ਮੱਖੂ, 4 ਸਤੰਬਰ (ਕੁਲਵਿੰਦਰ ਸਿੰਘ ਸੰਧੂ)- ਜਿੱਥੇ ਪੰਜਾਬ ਭਰ ਤੋਂ ਸਮਾਜ ਸੇਵੀ ਸੰਸਥਾਵਾਂ ਵੀ ਹਰ ਪ੍ਰਕਾਰ ਦੀਆਂ ਵਸਤਾਂ ਅਤੇ ਪਸ਼ੂਆਂ ਦਾ ਅਚਾਰ, ਫੀਡ ਲੈ ਕੇ ਹੜ੍ਹ ਪੀੜਤ ਇਲਾਕਿਆਂ ਵਿਚ ਪ੍ਰਭਾਵਿਤ ਪਰਿਵਾਰਾਂ ਤੱਕ ਪਹੁੰਚਾ ਰਹੇ ਹਨ ਉੱਥੇ ਪੰਜਾਬ ਦਾ ਪੂਰਾ ਮਸੀਹ ਸਮਾਜ ਵੀ ਇਸ ਸੇਵਾ ਵਿਚ ਜੁੱਟ ਗਿਆ ਹੈ | ਅਜਿਹੀ ਇਕ ਮਿਸਾਲ ਕਸਬਾ ਮੱਖੂ ਦੇ ਨੇੜੇ ਪਿੰਡ ਰੁਕਨੇ ਵਾਲਾ ਬੰਨ੍ਹ 'ਤੇ ਮਿਲੀ ਜਦੋਂ ਲੋਕਾਂ ਵਿਚ ਹਾਹਾਕਾਰ ਮੱਚ ਗਈ ਕਿ ਇਹ ਬੰਨ੍ਹ ਹੁਣ ਟੁੱਟ ਜਾਵੇਗਾ ਤੇ ਉਨ੍ਹਾਂ ਸਮਾਜ ਸੇਵੀ ਸੰਸਥਾਵਾਂ ਨੂੰ ਅਪੀਲ ਕੀਤੀ ਕਿ ਵੱਧ ਤੋਂ ਵੱਧ ਮਿੱਟੀ ਦੀਆਂ ਟਰਾਲੀਆਂ ਤੇ ਤੋੜੇ ਲੈ ਕੇ ਜਲਦ ਇਸ ਬੰਨ੍ਹ 'ਤੇ ਪਹੁੰਚਿਆ ਜਾਵੇ ਤਾਂ ਮਸੀਹ ਭਾਈਚਾਰੇ ਦੇ ਸਮਾਜ ਸੇਵਕ ਸਮੂਏਲ ਜੋਹਨ ਆਪਣੇ ਨਾਲ 50 ਦੇ ਕਰੀਬ ਸਾਥੀਆਂ ਨੂੰ ਨਾਲ ਲੈ ਕੇ ਜਿਸ 'ਚ ਪਾਸਟਰ ਦਾਊਦ ਮਸੀਹ, ਜੋਨਾਥਨ ਮਸੀਹ, ਵਿਕੀ ਮਸੀਹ, ਸ਼ਿੰਦਾ ਮਸੀਹ, ਮੁਬਾਰਕ ਮਸੀਹ ਤੇ ਆਪਣੀ ਹੈਡਰੇ ਤੇ ਇਕ ਵਿਸ਼ੇਸ਼ ਤੌਰ 'ਤੇ ਬੈਗ ਜਿਨ੍ਹਾਂ ਵਿਚੋਂ 10-10 ਕੁਇੰਟਲ ਮਿੱਟੀ ਭਰ ਕੇ ਬੰਨ੍ਹਾਂ 'ਤੇ ਲੈ ਕੇ ਗਏ ਤੇ ਰਾਤ 2 ਵਜੇ ਤੱਕ ਉਸ ਬੰਨ੍ਹ 'ਤੇ ਸੇਵਾ ਕੀਤੀ | ਸਮੂਏਲ ਜੋਹਨ ਨੇ ਦੱਸਿਆ ਕਿ ਮੈਂ ਪਿਛਲੇ ਕਾਫ਼ੀ ਦਿਨ ਆਪਣੀ ਟੀਮ ਦੇ ਨਾਲ ਬਟਾਲਾ ਇਲਾਕੇ ਵਿਚ ਸੇਵਾ ਕਰਕੇ ਆਇਆ ਹਾਂ ਜਿਸ ਵਿਚ ਡੰਗਰ ਦਾ ਚਾਰਾ, ਬੱਚਿਆਂ ਲਈ ਦੁੱਧ, ਸੁੱਕਾ ਰਾਸ਼ਨ, ਪੀਣ ਵਾਲਾ ਪਾਣੀ ਦਵਾਈਆਂ ਤੇ ਹੋਰ ਬਹੁਤ ਸਮਾਨ ਸਾਡੀ ਟੀਮ ਵਲੋਂ ਵੰਡਿਆ ਗਿਆ ਹੈ |
