(ਲੜੀ ਜੋੜਨ ਲਈ ਪਿਛਲੇ ਸਨਿਚਰਵਾਰ ਦਾ ਅੰਕ ਦੇਖੋ)
'ਦਾਦਾ ਜੀ-ਦਾਦੀ ਜੀ ਦੇ ਚਿਹਰੇ ਦੀਆਂ ਝੁਰੜੀਆਂ 'ਚੋਂ ਖ਼ੁਸ਼ੀ ਟਪਕਦੀ ਵੇਖ ਕੇ ਮੈਨੂੰ ਇਸ ਤਰ੍ਹਾਂ ਲੱਗ ਰਿਹਾ ਸੀ, ਜਿਵੇਂ ਉਹ ਮੁੱਦਤਾਂ ਤੋਂ ਬਾਅਦ ਖ਼ੁਸ਼ ਹੋਏ ਹੋਣ | ਉਨ੍ਹਾਂ ਦੀ ਖ਼ੁਸ਼ੀ ਵੇਖ ਕੇ ਮੇਰੇ ਮਨ ਨੂੰ ਬੜੀ ਸ਼ਾਂਤੀ ਮਿਲ ਰਹੀ ਸੀ |' ਮੀਕੇ ਨੇ ਜੋ ਮਹਿਸੂਸ ਕੀਤਾ ਉਹ ਸਾਰਿਆਂ ਨਾਲ ਸਾਂਝਾ ਕੀਤਾ |
ਦਾਦਾ ਜੀ ਦੇ ਦੱ ਸੇ ਛੋਟੇ ਰਸਤੇ ਰਾਹੀਂ ਉਹ ਕਦੋਂ ਦੇ ਸਕੂਲ ਕੋਲ ਪਹੁੰਚ ਗਏ ਸਨ ਅਤੇ ਹੁਣ ਉਹ ਆਪਣੇ ਘਰਾਂ ਦੇ ਨੇੜੇ ਪਹੁੰਚਣ ਵਾਲੇ ਸਨ | ਦਾਦਾ ਜੀ-ਦਾਦੀ ਜੀ ਨੂੰ ਮਿਲਣ ਦੀ ਖ਼ੁਸ਼ੀ ਵਿਚ ਉਨ੍ਹਾਂ ਦੇ ਪੈਰ ਭੁੰਜੇ ਨਹੀਂ ਸੀ ਲੱਗ ਰਹੇ |
ਅੱਜ ਉਨ੍ਹਾਂ ਦਾ ਪੜ੍ਹਾਈ ਵੱਲ ਉੱਕਾ ਈ ਧਿਆਨ ਨਹੀਂ ਸੀ ਪਰ ਇਸ ਦੇ ਬਾਵਜੂਦ ਵੀ ਉਹ ਸ਼ਾਮ ਦੀ ਪੜ੍ਹਾਈ ਦਾ ਪ੍ਰੋਗਰਾਮ ਬਣਾਉਣ ਲੱਗੇ | ਅਖ਼ੀਰ ਇਹ ਫ਼ੈਸਲਾ ਹੋਇਆ ਕਿ ਅੱਜ ਉਹ ਆਪੋ ਆਪਣੇ ਘਰ ਹੀ ਪੜ੍ਹਨਗੇ |
-10-
ਸਵੇਰੇ ਸਕੂਲ ਜਾਣ ਲੱ ਗਿਆਂ ਜਦੋਂ ਚਾਰਾਂ ਦੀ ਚੌਕੜੀ ਇਕੱਠੀ ਹੋਈ ਤਾਂ ਸਾਰੇ ਹੀ ਬੜੇ ਖ਼ੁਸ਼ ਅਤੇ ਤਰੋ-ਤਾਜ਼ਾ ਲੱਗ ਰਹੇ ਸਨ | ਚਾਰੇ ਮਿਲਦਿਆਂ ਹੀ ਇਕ-ਦੂਜੇ ਨੂੰ ਪੁੱਛਣ ਲੱਗੇ ਕਿ 'ਦਾਦਾ ਜੀ-ਦਾਦੀ ਜੀ ਨੂੰ ਮਿਲਣ ਬਾਰੇ ਆਪਣੇ ਮੰਮੀ-ਪਾਪਾ ਨਾਲ ਗੱਲ ਕੀਤੀ ਸੀ ?' ਸਾਰਿਆਂ ਨੇ 'ਹਾਂ' ਵਿਚ ਸਿਰ ਹਿਲਾਇਆ |
ਮੀਕਾ ਕਹਿਣ ਲੱਗਾ, 'ਜਦੋਂ ਮੈਂ ਘਰ ਪਹੁੰਚਿਆ ਤਾਂ ਮੰਮੀ ਕਹਿਣ ਲੱਗੇ, 'ਕੀ ਗੱਲ ਏ ? ਅੱਜ ਮੇਰੇ ਬੇਟੇ ਦੇ ਚਿਹਰੇ 'ਤੇ ਬੜੀ ਖ਼ੁਸ਼ੀ ਝਲਕ ਰਹੀ ਏ ?' ਮੈਂ ਮੰਮੀ ਨੂੰ ਜਵਾਬ ਦਿੱਤਾ, 'ਤੁਸੀਂ ਠੀਕ ਕਹਿ ਰਹੇ ਹੋ, ਮੰਮੀ ਜੀ | ਅੱਜ ਮੈਂ ਬਹੁਤ ਖ਼ੁਸ਼ ਹਾਂ |' ਇਸ ਤੋਂ ਬਾਅਦ ਮੈਂ 'ਅੱਧੀ ਛੁੱਟੀ ਸਾਰੀ' ਤੋਂ ਲੈ ਕੇ ਦਾਦਾ ਜੀ ਨੂੰ ਲੱਭਣ ਅਤੇ ਉਸ ਤੋਂ ਬਾਅਦ ਉਨ੍ਹਾਂ ਦੇ ਘਰ ਤੀਕ ਜਾਣ ਦੀ ਸਾਰੀ ਕਹਾਣੀ ਸੁਣਾ ਦਿੱਤੀ |'
'ਤੇਰੀ ਗੱਲ ਸੁਣ ਕੇ ਆਂਟੀ ਜੀ ਖ਼ੁਸ਼ ਹੋਏ ?' ਬਿੱਲੂ ਨੇ ਮੀਕੇ ਨੂੰ ਪੁੱ ਛਿਆ |
(ਬਾਕੀ ਅਗਲੇ ਸਨਿਚਵਾਰ ਦੇ ਅੰਕ 'ਚ)
-ਮੋਬਾਈਲ : 98889-24664
