ਪਾਕਿ ਆਪ੍ਰੇਸ਼ਨ ਸੰਧੂਰ 'ਚ ਤਬਾਹ ਹੋਏ ਨੂਰ ਖਾਨ ਏਅਰਬੇਸ ਨੂੰ ਬਣਾ ਰਿਹਾ ਦੁਬਾਰਾ

ਅੰਮਿ੍ਤਸਰ, 4 ਸਤੰਬਰ (ਸੁਰਿੰਦਰ ਕੋਛੜ)-ਭਾਰਤ ਨੇ ਆਪ੍ਰੇਸ਼ਨ ਸੰਧੂਰ ਦੌਰਾਨ 10 ਮਈ ਨੂੰ ਪਾਕਿਸਤਾਨ ਦੇ ਨੂਰ ਖਾਨ ਏਅਰਬੇਸ 'ਤੇ ਮਿਜ਼ਾਈਲਾਂ ਨਾਲ ਹਮਲਾ ਕੀਤਾ ਸੀ | ਤਾਜ਼ਾ ਸੈਟੇਲਾਈਟ ਤਸਵੀਰਾਂ ਤੋਂ ਪਤਾ ਲੱਗਾ ਹੈ ਕਿ ਪਾਕਿ ਨੇ ਏਅਰਬੇਸ ਦੀ ਮੁਰੰਮਤ ਦਾ ਕੰਮ ਸ਼ੁਰੂ ਕਰ ਦਿੱਤਾ ਹੈ | ਨੂਰ ਖਾਨ ਏਅਰਬੇਸ ਦੀਆਂ ਸੈਟੇਲਾਈਟ ਤਸਵੀਰਾਂ ਵਿਚ ਨਿਰਮਾਣ ਕਾਰਜ ਸਾਫ਼ ਵਿਖਾਈ ਦੇ ਰਿਹਾ ਹੈ | ਪਾਕਿ ਦੀ ਰਾਜਧਾਨੀ ਇਸਲਾਮਾਬਾਦ ਤੋਂ ਸਿਰਫ਼ 25 ਕਿਲੋਮੀਟਰ ਦੂਰ ਸਥਿਤ ਇਹ ਏਅਰਬੇਸ ਹਵਾਈ ਸੈਨਾ ਦਾ ਇਕ ਮਹੱਤਵਪੂਰਨ ਬੇਸ ਹੈ | ਭਾਰਤੀ ਫ਼ੌਜ ਨੇ ਨੂਰ ਖਾਨ ਬੇਸ 'ਚ ਖੜ੍ਹੇ ਦੋ ਵਿਸ਼ੇਸ਼ ਟਰੱਕਾਂ ਨੂੰ ਨਿਸ਼ਾਨਾ ਬਣਾਇਆ ਸੀ | ਇਸ ਹਮਲੇ 'ਚ ਟਰੱਕ ਅਤੇ ਇਮਾਰਤ ਦੋਵੇਂ ਤਬਾਹ ਹੋ ਗਏ ਸਨ | ਇਹ ਆਮ ਟਰੱਕ ਨਹੀਂ ਸਨ | ਇਨ੍ਹਾਂ ਨੂੰ ਡਰੋਨ ਲਈ ਕਮਾਂਡ ਅਤੇ ਕੰਟਰੋਲ ਸੈਂਟਰਾਂ ਵਜੋਂ ਵਰਤਿਆ ਜਾ ਸਕਦਾ ਸੀ | ਭਾਰਤ ਨੇ ਕਦੇ ਵੀ ਅਧਿਕਾਰਤ ਤੌਰ 'ਤੇ ਇਹ ਨਹੀਂ ਦੱਸਿਆ ਕਿ ਇਸ ਹਮਲੇ 'ਚ ਕਿਹੜੀਆਂ ਮਿਜ਼ਾਈਲਾਂ ਦੀ ਵਰਤੋਂ ਕੀਤੀ ਗਈ ਸੀ | ਹਾਲਾਂਕਿ, ਇਹ ਸੰਭਾਵਨਾ ਹੈ ਕਿ ਇਹ ਹਮਲਾ ਬ੍ਰਹਮੋਸ ਜਾਂ ਸਕੈਲਪ ਮਿਜ਼ਾਈਲਾਂ ਨਾਲ ਕੀਤਾ ਗਿਆ ਸੀ | ਦੱਸਿਆ ਜਾ ਰਿਹਾ ਹੈ ਕਿ ਹਮਲੇ ਤੋਂ ਪਹਿਲਾਂ ਦੀਆਂ ਸੈਟੇਲਾਈਟ ਤਸਵੀਰਾਂ 'ਚ ਵਿਖਾਈ ਦੇ ਰਿਹਾ ਸੀ ਕਿ ਦੋਵਾਂ ਟਰੱਕਾਂ ਦੇ ਆਲੇ-ਦੁਆਲੇ ਤਰਪਾਲਾਂ ਰੱਖੀਆਂ ਗਈਆਂ ਸਨ ਤਾਂ ਜੋ ਇਹ ਪਤਾ ਨਾ ਲੱਗੇ ਕਿ ਉੱਥੇ ਕੀ ਹੋ ਰਿਹਾ ਹੈ | ਜਦਕਿ ਹਮਲੇ ਤੋਂ ਬਾਅਦ ਦੀਆਂ ਤਸਵੀਰਾਂ ਨੇ ਦੋਵਾਂ ਟਰੱਕਾਂ ਅਤੇ ਆਲੇ-ਦੁਆਲੇ ਦੀਆਂ ਇਮਾਰਤਾਂ ਨੂੰ ਕਾਫ਼ੀ ਨੁਕਸਾਨ ਪਹੁੰਚਾਉਣ ਦੀ ਪੁਸ਼ਟੀ ਕੀਤੀ | ਜਦਕਿ ਤਾਜ਼ਾ ਤਸਵੀਰਾਂ ਵਿਚ ਹਮਲੇ ਵਾਲੀ ਜਗ੍ਹਾ 'ਤੇ ਨਿਰਮਾਣ ਕਾਰਜ ਚੱਲਦਾ ਵੇਖਿਆ ਜਾ ਸਕਦਾ ਹੈ | ਉੱਥੇ ਨਵੀਆਂ ਕੰਧਾਂ ਵੀ ਬਣਾਈਆਂ ਗਈਆਂ ਹਨ | ਦੱਸਿਆ ਜਾ ਰਿਹਾ ਹੈ ਕਿ ਇਹ ਏਅਰਬੇਸ ਪਾਕਿਸਤਾਨੀ ਫੌਜ ਦੇ ਹੈੱਡਕੁਆਰਟਰ ਦੇ ਨੇੜੇ ਬਣਾਇਆ ਗਿਆ ਹੈ | ਇਹ ਪਾਕਿ ਦੇ ਫੌਜੀ ਜਹਾਜ਼ਾਂ ਦਾ ਮੁੱਖ ਅਧਾਰ ਹੈ | ਆਪ੍ਰੇਸ਼ਨ ਸੰਧੂਰ ਤੋਂ ਪਹਿਲਾਂ ਸਾਬ ਏਰੀ ਏਅਰਬੋਰਨ ਅਰਲੀ ਵਾਰਨਿੰਗ ਸਿਸਟਮ ਇੱਥੋਂ ਚਲਾਇਆ ਜਾਂਦਾ ਸੀ | ਹਵਾ 'ਚ ਤੇਲ ਭਰਨ ਵਾਲੇ ਆਈ. ਐਲ.-78 ਅਤੇ ਸੀ-130 ਟ੍ਰਾਂਸਪੋਰਟ ਜਹਾਜ਼ ਇੱਥੇ ਤਾਇਨਾਤ ਸਨ |