ਧੂਰੀ, 6 ਦਸੰਬਰ (ਸੰਜੇ ਲਹਿਰੀ, ਲਖਵੀਰ ਸਿੰਘ ਧਾਂਦਰਾ) - ਸਕੂਲ ਕੈਂਪਸ ਵਿਚ ਖੇਡ ਸਮਾਰੋਹ ਦੌਰਾਨ ਮਲੇਰਕੋਟਲਾ ਦੇ ਐਸ. ਐਸ. ਪੀ. ਸ੍ਰੀ ਗਗਨ ਅਜੀਤ ਸਿੰਘ (ਸਾਬਕਾ ਉਲੰਪਿਕ ਖਿਡਾਰੀ) ਨੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰ ਸਕੂਲ ਪਰਿਵਾਰ ਦਾ ਮਾਣ ਵਧਾਇਆ | ਮੁੱਖ ਮਹਿਮਾਨ ਵਲੋਂ ਸਕੂਲ ਦਾ ਝੰਡਾ ਲਹਿਰਾਇਆ ਗਿਆ, ਜਿਸ ਨਾਲ ਖੇਡ ਮਹੌਤਸਵ ਦੀ ਅਧਿਕਾਰਕ ਸ਼ੁਰੂਆਤ ਹੋਈ | ਇਸ ਤੋਂ ਬਾਅਦ ਚਾਰੇ ਸਦਨਾਂ ਬਾਬਾ ਅਜੀਤ ਸਿੰਘ ਸਦਨ, ਬਾਬਾ ਜੁਝਾਰ ਸਿੰਘ ਸਦਨ, ਬਾਬਾ ਜ਼ੋਰਾਵਰ ਸਿੰਘ ਸਦਨ ਅਤੇ ਬਾਬਾ ਫਤਿਹ ਸਿੰਘ ਸਦਨ ਦੇ ਬੱਚਿਆਂ ਨੇ ਬੇਹੱਦ ਅਨੁਸ਼ਾਸਨ, ਤਿਆਰੀ ਅਤੇ ਉਤਸ਼ਾਹ ਦੇ ਨਾਲ ਸ਼ਾਨਦਾਰ ਮਾਰਚ-ਪਾਸਟ ਪੇਸ਼ ਕੀਤਾ | ਮਾਸ ਡਰਿੱਲ ਦੀ ਇਕਸਾਰਤਾ, ਕਲਾਸੀਕਲ ਡਾਂਸ ਦੀ ਲਯ ਅਤੇ ਗ੍ਰੇਸ, ਰਿੰਗ ਡਾਂਸ ਦੀ ਚੁਲਬੁਲਾਹਟ, ਵਿੰਗ ਡਾਂਸ ਦੀ ਖ਼ੂਬਸੂਰਤ ਪੇਸ਼ਕਾਰੀ ਅਤੇ ਜਿਮਨਾਸਟਿਕ ਦੇ ਦਮਦਾਰ ਪ੍ਰਦਰਸ਼ਨ ਨੇ ਸਾਰੇ ਪ੍ਰੋਗਰਾਮ ਨੂੰ ਚਾਰ ਚੰਦ ਲਗਾ ਦਿੱਤੇ | ਸੰਸਥਾ ਦੇ ਚੇਅਰਮੈਨ ਸ: ਪਰਮਜੀਤ ਸਿੰਘ ਗਿੱਲ ਨੇ ਕਿਹਾ ਕਿ ਸਕੂਲ ਵੱਲੋਂ ਲਗਾਤਾਰ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ ਤਾਂ ਜੋ ਵਿਦਿਆਰਥੀਆਂ ਦਾ ਮਿਆਰ ਹਮੇਸ਼ਾ ਉੱਚਾ ਰਹੇ | ਸਕੂਲ ਪਿ੍ੰਸੀਪਲ ਸ. ਸਤਿਬੀਰ ਸਿੰਘ ਨੇ ਆਪਣੇ ਪ੍ਰੇਰਣਾਦਾਇਕ ਭਾਸ਼ਣ ਵਿਚ ਮੁੱਖ ਮਹਿਮਾਨ ਅਤੇ ਸਾਰੇ ਸੱਦੇ ਹੋਏ ਮਹਿਮਾਨਾਂ ਦਾ ਤਹਿ ਦਿਲੋਂ ਸਵਾਗਤ ਕੀਤਾ | ਉਨ੍ਹਾਂ ਨੇ ਸਕੂਲ ਦੀ ਵਿਦਿਆ, ਖੇਡਾਂ, ਸਭਿਆਚਾਰ ਅਤੇ ਹੋਰ ਖੇਤਰਾਂ ਵਿਚ ਪ੍ਰਾਪਤ ਕੀਤੀਆਂ ਸ਼ਾਨਦਾਰ ਉਪਲਬਧੀਆਂ ਬਾਰੇ ਜਾਣਕਾਰੀ ਦਿੱਤੀ | ਮੁੱਖ ਮਹਿਮਾਨ ਸ੍ਰੀ ਗਗਨ ਅਜੀਤ ਸਿੰਘ ਨੇ ਵੀ ਆਪਣੇ ਸੰਬੋਧਨ ਵਿਚ ਬੱਚਿਆਂ ਦੀ ਜ਼ਿੰਦਗੀ ਵਿਚ ਖੇਡਾਂ ਦੇ ਮਹੱਤਵ ਉੱਤੇ ਰੌਸ਼ਨੀ ਪਾਈ ਅਤੇ ਮਾਪਿਆਂ ਨੂੰ ਬੱਚਿਆਂ ਨਾਲ ਸਮਾਂ ਬਿਤਾਉਣ, ਉਨ੍ਹਾਂ ਨੂੰ ਪ੍ਰੇਰਿਤ ਕਰਨ ਅਤੇ ਉਨ੍ਹਾਂ ਦੇ ਰੁਝਾਨ ਨੂੰ ਸਮਝਣ ਦੀ ਅਪੀਲ ਕੀਤੀ | ਇਸ ਸਮਾਗਮ ਵਿਚ ਵਿਸ਼ੇਸ਼ ਮਹਿਮਾਨ ਵਜੋਂ ਸ: ਚਰਨਪਾਲ ਸਿੰਘ (ਡੀ.ਐਸ.ਪੀ), ਇੰਟੈਲੀਜੈਂਸ ਸੰਗਰੂਰ ਅਤੇ ਮੈਂਬਰ ਫੂਡ ਬੋਰਡ ਪੰਜਾਬ ਸਰਕਾਰ ਸ. ਜਸਬੀਰ ਸਿੰਘ ਸੇਖੋਂ ਜੀ ਨੇ ਸ਼ਿਰਕਤ ਕੀਤੀ | ਉਨ੍ਹਾਂ ਨੇ ਵੀ ਬੱਚਿਆਂ ਦੀ ਪ੍ਰਤਿਭਾ ਅਤੇ ਪ੍ਰਦਰਸ਼ਨ ਦੀ ਖੁੱਲ੍ਹ ਕੇ ਪ੍ਰਸ਼ੰਸਾ ਕੀਤੀ | ਟਰੱਸਟ ਦੇ ਮਾਣਯੋਗ ਜਨਰਲ ਸਕੱਤਰ ਸ: ਬਲਵੰਤ ਸਿੰਘ ਰੰਧਾਵਾ ਨੇ ਵੀ ਇਸ ਮੌਕੇ ਬੱਚਿਆਂ ਲਈ ਆਪਣੇ ਸੰਦੇਸ਼ ਭੇਜੇ ਅਤੇ ਇਸ ਤੋਂ ਇਲਾਵਾ ਟਰੱਸਟ ਦੇ ਹੋਰ ਮੈਂਬਰ ਸ. ਹਰਜਾਪ ਸਿੰਘ ਸਮਰਾ, ਸ. ਜਤਿੰਦਰ ਸਿੰਘ ਮੰਡੇਰ, ਸ. ਸੁਖਵਿੰਦਰ ਸਿੰਘ ਧਾਂਦਰਾ, ਸ੍ਰੀਮਤੀ ਅੰਮਿ੍ਤਪਾਲ ਕੌਰ, ਸ. ਗੁਰਵਿੰਦਰ ਸਿੰਘ ਜੱਗਾ, ਸ. ਜਗਦੇਵ ਸਿੰਘ ਸਲੇਮਪੁਰ ਸ. ਤੇਜਵਿੰਦਰ ਸਿੰਘ ਗਰੇਵਾਲ ਸਮੇਤ ਟਰੱਸਟ ਅਧੀਨ ਚੱਲ ਰਹੇ ਸਾਰੇ ਕਾਲਜਾਂ ਦੇ ਪਿ੍ੰਸੀਪਲ ਅਤੇ ਵਾਇਸ ਪਿ੍ੰਸੀਪਲ, ਸਕੂਲ ਵਾਈਸ ਪਿ੍ੰਸੀਪਲ ਸ੍ਰੀ ਬਿਨੋਏ ਪੀ. ਕੇ. ਅਤੇ ਕੋਆਰਡੀਨੇਟਰਜ਼ ਸ੍ਰੀਮਤੀ ਮਨਪ੍ਰੀਤ ਕੌਰ ਓਠੀ ਅਤੇ ਸ੍ਰੀਮਤੀ ਵੀਰਪਾਲ ਕੌਰ ਵੀ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਰਹੇ | ਪ੍ਰਾਇਮਰੀ ਵਿੰਗ ਦੀ ਇਹ ਸਾਲਾਨਾ ਅਥਲੈਟਿਕ ਮੀਟ ਬਹੁਤ ਹੀ ਸ਼ਾਨਦਾਰ ਅਤੇ ਉਤਸ਼ਾਹਪੂਰਨ ਮਾਹੌਲ ਵਿਚ ਹੈੱਡ ਮਿਸਟਰਸ ਸ੍ਰੀਮਤੀ ਰਾਜਿੰਦਰ ਪਾਲ ਕੌਰ ਦੀ ਸੁਚੱਜੀ ਅਗਵਾਈ ਹੇਠ ਧੂਮ-ਧਾਮ ਨਾਲ ਸ਼ੁਰੂ ਹੋਈ | ਇਸ ਤਰ੍ਹਾਂ ਗੁਰੂ ਤੇਗ ਬਹਾਦਰ ਸਕੂਲ ਦੀ ਇਹ ਅਥਲੈਟਿਕ ਮੀਟ ਨਾ ਸਿਰਫ਼ ਬੱਚਿਆਂ ਦੇ ਖੇਡਾਂ ਪ੍ਰਤੀ ਜਜ਼ਬੇ ਅਤੇ ਤਿਆਰੀ ਦੀ ਗਵਾਹ ਬਣੀ, ਬਲਕਿ ਸਕੂਲ ਦੇ ਸਿੱਖਿਆਈ ਮਿਆਰ, ਅਨੁਸ਼ਾਸਨ, ਸਮਰਪਣ ਅਤੇ ਕੁੱਲ ਵਿਕਾਸ ਦੀ ਵੀ ਸਪਸ਼ਟ ਤਸਦੀਕ ਕਰਦੀ ਹੈ | ਇਹ ਸਮਾਗਮ ਬੱਚਿਆਂ ਲਈ ਯਾਦਗਾਰ ਤਜਰਬਾ ਅਤੇ ਮਾਪਿਆਂ ਲਈ ਗਰਵ ਦੇ ਪਲ ਛੱਡ ਗਿਆ |
