ਘੱਲੂਘਾਰਾ ਸਾਹਿਬ, 2 ਸਤੰਬਰ (ਮਿਨਹਾਸ)-ਪਿਛਲੇ ਕੱੁਝ ਦਿਨਾਂ ਤੋਂ ਲਗਾਤਾਰ ਪੈ ਰਹੇ ਮੀਂਹ ਕਾਰਨ ਸਬਜ਼ੀਆਂ ਦੀ ਫ਼ਸਲ ਪ੍ਰਭਾਵਿਤ ਹੋਣ ਕਾਰਨ ਸਬਜ਼ੀਆਂ ਦੇ ਭਾਅ ਅਸਮਾਨੀ ਚੜ੍ਹ ਗਏ ਹਨ, ਜਿਸ ਕਾਰਨ ਗ੍ਰਹਿਣੀਆਂ ਦਾ ਰਸੋਈ ਦਾ ਬਜਟ ਵਿਗੜ ਗਿਆ ਹੈ | ਮੀਂਹ ਕਾਰਨ ਸਬਜ਼ੀਆਂ ਦੀ ਪੈਦਾਵਾਰ ਪ੍ਰਭਾਵਿਤ ਹੋਣ ਕਾਰਨ ਮੰਡੀਆਂ 'ਚ ਸਬਜ਼ੀਆਂ ਦੀ ਆਮਦ ਘੱਟ ਹੋ ਗਈ ਹੈ ਤੇ ਸਬਜ਼ੀਆਂ ਦੇ ਭਾਅ ਤਕਰੀਬਨ ਡੇਢ ਗੁਣਾਂ ਤੇ ਕਈ ਸਬਜ਼ੀਆਂ ਦੇ ਭਾਅ ਤਾਂ ਦੁੱਗਣੇ ਹੋ ਗਏ ਹਨ, ਜਿਸ ਕਾਰਨ ਆਮ ਲੋਕ ਪ੍ਰੇਸ਼ਾਨ ਹਨ | ਮੰਡੀ 'ਚ ਫੁੱਲ ਗੋਭੀ 150-160 ਰੁਪਏ ਪ੍ਰਤੀ, ਕੱਦੂ 60-65 ਰੁਪਏ, ਟਮਾਟਰ ਦਾ ਭਾਅ ਇਕ ਵਾਰ ਮੁੜ ਵਧ ਕੇ 75-80 ਰੁਪਏ, ਕਰੇਲਾ 70-80 ਰੁਪਏ, ਬੈਂਗਣ 70-75 ਰੁਪਏ, ਹਰੀ ਤੋਰੀ 60-65 ਰੁਪਏ, ਮਟਰ 200 ਰੁਪਏ, ਸ਼ਿਮਲਾ ਮਿਰਚ 100-110 ਰੁਪਏ ਤੇ ਭਿੰਡੀ ਵੀ 80-90 ਰੁਪਏ ਪ੍ਰਤੀ ਕਿਲੋ ਵਿਕ ਰਹੀ ਹੈ | ਪਿਆਜ਼ ਅਤੇ ਆਲੂ ਦੀਆਂ ਕੀਮਤਾਂ ਵੀ ਕ੍ਰਮਵਾਰ 30 ਅਤੇ 25 ਰੁਪਏ ਪ੍ਰਤੀ ਕਿਲੋ ਹੋ ਗਈਆਂ ਹਨ | ਕਾਹਨੂੰਵਾਨ ਦੇ ਇਕ ਸਬਜ਼ੀ ਦੁਕਾਨਦਾਰ ਜਸਪਾਲ ਮਸੀਹ ਦਾ ਕਹਿਣਾ ਹੈ ਕਿ ਸਾਡੇ ਕੋਲ ਗਾਹਕ ਵੀ ਹੁਣ ਘੱਟ ਮਾਤਰਾ ਵਿਚ ਸਬਜ਼ੀ ਖ਼ਰੀਦ ਰਹੇ ਹਨ | ਪਹਿਲਾਂ ਲੋਕ ਕਿਲੋ-ਕਿਲੋ ਇਕੱਠੀ ਸਬਜ਼ੀ ਖਰੀਦਦੇ ਸਨ, ਪਰ ਹੁਣ ਉਹ ਪਾਈਆ ਜਾਂ ਅੱਧਾ ਕਿਲੋ 'ਤੇ ਆ ਗਏ ਹਨ, ਕਿਉਂਕਿ ਹਰ ਸਬਜ਼ੀ ਦਾ ਭਾਅ ਦੁੱਗਣਾ ਹੋ ਗਿਆ ਹੈ |
