ਸ਼ੇਰਪੁਰ, 1 ਸਤੰਬਰ (ਮੇਘ ਰਾਜ ਜੋਸ਼ੀ) - ਜ਼ਿਲ੍ਹਾ ਸੰਗਰੂਰ ਦੇ ਪਿੰਡ ਬੜੀ ਦੇ ਨੌਜਵਾਨ ਗੁਰਪ੍ਰੀਤ ਸਿੰਘ ਨੇ ਆਪਣੀ ਨਵੀਨਤਮ ਸੋਚ ਅਤੇ ਤਕਨੀਕੀ ਹੁਨਰ ਨਾਲ ਸਪਲੈਂਡਰ ਮੋਟਰਸਾਈਕਲ ਨੂੰ ਬਿਨ੍ਹਾਂ ਪੈਟਰੋਲ ਤੋਂ ਚੱਲਣ ਵਾਲਾ ਬਣਾ ਕੇ ਇਲਾਕੇ ਵਿਚ ਨਵਾਂ ਇਤਿਹਾਸ ਰਚਿਆ ਹੈ | ਗੁਰਪ੍ਰੀਤ ਸਿੰਘ ਦਾ ਕਹਿਣਾ ਹੈ ਕਿ ਉਸ ਦੀ ਇਹ ਕੋਸ਼ਿਸ਼ ਨਾ ਸਿਰਫ਼ ਮੋਟਰਸਾਈਕਲ ਰੱਖਣ ਦੇ ਉਸ ਦੇ ਸ਼ੌਕ ਨੂੰ ਪੂਰਾ ਕਰਦੀ ਹੈ ਬਲਕਿ ਇਸ ਨਾਲ ਵਾਤਾਵਰਨ ਦੀ ਸ਼ੁੱਧਤਾ ਵਿਚ ਯੋਗਦਾਨ, ਪੈਟਰੋਲ ਦੀ ਬੱਚਤ ਅਤੇ ਰੋਜ਼ਾਨਾ ਦੀ ਕਸਰਤ ਵੀ ਹੁੰਦੀ ਹੈ | ਉਸ ਨੇ ਆਪਣੇ ਮੋਟਰਸਾਈਕਲ ਵਿਚ ਵਿਲੱਖਣ ਤਕਨੀਕ ਲਗਾਈ ਹੈ, ਜਿਸ ਨਾਲ ਪੈਡਲਾਂ ਰਾਹੀਂ ਇਹ ਚਲਾਇਆ ਜਾ ਸਕਦਾ ਹੈ | ਇਹ ਸਿਸਟਮ ਕੁਝ ਹੱਦ ਤੱਕ ਸਾਈਕਲਿੰਗ ਮਾਡਲ ਨਾਲ ਮਿਲਦਾ ਜੁਲਦਾ ਹੈ, ਜਿਸ ਵਿਚ ਪੈਡਲਾਂ ਨਾਲ ਲੱਗੀ ਚੇਨ ਮੋਟਰਸਾਈਕਲ ਦੇ ਪਹੀਏ ਨੂੰ ਚਲਾਉਂਦੀ ਹੈ | ਇਸ ਨਾਲ ਰੋਜ਼ਾਨਾ ਸਫ਼ਰ ਕਰਨਾ ਇੱਕ ਤਰ੍ਹਾਂ ਦੀ ਕਸਰਤ ਵੀ ਬਣ ਜਾਂਦਾ ਹੈ ਅਤੇ ਪੈਟਰੋਲ 'ਤੇ ਨਿਰਭਰਤਾ ਵੀ ਘਟਦੀ ਹੈ | ਉਸ ਨੇ ਦੱਸਿਆ ਕਿ ਜਦੋਂ ਮਰਜ਼ੀ ਇਸ ਨੂੰ ਪੈਟਰੋਲ 'ਤੇ ਚੱਲਣ ਵਾਲਾ ਵੀ ਬਣਾਇਆ ਜਾ ਸਕਦਾ ਹੈ | ਇਲਾਕੇ ਵਿਚ ਲੋਕ ਉਸ ਦੀ ਇਸ ਨਵੀਂ ਖੋਜ ਨੂੰ ਬਹੁਤ ਪਸੰਦ ਕਰ ਰਹੇ ਹਨ ਅਤੇ ਕਈ ਨੌਜਵਾਨ ਇਸ ਨੰੂ ਪ੍ਰੇਰਨਾ ਵਜੋਂ ਦੇਖ ਰਹੇ ਹਨ |
