ਰਾਮਪੁਰਾ ਫੂਲ, 2 ਜੂਨ (ਹੇਮੰਤ ਕੁਮਾਰ ਸ਼ਰਮਾ)-ਆਉਣ ਵਾਲੀ 5 ਜੂਨ ਨੂੰ ਵਿਸ਼ਵ ਵਾਤਾਵਰਣ ਦਿਵਸ ਦੇ ਮੌਕੇ 'ਤੇ, ਪੰਜਾਬ ਸੂਬੇ ਦੇ ਸਾਰੇ ਸਕੂਲਾਂ ਵਿਚ ਤਿ੍ਵੇਣੀ ਜਾਂ ਪੰਚਵਟੀ ਬਾਗ਼ ਵਿਸ਼ੇਸ਼ ਤੌਰ 'ਤੇ ਸਥਾਪਿਤ ਕੀਤਾ ਜਾਵੇਗਾ | ਇਸ ਵਿਲੱਖਣ ਪਹਿਲਕਦਮੀ ਦਾ ਉਦੇਸ਼ ਵਿਦਿਆਰਥੀਆਂ ਵਿਚ ਵਾਤਾਵਰਣ ਸੁਰੱਖਿਆ ਪ੍ਰਤੀ ਜਾਗਰੂਕਤਾ ਵਧਾਉਣਾ ਅਤੇ ਹਰਿਆਲੀ ਨੂੰ ਉਤਸ਼ਾਹਿਤ ਕਰਨਾ ਹੈ | ਤਿ੍ਵੇਣੀ ਬਾਗ਼ ਵਿਚ ਪਿੱਪਲ, ਨਿੰਮ ਅਤੇ ਬਰਗਦ ਦੇ ਪੌਦੇ ਲਗਾਏ ਜਾਣਗੇ | ਇਸ ਦੇ ਨਾਲ ਹੀ ਪੰਚਵਟੀ ਬਾਗ਼ ਵਿਚ ਬੇਲ ਪੱਤਰ, ਆਂਵਲਾ, ਪਿੱਪਲ, ਬਟਵਿ੍ਕਸ਼ ਅਤੇ ਸੀਤਾ ਅਸ਼ੋਕ/ਨੀਮ ਵਰਗੇ ਔਸ਼ਧੀ ਅਤੇ ਧਾਰਮਿਕ ਮਹੱਤਵ ਵਾਲੇ ਪੌਦੇ ਸ਼ਾਮਲ ਹੋਣਗੇ | ਜਿੱਥੇ ਜ਼ਮੀਨ ਦੀ ਘਾਟ ਹੈ, ਉੱਥੇ ਇਹ ਪੌਦੇ ਵੱਡੇ ਆਕਾਰ ਦੇ ਗਮਲਿਆਂ ਵਿਚ ਲਗਾਏ ਜਾਣਗੇ | ਇਸ ਮੌਕੇ ਸਾਰੇ ਸਕੂਲਾਂ ਵਿਚ ਵਾਤਾਵਰਣ ਪੇਂਟਿੰਗ, ਲੇਖ ਲਿਖਣਾ, ਭਾਸ਼ਣ, ਰੁੱਖ ਲਗਾਉਣਾ ਅਤੇ ਪੋਸਟਰ ਬਣਾਉਣ ਵਰਗੇ ਮੁਕਾਬਲੇ ਵੀ ਕਰਵਾਏ ਜਾਣਗੇ | ਇਸ ਪਹਿਲਕਦਮੀ ਰਾਹੀਂ ਬੱਚਿਆਂ ਨੂੰ ਕੁਦਰਤ ਨਾਲ ਜੋੜਿਆ ਜਾ ਰਿਹਾ ਹੈ ਅਤੇ ਵਾਤਾਵਰਣ ਰੱਖਿਅਕ ਬਣਨ ਲਈ ਪ੍ਰੇਰਿਤ ਕੀਤਾ ਜਾ ਰਿਹਾ ਹੈ | ਪੰਜਾਬ ਰਾਜ ਦੇ ਵਾਤਾਵਰਣ ਸੰਯੋਜਕ ਰਪਿੰਦਰ ਪਟਿਆਲ ਨੇ ਸਾਰੇ ਸਕੂਲਾਂ, ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਨੂੰ ਇਸ ਮੁਹਿੰਮ ਵਿਚ ਸਰਗਰਮ ਭਾਗੀਦਾਰੀ ਲਈ ਵਧਾਈ ਦਿੱਤੀ ਅਤੇ ਕਿਹਾ, 'ਹਰ ਪੌਦਾ ਇੱਕ ਜੀਵਨ ਹੈ ਅਤੇ ਇਹ ਜੀਵਨ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਇੱਕ ਸੁਰੱਖਿਅਤ ਵਾਤਾਵਰਣ ਦਾ ਆਧਾਰ ਬਣੇਗਾ' |
