ਬੰਗਾ, 3 ਸਤੰਬਰ (ਸੁਰਿੰਦਰ ਸਿੰਘ ਕਰਮ ਲਧਾਣਾ)-ਸ਼ਹੀਦ ਭਗਤ ਸਿੰਘ ਸੋਸ਼ਲ ਵੈਲਫੇਅਰ ਐਂਡ ਕਲਚਰਲ ਸੁਸਾਇਟੀ ਪੰਜਾਬ ਦੇ ਪ੍ਰਧਾਨ ਅਮਰਜੀਤ ਸਿੰਘ ਕਰਨਾਣਾ ਨੇ ਪੰਜਾਬ ਸਰਕਾਰ ਤੋਂ ਜੋਰਦਾਰ ਮੰਗ ਕੀਤੀ ਹੈ ਕਿ ਲਗਾਤਾਰ ਪੈ ਰਹੇ ਮੀਂਹ ਦੇ ਕਾਰਨ ਜੋ ਲੋਕਾਂ ਦੇ ਘਰਾਂ-ਮਕਾਨਾਂ ਅਤੇ ਕੱਚੇ-ਕੋਠਿਆਂ ਦਾ ਨੁਕਸਾਨ ਹੋਇਆ ਹੈ ਦਾ ਸਰਕਾਰ ਬਣਦਾ ਮੁਆਵਜਾ ਤੁਰੰਤ ਦੇਵੇ | ਉਨ੍ਹਾਂ ਅੱਗੇ ਕਿਹਾ ਕਿਹਾ ਕਿ ਲਗਾਤਾਰ ਮੀਂਹ ਪੈਣ ਕਾਰਨ ਜਿਥੇ ਘਰਾਂ ਦੀਆਂ ਛੱਤਾਂ ਚੋਅ ਰਹੀਆਂ ਹਨ ਉੱਥੇ ਕਈਆਂ ਘਰਾਂ ਦੀਆਂ ਕੰਧਾਂ ਨੂੰ ਵੀ ਤਰੇੜਾਂ ਪੈ ਗਈਆਂ ਹਨ | ਉਹਨਾਂ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਕਿ ਜਿਹਨਾਂ ਬੰਦਿਆਂ ਦੇ ਮਕਾਨ ਚੋਅ ਰਹੇ ਹਨ, ਕੰਧਾਂ ਨੂੰ ਤਰੇੜਾਂ ਆ ਗਈਆਂ ਹਨ ਨੂੰ ਮਕਾਨ ਬਣਾਉਣ ਲਈ, ਰਿਪੇਅਰ ਕਰਨ ਹਿਤ ਬਣਦਾ ਮੁਆਵਜਾ ਅਦਾ ਕੀਤਾ ਜਾਵੇ, ਇਹ ਸਰਕਾਰ ਦਾ ਨੈਤਿਕ ਫਰਜ਼ ਬਣਦਾ ਹੈ | ਉਹਨਾਂ ਕਿਹਾ ਕਿ ਜੋ ਸੈਂਟਰ ਵੱਲੋਂ ਵੀ ਹੜਾਂ ਦੇ ਲਈ ਪੈਸਾ ਆਇਆ ਹੈ ਉਹ ਵੀ ਗਰੀਬ ਲੋਕਾਂ ਨੂੰ ਘਰ ਬਣਾਉਣ ਲਈ ਦਿੱਤਾ ਜਾਵੇ | ਤਾਂ ਜੋ ਆਉਣ ਵਾਲੇ ਸਮੇਂ ਵਿੱਚ ਗਰੀਬ ਲੋਕ ਪਰੇਸ਼ਾਨ ਨਾ ਹੋਣ | ਲਗਾਤਾਰ ਮੀਂਹ ਪੈਣ ਕਾਰਨ ਜੋ ਹੜ੍ਹਾਂ ਦਾ ਲੋਕ ਸੰਤਾਪ ਭੋਗ ਹੀ ਰਹੇ ਹਨ ਤੋਂ ਉਹਨਾਂ ਨੂੰ ਰਾਹਤ ਦਿਵਾਉਣ ਲਈ ਹਰ ਸੰਭਵ ਮਦਦ ਲੋਕਾਂ ਤੱਕ ਤੁਰੰਤ ਪੁੱਜਦੀ ਕੀਤੀ ਜਾਵੇ | ਗਰੀਬੀ ਦੀ ਪੱਧਰ ਹੇਠ ਵਾਲੇ ਲੋਕਾਂ ਦੀ ਤੁਰੰਤ ਮਦਦ ਕਰਨ ਵਿਚ ਦੇਰੀ ਨਾ ਕੀਤੀ ਜਾਵੇ | ਸਮਾਜ ਸੇਵੀ ਕਰਨਾਣਾ ਨੇ ਆਪਣੇ ਸਾਥੀਆਂ ਸਮੇਤ ਜਿਲ੍ਹੇ ਦੇ ਹੜ੍ਹ ਪ੍ਰਭਾਵਿਤ ਪਿੰਡਾਂ ਦਾ ਦੌਰਾ ਕੀਤਾ | ਉਹਨਾਂ ਮੀਂਹ ਕਾਰਨ ਨੁਕਸਾਨੇ ਮਕਾਨਾਂ ਦੀਆਂ ਤਸਵੀਰਾਂ ਵੀ ਦਿਖਾਈਆਂ |
