ਫ਼ਿਰੋਜ਼ਪੁਰ, 4 ਸਤੰਬਰ (ਗੁਰਿੰਦਰ ਸਿੰਘ)- ਪੰਜਾਬ ਦੇ ਕਈ ਹਿੱਸਿਆਂ ਵਿਚ ਆਏ ਭਿਆਨਕ ਹੜ੍ਹਾਂ ਨੇ ਪਹਿਲਾਂ ਤੋਂ ਗ਼ੁਰਬਤ ਦੀ ਜ਼ਿੰਦਗੀ ਜਿਉਂ ਰਹੇ ਲੋਕਾਂ ਨੂੰ ਉਜਾੜ ਕੇ ਰੱਖ ਦਿੱਤਾ ਹੈ | ਅਜਿਹੀ ਹੀ ਇਕ ਦਰਦਨਾਕ ਘਟਨਾ ਸਰਹੱਦੀ ਪਿੰਡ ਗੱਟੀ ਰਾਜੋ ਪਿੰਡ 'ਚ ਵਾਪਰੀ ਜਿੱਥੇ ਪਹਿਲਾਂ ਹੀ ਹੜ੍ਹਾਂ ਕਾਰਨ ਆਪਣੀਆਂ ਫ਼ਸਲਾਂ ਤੋਂ ਹੱਥ ਧੋ ਬੈਠੇ ਇਕ ਗ਼ਰੀਬ ਪਰਿਵਾਰ ਦੀ ਰੋਜ਼ੀ ਰੋਟੀ ਦਾ ਵਸੀਲਾ ਬਚੀ ਉਨ੍ਹਾਂ ਦੀ ਇਕਲੌਤੀ ਮੱਝ ਵੀ ਹੜ੍ਹ ਦੀ ਲਪੇਟ 'ਚ ਆ ਕੇ ਦਮ ਤੋੜ ਗਈ | ਇਸ ਹਾਦਸੇ ਤੋਂ ਪੀੜਤ ਪਰਿਵਾਰ ਦੀ ਮਹਿਲਾ ਪਰਮਜੀਤ ਕੌਰ ਦਾ ਰੋ ਰੋ ਕੇ ਬੁਰਾ ਹਾਲ ਹੋ ਰਿਹਾ ਹੈ | ਆਪਣੀ ਮਰੀ ਹੋਈ ਮੱਝ ਕੋਲ ਬੈਠੀ ਪਰਮਜੀਤ ਕੌਰ ਕਹਿ ਰਹੀ ਸੀ ਕਿ ਪਹਿਲਾਂ ਹੜ੍ਹ ਨੇ ਸਾਡੀ ਸਾਰੀ ਫ਼ਸਲ ਤਬਾਹ ਕਰ ਦਿੱਤੀ, ਬਸ ਸਾਡੀ ਇਹ ਮੱਝ ਹੀ ਸਾਡਾ ਇਕੋ-ਇਕ ਆਸਰਾ ਬਚੀ ਸੀ ਜੋ ਹੜ੍ਹ ਆਉਣ ਤੋਂ ਬਾਅਦ ਬਿਮਾਰ ਹੋ ਗਈ ਸੀ, ਡਾਕਟਰ ਵੀ ਆਏ ਪਰ ਅੱਜ ਇਹ ਵੀ ਸਾਥ ਛੱਡ ਗਈ | ਪਰਮਜੀਤ ਕੌਰ ਨੇ ਕਿਹਾ ਕਿ ਕਈ ਸਾਲ ਲਗਾ ਕੇ ਉਨ੍ਹਾਂ ਇਹ ਪਸ਼ੂ ਪਾਲਿਆ ਸੀ ਤੇ ਹੁਣ ਇਸ ਦੀ ਮੌਤ ਨੇ ਉਨ੍ਹਾਂ ਨੂੰ ਆਰਥਿਕ ਤੌਰ 'ਤੇ ਤਬਾਹ ਕਰ ਦਿੱਤਾ ਹੈ | ਉਨ੍ਹਾਂ ਸਰਕਾਰ ਨੂੰ ਅਪੀਲ ਕੀਤੀ ਕਿ ਉਨ੍ਹਾਂ ਦੀ ਮਦਦ ਕੀਤੀ ਜਾਵੇ, ਸਾਡਾ ਘਰ ਰੁਜ਼ਗਾਰ ਤੋਂ ਖ਼ਾਲੀ ਹੋ ਗਿਆ ਹੈ | ਸਥਾਨਕ ਲੋਕਾਂ ਨੇ ਵੀ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਪੀੜਤ ਪਰਿਵਾਰ ਦੀ ਮਾਲੀ ਮਦਦ ਕੀਤੀ ਜਾਵੇ |
