ਸੈਕਰਾਮੈਂਟੋ, 26 ਦਸੰਬਰ (ਹੁਸਨ ਲੜੋਆ ਬੰਗਾ)-ਰਾਸ਼ਟਰਪਤੀ ਡੋਨਲਡ ਟਰੰਪ ਵੱਲੋਂ ਉੱਚ ਹੁਨਰ ਪ੍ਰਾਪਤ ਵਿਦੇਸ਼ੀ ਵਰਕਰਾਂ ਉਪਰ ਲਾਈ ਇਕ ਲੱਖ ਡਾਲਰ ਦੀ ਫੀਸ ਵਿਰੁੱਧ ਦਾਇਰ ਪਟੀਸ਼ਨ ਨੂੰ ਇਕ ਸੰਘੀ ਅਦਾਲਤ ਨੇ ਰੱਦ ਕਰ ਦਿੱਤੀ | ਇਸ ਦਾ ਮਤਲਬ ਅਮਰੀਕਾ ਆਉਣ ਵਾਲੇ ਹਰ ਹੁਰਨਮੰਦ ਵਰਕਰ ਨੂੰ ਇਕ ਲੱਖ ਡਾਲਰ ਫੀਸ ਭਰਨੀ ਹੀ ਪਵੇਗੀ | ਵਾਸ਼ਿੰਗਟਨ 'ਚ ਯੂ.ਐਸ. ਡਿਸਟਿ੍ਕਟ ਜੱਜ ਬੈਰਾਇਲ ਹੋਵੈਲ ਨੇ ਆਪਣੇ ਫੈਸਲੇ 'ਚ ਕਿਹਾ ਹੈ ਕਿ ਕਾਂਗਰਸ ਨੇ ਰਾਸ਼ਟਰਪਤੀ ਨੂੰ ਇਹ ਅਧਿਕਾਰ ਦਿੱਤਾ ਹੋਇਆ ਹੈ ਕਿ ਉਹ ਵਿਦੇਸ਼ੀਆਂ ਉਪਰ ਕਿਸੇ ਵੀ ਤਰਾਂ ਦੀਆਂ ਰੋਕਾਂ ਲਾ ਸਕਦਾ ਹੈ | ਆਪਣੇ 56 ਸਫਿਆਂ ਦੇ ਨਿਰਨੇ 'ਚ ਹੋਵੈਲ ਨੇ ਕਿਹਾ ਹੈ ਕਿ ਕਾਂਗਰਸ ਰਾਸ਼ਟਰਪਤੀ ਉਪਰ ਰੋਕ ਲਾ ਸਕਦੀ ਸੀ ਪਰ ਉਸ ਨੇ ਉਸ ਦੇ ਅਧਿਕਾਰਾਂ ਦੀ ਕੋਈ ਹੱਦ ਨਹੀਂ ਮਿਥੀ |
