ਫ਼ਤਹਿਗੜ੍ਹ ਸਾਹਿਬ, 2 ਸਤੰਬਰ (ਰਵਿੰਦਰ ਮੌਦਗਿਲ)-ਫ਼ਤਹਿਗੜ੍ਹ ਸਾਹਿਬ ਵਿਖੇ ਸਥਿਤ ਪ੍ਰਸਿੱਧ ਮੁਸਲਿਮ ਤੀਰਥ ਰੋਜ਼ਾ ਸ਼ਰੀਫ਼ ਵਿਖੇ ਮੁੰਬਈ ਤੋਂ ਮੱਥਾ ਟੇਕਣ ਆਏ ਸ਼ਰਧਾਲੂ ਦੀ ਅਚਾਨਕ ਮੌਤ ਹੋ ਗਈ | ਮਿ੍ਤਕ ਦੀ ਪਛਾਣ 61 ਸਾਲਾ ਫ਼ੈਜ਼ ਅਹਿਮਦ ਸ਼ੇਖ਼ ਵਾਸੀ ਮੁੰਬਈ ਵਜੋਂ ਹੋਈ | ਮੁੰਬਈ ਦੇ ਥਾਣੇ ਇਲਾਕੇ ਨਾਲ ਸੰਬੰਧਿਤ ਹਕੀਮ ਅਹਿਮਦ ਅਲੀ ਦੀ ਅਗਵਾਈ ਵਾਲੇ 40 ਦੇ ਕਰੀਬ ਸ਼ਰਧਾਲੂਆਂ ਦੇ ਜਥੇ ਨਾਲ ਆਇਆ ਫ਼ੈਜ਼ ਅਹਿਮਦ ਵੀ ਰੋਜ਼ਾ ਸ਼ਰੀਫ਼ ਵਿਖੇ ਸਿਜਦਾ ਕਰਨ ਪਹੁੰਚਿਆ ਸੀ | ਅੱਜ ਸ਼ਾਮ ਨੂੰ ਫ਼ੈਜ਼ ਅਹਿਮਦ ਸ਼ੇਖ਼ ਸਾਥੀਆਂ ਨਾਲ ਰੋਜ਼ਾ ਸ਼ਰੀਫ਼ ਵਿਖੇ ਇਕ ਦੁਕਾਨ 'ਤੇ ਚਾਹ ਪੀ ਰਿਹਾ ਸੀ | ਜਦੋਂ ਉਹ ਚਾਹ ਦੇ ਪੈਸੇ ਦੇਣ ਲਈ ਉੱਠਿਆ ਤਾਂ ਅਚਾਨਕ ਡਿੱਗ ਪਿਆ | ਇਸ ਮੌਕੇ ਉੱਥੇ ਮੌਜੂਦ ਸਰਹਿੰਦ ਦੇ ਸਾਬਕਾ ਕੌਂਸਲਰ ਦਵਿੰਦਰ ਭੱਟ ਵਲੋਂ ਉਸ ਨੂੰ ਤੁਰੰਤ ਸਥਾਨਕ ਸਿਵਲ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮਿ੍ਤਕ ਐਲਾਨ ਦਿੱਤਾ | ਸੂਚਨਾ ਮਿਲਣ 'ਤੇ ਪੁਲਿਸ ਪਾਰਟੀ ਵੀ ਸਿਵਲ ਹਸਪਤਾਲ ਪਹੁੰਚ ਗਈ | ਫ਼ਿਲਹਾਲ ਲਾਸ਼ ਨੂੰ ਸਿਵਲ ਹਸਪਤਾਲ ਫ਼ਤਹਿਗੜ੍ਹ ਸਾਹਿਬ ਵਿਚ ਹੀ ਰੱਖਿਆ ਗਿਆ ਹੈ |
