ਜਗਰਾਉਂ, 24 ਦਸੰਬਰ (ਗੁਰਦੀਪ ਸਿੰਘ ਮਲਕ)-ਜਗਰਾਉਂ ਸ਼ਹਿਰ ਇਸ ਮੌਕੇ ਚੋਰਾਂ ਦਾ ਗੜ੍ਹ ਬਣ ਚੁੱਕਾ ਹੈ, ਰੋਜ਼ਾਨਾ ਲੋਕਾਂ ਦੇ ਮੋਟਰਸਾਈਕਲ ਚੋਰੀ ਹੋ ਰਹੇ ਹਨ | ਇੰਨ੍ਹਾਂ ਚੋਰਾਂ ਨੂੰ ਪੁਲਿਸ ਤੋਂ ਆਸ ਛੱਡਕੇ ਪੀੜ੍ਹਤਾਂ ਨੂੰ ਆਪ ਚੋਰਾਂ ਨੂੰ ਕਾਬੂ ਕਰਨਾ ਪੈ ਰਿਹਾ ਹੈ | ਇਸ ਤਰ੍ਹਾਂ ਦੀ ਵਾਰਦਾਤ ਅੱਜ ਜਗਰਾਉਂ ਸ਼ਹਿਰ ਵਿਚ ਵਾਪਰੀ | ਜਗਰਾਉਂ ਸ਼ਹਿਰ ਦੇ ਵਸਨੀਕ ਸਿਵ ਕੁਮਾਰ ਦਾ ਇਕ ਨੌਜਵਾਨ ਚੋਰ ਦੁਕਾਨ ਦੇ ਅੱਗੋਂ ਮੋਟਰਸਾਈਕਲ ਚੋਰੀ ਕਰਕੇ ਭੱਜ ਗਿਆ | ਜਿਸ ਨੂੰ ਨੌਜਵਾਨਾਂ ਨੇ ਪਿਛਾ ਕਰਕੇ ਸ਼ਹਿਰ ਦੇ ਡਿਸਪੋਜ਼ਲ ਰੋਡ 'ਤੇ ਕਾਬੂ ਕਰ ਲਿਆ | ਜਿਥੇ ਲੋਕਾਂ ਵਲੋਂ ਚੋਰ ਦਾ ਜੰਮ ਕੇ ਕੁਟਾਪਾ ਕੀਤਾ ਗਿਆ | ਇਸ ਦੌਰਾਨ ਜਦੋਂ ਮੋਟਰਸਾਈਕਲ ਮਾਲਕ ਸਿਵ ਕੁਮਾਰ ਵਲੋਂ ਪੁਲਿਸ ਨੂੰ ਬੁਲਾਇਆ ਗਿਆ ਤਾਂ ਉਸ ਵਕਤ ਉਹ ਚੋਰ ਭੀੜ ਵਿਚੋਂ ਨਿਕਲ ਕੇ ਫ਼ਰਾਰ ਹੋ ਗਿਆ | ਜਿਸਨੂੰ ਸਿਟੀ ਪੁਲਿਸ ਦੇ ਕਰਮਚਾਰੀ ਗਲੀਆਂ ਵਿਚ ਲੱਭਦੇ ਰਹੇ, ਪਰ ਚੋਰ ਪੁਲਿਸ ਅਤੇ ਲੋਕਾਂ ਦੇ ਹੱਥ ਮੁੜ ਨਹੀਂ ਆਇਆ |
