ਮਮਦੋਟ, 6 ਦਸੰਬਰ (ਰਾਜਿੰਦਰ ਸਿੰਘ ਹਾਂਡਾ, ਸੁਖਦੇਵ ਸਿੰਘ ਸੰਗਮ)-ਬਲਾਕ ਮਮਦੋਟ ਅਧੀਨ ਆਉਂਦੇ ਪੰਚਾਇਤ ਸੰਮਤੀ ਦੇ 22 ਜ਼ੋਨਾਂ ਦੀਆਂ ਚੋਣਾਂ ਸਬੰਧੀ ਕੁੱਲ 114 ਨਾਮਜ਼ਦਗੀਆਂ ਦਾਖਲ ਹੋਈਆਂ ਸਨ | ਜਿਸ ਸਬੰਧੀ ਜਾਣਕਾਰੀ ਦਿੰਦਿਆਂ ਚੋਣਾਂ ਦੇ ਨੋਡਲ ਅਧਿਕਾਰੀ ਨਾਇਬ ਤਹਿਸੀਲ ਮਮਦੋਟ ਅਵਿਨਾਸ਼ ਚੰਦਰ ਅਤੇ ਰਿਟਰਨਿੰਗ ਅਫ਼ਸਰ ਸੁਨੀਲ ਅਰੋੜਾ ਨੇ ਦੱਸਿਆ ਕਿ ਪੜਤਾਲ ਦੌਰਾਨ 3 ਨਾਮਜ਼ਦਗੀਆਂ ਰੱਦ ਹੋਣ ਤਾੋ ਬਾਅਦ 111 ਨਾਮਜ਼ਦਗੀਆਂ ਸਹੀ ਪਾਈਆਂ ਗਈਆਂ ਹਨ | ਇਹਨਾਂ ਵਿਚੋਂ ਅੱਜ 26 ਉਮੀਦਵਾਰਾਂ ਵਲੋਂ ਆਪਣੀਆਂ ਨਾਮਜ਼ਦਗੀਆਂ ਵਾਪਸ ਲੈ ਲਈਆਂ ਗਈਆਂ, ਜਿਸ ਤੋਂ ਬਾਅਦ ਹੁਣ 85 ਉਮੀਦਵਾਰ ਚੋਣ ਮੈਦਾਨ ਵਿਚ ਰਹਿ ਗਏ ਹਨ | ਇੱਥੇ ਜ਼ਿਕਰਯੋਗ ਹੈ ਕਿ ਕੋਈ ਵੀ ਅਜਿਹਾ ਜੋਨ ਨਹੀਂ ਜਿੱਥੇ ਮੁਕਾਬਲਾ ਨਾ ਹੋਣ ਕਾਰਨ ਕੋਈ ਉਮੀਦਵਾਰ ਬਿਨਾਂ ਮੁਕਾਬਲਾ ਜੇਤੂ ਐਲਾਨਿਆ ਗਿਆ ਹੋਵੇ, ਹਰੇਕ ਜ਼ੋਨ ਵਿਚ 2 ਤੋ ਵੱਧ ਉਮੀਦਵਾਰ ਚੋਣ ਮੈਦਾਨ ਵਿਚ ਡਟੇ ਹੋਏ ਹਨ, ਜਿਸ ਕਾਰਨ ਹਰੇਕ ਜੋਨ ਵਿਚ ਸਿੱਧੇ ਮੁਕਾਬਲਿਆਂ ਦੀ ਬਜਾਏ ਬਹੁਕੋਣੀ ਮੁਕਾਬਲੇ ਹੋਣ ਦੇ ਅਸਾਰ ਹਨ | ਉਮੀਦਵਾਰਾਂ ਵਲੋਂ ਅੱਜ ਚੋਣ ਨਿਸ਼ਾਨ ਮਿਲਣ ਤੋ ਬਾਅਦ ਚੋਣ ਪ੍ਰਚਾਰ ਸ਼ੁਰੂ ਕਰ ਦਿੱਤਾ ਗਿਆ ਹੈ ਅਤੇ ਹਰੇਕ ਸਿਆਸੀ ਪਾਰਟੀ ਆਪਣੇ-ਆਪਣੇ ਉਮੀਦਵਾਰਾਂ ਦੀ ਜਿੱਤ ਯਕੀਨੀ ਬਣਾਉਣ ਲਈ ਸਿਰਤੋੜ ਯਤਨ ਕਰ ਰਹੀ ਹੈ |
