ਮਾਨਾਂਵਾਲਾ, 3 ਨਵੰਬਰ (ਗੁਰਦੀਪ ਸਿੰਘ ਨਾਗੀ)- ਰਾਤ ਦੀ ਨੀਂਦ ਹਰ ਕਿਸੇ ਲਈ ਬਹੁਤ ਹੀ ਅਹਿਮ ਅਤੇ ਜ਼ਰੂਰੀ ਹੁੰਦੀ ਹੈ | ਜੇਕਰ ਤੁਹਾਨੂੰ ਰਾਤ ਨੂੰ ਸਹੀ ਨੀਂਦ ਨਹੀਂ ਆਉਂਦੀ ਤਾਂ ਤੁਸੀਂ ਅਗਲੇ ਦਿਨ ਥੱਕਿਆ ਹੋਇਆ ਮਹਿਸੂਸ ਕਰਦੇ ਹੋ, ਜਦੋਂ ਸਾਡਾ ਸਾਹ ਰਗੜ ਕੇ ਜਾਂਦਾ ਹੈ ਤਾਂ ਉਸਦੀ ਆਵਾਜ਼ ਨੂੰ ਖਰਾੜੇ ਆਖਦੇ ਹਨ, ਜਿਸ ਨੂੰ 'ਅਬਸਟਰਕਟਿਵ ਸਲੀਪ ਐਪਨੀਆ' ਵੀ ਆਖਦੇ ਹਨ | ਇਹ ਜਾਣਕਾਰੀ ਈ.ਐੱਨ.ਟੀ. ਸਰਜਨ ਡਾ. ਰਾਜਬਰਿੰਦਰ ਰੰਧਾਵਾ ਨੇ ਗੁਰਸ਼ੇਰ ਹਸਪਤਾਲ ਨਜਦੀਕ ਬ੍ਰੈਸਟਪ੍ਰਾਈਜ ਮਾਨਾਂਵਾਲਾ ਵਿਖੇ ਗੱਲਬਾਤ ਦੌਰਾਨ ਦਿੱਤੀ | ਉਨ੍ਹਾਂ ਦੱਸਿਆ ਕਿ ਸਾਹ ਵਾਲੇ ਰਸਤੇ ਵਿਚ ਕਿਤੇ ਰੁਕਾਵਟ ਹੋਣ ਕਾਰਨ ਉੱਚੀ-ਉੱਚੀ ਘੁਰਾੜੇ ਆਉਂਦੇ ਹਨ, ਜਿਸ ਨਾਲ ਸਾਹ ਰੁਕਦਾ ਹੈ, ਵਾਰ-ਵਾਰ ਨੀਂਦ ਖੁੱਲਦੀ ਹੈ, ਅਗਲੇ ਦਿਨ ਨੀਂਦ ਆਉਂਦੀ ਰਹਿੰਦੀ ਹੈ ਪ੍ਰੰਤੂ ਉਕਤ ਬਿਮਾਰੀ ਦੇ ਚੈੱਕਅੱਪ ਲਈ ਸਲੀਪ ਸਟੱਡੀ, ਅੰਡੋਸਕੋਪੀ, ਐੱਮ.ਆਰ.ਆਈ. ਆਦਿ ਟੈਸਟ ਕਰਵਾ ਕੇ ਰੁਕਾਵਟ ਦਾ ਪਤਾ ਲਗਾ ਕੇ ਇਸਦਾ ਇਲਾਜ ਕੀਤਾ ਜਾਂਦਾ ਹੈ | ਉਨ੍ਹਾਂ ਕਿਹਾ ਕਿ ਖਰਾੜਿਆਂ ਨੂੰ ਆਪ੍ਰੇਸ਼ਨ ਅਤੇ ਸਾਹ ਵਾਲੀ ਡਿਵਾਈਸ ਲਗਾ ਕੇ ਵੀ ਠੀਕ ਕੀਤਾ ਜਾ ਸਕਦਾ ਹੈ |
