ਭਰਤਗੜ੍ਹ, 30 ਦਸੰਬਰ (ਜਸਬੀਰ ਸਿੰਘ ਬਾਵਾ)-ਬੜਾ ਪਿੰਡ 'ਚ ਦੋ ਵਾਹਨ ਟਕਰਾਉਣ ਬਦੌਲਤ ਕੌਮੀ ਮਾਰਗ 'ਤੇ ਦੋਵੇਂ ਪਾਸੇ ਕਈ ਕਿੱਲੋਮੀਟਰ ਤੱਕ ਵਾਹਨ ਆਵਾਜਾਈ ਪ੍ਰਭਾਵਿਤ ਰਹੀ, ਨਤੀਜੇ ਵਜੋਂ ਆਪਣੇ ਟਿਕਾਣਿਆਂ 'ਤੇ ਸਮੇਂ ਸਿਰ ਪੁੱਜਣ ਦੇ ਚਾਹਵਾਨ ਵਾਹਨ ਚਾਲਕ ਬੜਾ ਪਿੰਡ 'ਚ ਭਾਖੜਾ ਨਹਿਰ ਦੀ ਪਟੜੀ ਰਾਹੀਂ ਬੁੰਗਾ ਸਾਹਿਬ ਅਤੇ ਘਨੌਲੀ ਰਾਹੀਂ ਤਰਜੀਹ ਦੇ ਰਹੇ ਸਨ, ਕਈ ਮਰੀਜ਼ਾਂ ਨੂੰ ਲੈ ਕੇ ਜਾ ਰਹੇ ਚਾਲਕ ਐਂਬੂਲੈਂਸਾਂ ਸਮੇਤ ਖੱਜਲ ਖ਼ੁਆਰ ਹੋ ਕੇ ਨਿਕਲਦੇ ਰਹੇ | ਭਾਖੜਾ ਨਹਿਰ ਦੀ ਪਟੜੀ 'ਤੇ ਵਾਹਨ ਆਵਾਜਾਈ ਦੀ ਬਹੁਤਾਤ ਅਤੇ ਕੌਮੀ ਮਾਰਗ 'ਤੇ ਵਾਹਨਾਂ ਦੀਆਂ ਲੰਬੀਆਂ ਕਤਾਰਾਂ ਨੂੰ ਘਟਾਉਣ ਦੇ ਮੰਤਵ ਨਾਲ ਭਰਤਗੜ੍ਹ ਪੁਲਿਸ ਚੌਂਕੀ ਦੇ ਇੰਚਾਰਜ ਸੁਖਵਿੰਦਰ ਸਿੰਘ ਆਪਣੇ ਮੁਲਾਜ਼ਮਾਂ ਸਮੇਤ ਯਤਨਸ਼ੀਲ ਰਹੇ, ਕੌਮੀ ਮਾਰਗ ਨਿਰਮਾਣ ਅਥਾਰਿਟੀ ਦੀ ਨਿੱਜੀ ਕੰਪਨੀ ਦੇ ਮੁਲਾਜ਼ਮ ਅਤੇ ਸਰਵੇਂਲੈਂਸ ਟੀਮ ਨੇ ਦੋਵੇਂ ਵਾਹਨਾਂ ਨੂੰ ਮਸ਼ੀਨਰੀ ਦੀ ਸਹਾਇਤਾ ਨਾਲ ਹਟਾਇਆ | ਪੁਲਿਸ ਮੁਲਾਜ਼ਮਾਂ ਅਤੇ ਕੰਪਨੀ ਮੁਲਾਜ਼ਮਾਂ ਦੀ ਮੁਸਤੈਦੀ ਸਦਕਾ ਕਰੀਬ ਤਿੰਨ ਘੰਟੇ ਮਗਰੋਂ ਕੌਮੀ ਮਾਰਗ 'ਤੇ ਵਾਹਨ ਆਵਾਜਾਈ ਸੁਚਾਰੂ ਰੂਪ ਵਿਚ ਬਹਾਲ ਹੋ ਗਈ |
