ਭਾਦਸੋਂ, 4 ਨਵੰਬਰ (ਪ੍ਰਦੀਪ ਦੰਦਰਾਲਾ)-ਸ਼੍ਰੋਮਣੀ ਅਕਾਲੀ ਦਲ ਪੁਨਰ ਸੁਰਜੀਤ ਦੇ ਬੁਲਾਰੇ ਤੇ ਮੁੱਖ ਸੇਵਾਦਾਰ ਹਲਕਾ ਨਾਭਾ ਐਡ. ਰਵਿੰਦਰ ਸਿੰਘ ਸ਼ਾਹਪੁਰ ਨੇ ਕਿਹਾ ਕਿ ਪੰਜਾਬ ਯੂਨੀਵਰਸਿਟੀ ਵਿਚ ਸੈਮੀਨਾਰ ਰੁਕਵਾਉਣ, ਨਵੇਂ ਦਾਖ਼ਲਿਆਂ ਸਮੇਂ ਹਲਫ਼ਨਾਮੇ ਵਜੋਂ ਵਿਦਿਆਰਥੀਆਂ ਦੇ ਪ੍ਰਦਰਸ਼ਨ ਕਰਨ ਦੇ ਹੱਕ ਨੂੰ ਤਾਨਾਸ਼ਾਹੀ ਤਰੀਕੇ ਨਾਲ ਕੁਚਲਨ ਅਤੇ ਹੁਣ ਪੂਰਨ ਤੌਰ 'ਤੇ ਹੀ ਸਾਡੇ ਸੂਬੇ ਦੀ ਵਿਰਾਸਤ ਪੰਜਾਬ ਯੂਨੀਵਰਸਿਟੀ ਦੀ ਚੁਣੀ ਹੋਈ ਸੈਨੇਟ ਅਤੇ ਸਿੰਡੀਕੇਟ ਨੂੰ ਖ਼ਤਮ ਕਰ ਕੇ ਕੇਂਦਰ ਵਲੋਂ ਨਿਯੁਕਤ ਬਾਡੀ ਥੋਪਣ ਦਾ ਫ਼ੈਸਲਾ ਸਿੱਧਾ ਸਾਡੇ ਸੂਬੇ ਦੇ ਹੱਕਾਂ 'ਤੇ ਇੱਕ ਹੋਰ ਵੱਡਾ ਹਮਲਾ ਹੈ, ਜੋ ਬਿਲਕੁਲ ਵੀ ਬਰਦਾਸਤਯੋਗ ਨਹੀਂ ਹੈ | ਇਸ ਯੂਨੀਵਰਸਿਟੀ ਵਿਚ ਪੰਜਾਬ ਸਰਕਾਰ ਅਤੇ ਮੁੱਖ ਮੰਤਰੀ ਦੀ ਜ਼ਿੰਮੇਵਾਰ ਭੂਮਿਕਾ ਹੋਣ ਦੇ ਬਾਵਜੂਦ ਪੰਜਾਬ ਦਾ ਮੁੱਖ ਮੰਤਰੀ ਗੁਜਰਾਤ ਵਿਖੇ ਚੁਟਕਲੇ ਸੁਣਾਉਣ ਵਿੱਚ ਮਸਰੂਫ਼ ਹੈ, ਜਦਕਿ ਸਾਡੇ ਸੂਬੇ ਤੋਂ ਉਸ ਦੀ ਵਿਰਾਸਤ ਸਾਡੀ ਸਭ ਤੋਂ ਵੱਡੀ ਤੇ ਇਤਿਹਾਸਕ ਯੂਨੀਵਰਸਿਟੀ ਨੂੰ ਅੱਜ ਪੰਜਾਬੀ ਸੂਬੇ ਦੇ ਦਿਵਸ ਮੌਕੇ ਖੋਹਿਆ ਜਾ ਰਿਹਾ ਹੈ | ਇਹ ਤਾਨਾਸ਼ਾਹੀ ਹੁਕਮ ਤੇ ਬਦਲਾਅ ਮਨਜ਼ੂਰ ਨਹੀਂ ਕੀਤੇ ਜਾਣਗੇ | ਕੇਂਦਰ ਸਰਕਾਰ ਨੂੰ ਤੁਰੰਤ ਇਸ ਗੈਰ ਸੰਵਿਧਾਨਿਕ ਫ਼ੈਸਲੇ ਨੂੰ ਵਾਪਸ ਲੈਣਾ ਚਾਹੀਦਾ ਹੈ ਅਤੇ ਪੰਜਾਬ ਦੇ ਮੁੱਖ ਮੰਤਰੀ ਨੂੰ ਚੁਣਾਵੀ ਰੈਲੀਆਂ ਛੱਡ ਤੁਰੰਤ ਇਸ ਮਸਲੇ ਵਿੱਚ ਸਖ਼ਤੀ ਨਾਲ ਪੰਜਾਬ ਦੀ ਪੈਰਵਾਈ ਕਰਨੀ ਚਾਹੀਦੀ ਹੈ |
