ਕਾਠਗੜ੍ਹ, 4 ਸਤੰਬਰ (ਹਰਸਿਮਰਨ ਜੋਤ ਸਿੰਘ ਕਲੇਰ)-ਨਿਰਮਲ ਸਿੰਘ ਰਿਆਤ ਚਾਂਸਲਰ ਲੈਮਰਿਨ ਟੈੱਕ ਸਕਿੱਲਜ਼ ਯੂਨੀਵਰਸਿਟੀ ਪੰਜਾਬ (ਐਲ. ਟੀ. ਐਸ. ਯੂ.) ਦੀ ਅਗਵਾਈ ਹੇਠ ਖੇਤਰ ਨੂੰ ਪ੍ਰਭਾਵਿਤ ਕਰਨ ਵਾਲੀ ਹਾਲੀਆ ਹੜ੍ਹ ਸਥਿਤੀ ਦੇ ਜਵਾਬ ਵਿਚ ਯੂਨੀਵਰਸਿਟੀ ਦੀ ਐਨ. ਐਸ. ਐਸ. ਯੂਨਿਟ ਨੇ ਇਕ ਸਮਰਪਿਤ ਬਚਾਅ ਤੇ ਰਾਹਤ ਕਾਰਜ ਚਲਾਇਆ | ਇਹ ਬਚਾਅ ਕਾਰਜ ਯੁਵਕ ਸੇਵਾਵਾਂ ਦੀ ਸਹਾਇਕ ਨਿਰਦੇਸ਼ਕ-ਕਮ-ਐਨ. ਐਸ. ਐਸ. ਕੋਆਰਡੀਨੇਟਰ ਲੈਮਰਿਨ ਟੈਕ ਸਕਿਲਜ਼ ਯੂਨੀਵਰਸਿਟੀ ਪੰਜਾਬ ਸ੍ਰੀਮਤੀ ਰਤਨ ਕੌਰ ਦੀ ਨਿਗਰਾਨੀ ਹੇਠ ਕੀਤਾ | ਰਾਹਤ ਕਾਰਜਾਂ ਦਾ ਕੇਂਦਰ ਪਿੰਡ ਖੱਡ ਬਠਲੋਰ ਸੀ, ਜੋ ਕਿ ਸਥਾਨਕ ਖੱਡ ਵਿਚ ਭਾਰੀ ਪਾਣੀ ਦੇ ਵਹਾਅ ਕਾਰਨ ਸਭ ਤੋਂ ਵੱਧ ਪ੍ਰਭਾਵਿਤ ਖੇਤਰਾਂ ਵਿਚੋਂ ਇਕ ਸੀ | ਐਨ. ਐਸ. ਐਸ. ਵਲੰਟੀਅਰਾਂ ਨੇ ਪ੍ਰਭਾਵਿਤ ਪਿੰਡ ਵਾਸੀਆਂ ਨਾਲ ਸਰਗਰਮੀ ਨਾਲ ਕੰਮ ਕੀਤਾ, ਨੁਕਸਾਨ ਦੀ ਹੱਦ ਦਾ ਮੁਲਾਂਕਣ ਕੀਤਾ ਤੇ ਤੁਰੰਤ ਸਹਾਇਤਾ ਪ੍ਰਦਾਨ ਕੀਤੀ | ਸਮੇਂ ਸਿਰ ਸਿਹਤ ਸੰਭਾਲ ਸਹਾਇਤਾ ਯਕੀਨੀ ਬਣਾਉਣ ਲਈ ਪਰਿਵਾਰਾਂ ਵਿਚ ਮੈਡੀਕਲ ਕਿੱਟਾਂ ਵੰਡੀਆਂ ਗਈਆਂ | ਰੋਕਥਾਮ ਦੇ ਯਤਨਾਂ ਵਿਚ, ਪਿੰਡ ਵਾਸੀਆਂ ਦੇ ਸਹਿਯੋਗ ਨਾਲ, ਵਲੰਟੀਅਰਾਂ ਨੇ ਪਾਣੀ ਦੇ ਵਹਾਅ ਨੂੰ ਮੋੜਨ ਤੇ ਜਾਨ-ਮਾਲ ਦੇ ਹੋਰ ਨੁਕਸਾਨ ਨੂੰ ਘਟਾਉਣ ਲਈ ਰੇਤ ਤੇ ਪੱਥਰ ਦੀਆਂ ਰੁਕਾਵਟਾਂ ਤਿਆਰ ਕੀਤੀਆਂ | ਟੀਮ ਨੇ ਉਥੇ ਲੋਕਾਂ ਦੀਆਂ ਜ਼ਰੂਰੀ ਜ਼ਰੂਰਤਾਂ ਦਾ ਵੀ ਦਸਤਾਵੇਜ਼ੀਕਰਨ ਕੀਤਾ | ਰਾਹਤ ਟੀਮ ਯੂਨੀਵਰਸਿਟੀ ਬੱਸ ਤੇ ਐਂਬੂਲੈਂਸ ਵਿਚ ਰਵਾਨਾ ਹੋਈ, ਜਿਸ ਨੂੰ ਵਾਈਸ ਚਾਂਸਲਰ, ਪ੍ਰੋਫੈਸਰ (ਡਾ.) ਏ. ਐਸ. ਚਾਵਲਾ ਨੇ ਰਸਮੀ ਤੌਰ 'ਤੇ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ | ਉਨ੍ਹਾਂ ਨਾਲ ਪ੍ਰੋਫੈਸਰ ਬੀ. ਐਸ. ਸਤਿਆਲ (ਰਜਿਸਟਰਾਰ), ਡਾ. ਨਵਨੀਤ ਚੋਪੜਾ (ਡੀਨ ਅਕਾਦਮਿਕ), ਡਾ. ਐਚ. ਪੀ. ਐਸ. ਧਾਮੀ, ਡਾ. ਆਸ਼ੂਤੋਸ਼ ਸ਼ਰਮਾ ਤੇ ਡਾ. ਸ਼ਿਆਮਲ ਕੋਇਲੇ ਸ਼ਾਮਿਲ ਹੋਏ | ਸਥਾਨਕ ਨਿਵਾਸੀਆਂ ਦੁਆਰਾ ਐਨ. ਐਸ. ਐਸ. ਯੂਨਿਟ ਦੇ ਸ਼ਲਾਘਾਯੋਗ ਯਤਨਾਂ ਦੀ ਪ੍ਰਸੰਸਾ ਕੀਤੀ |
