ਅਬੋਹਰ, 4 ਸਤੰਬਰ (ਤੇਜਿੰਦਰ ਸਿੰਘ ਖ਼ਾਲਸਾ)- ਆਜ਼ਾਦੀ ਘੁਲਾਟੀਏ ਚਾਂਦੀ ਰਾਮ ਵਰਮਾ ਦੀ ਬਰਸੀ 'ਤੇ ਸਵਾਮੀ ਕੇਸ਼ਵਾਨੰਦ ਸਾਹਿੱਤ ਸਦਨ ਵਿਖੇ ਪ੍ਰੋਗਰਾਮ ਦੌਰਾਨ ਸ਼ਹਿਰ ਦੇ ਪਤਵੰਤਿਆਂ ਨੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ | ਇਸ ਮੌਕੇ ਹੜ੍ਹ ਪੀੜਤਾਂ ਦੀ ਸੁਰੱਖਿਆ ਅਤੇ ਕੁਦਰਤੀ ਆਫ਼ਤ ਨਾਲ ਮਰਨ ਵਾਲੇ ਲੋਕਾਂ ਦੀ ਆਤਮਾ ਦੀ ਸ਼ਾਂਤੀ ਲਈ ਅਰਦਾਸ ਵੀ ਕੀਤੀ ਗਈ | ਕਿ੍ਸ਼ਨ ਕਾਂਤ ਪੁਰੋਹਿਤ ਦੀ ਅਗਵਾਈ ਹੇਠ ਹੋਏ ਹਵਨ ਯੱਗ ਵਿਚ ਸਵ.ਵਰਮਾ ਦੇ ਪੜਪੋਤੇ ਸੰਜੀਵ ਵਰਮਾ, ਪਵਨ ਵਰਮਾ, ਸਿੱਧਤ ਵਰਮਾ, ਪੜਪੋਤੀ ਨੈਨਿਕਾ ਵਰਮਾ, ਸਾਹਿੱਤ ਸਦਨ ਦੇ ਮੁਖੀ ਸੂਰਯਾ ਕਾਂਤ ਰਿਣਵਾ, ਸਵਾਮੀ ਕੇਸ਼ਵਾਨੰਦ ਆਯੁਰਵੈਦਿਕ ਹਸਪਤਾਲ ਦੇ ਇੰਚਾਰਜ ਸੰਦੀਪ ਵਾਟਸ, ਲੇਖਕ ਪ੍ਰੀਸ਼ਦ ਦੇ ਮੁਖੀ ਰਾਜ ਸਦੋਸ਼, ਸਿੱਖਿਆ ਸ਼ਾਸਤਰੀ ਸਰੋਜ ਨਾਗਪਾਲ, ਸਾਬਕਾ ਜ਼ਿਲ੍ਹਾ ਸਕਾਊਟ ਟਰੇਨਰ ਦਰਸ਼ਨ ਲਾਲ ਚੁੱਘ ਤੋਂ ਇਲਾਵਾ ਭਾਰਤ ਵਿਕਾਸ ਪ੍ਰੀਸ਼ਦ ਤੇ ਸੇਵਾ ਭਾਰਤੀ ਦੇ ਨੁਮਾਇੰਦੇ ਮੌਜੂਦ ਸਨ | ਮੁੱਖ ਮਹਿਮਾਨ ਨਗਰ ਨਿਗਮ ਦੇ ਮੇਅਰ ਵਿਮਲ ਠੱਠਈ ਨੇ ਚਾਂਦੀ ਰਾਮ ਵਰਮਾ ਦੇ ਜੀਵਨ 'ਤੇ ਚਾਨਣਾ ਪਾਇਆ | ਅਨੁਰਾਗ ਨਾਗਪਾਲ ਨੇ ਆਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ |
