕੀਤਾ |
