ਸਿਰਸਾ, 3 ਜੂਨ (ਭੁਪਿੰਦਰ ਪੰਨੀਵਾਲੀਆ)- ਆਲ ਇੰਡੀਆ ਕਾਂਗਰਸ ਕਮੇਟੀ ਦੀ ਜਨਰਲ ਸਕੱਤਰ, ਸਾਬਕਾ ਕੇਂਦਰੀ ਮੰਤਰੀ ਅਤੇ ਸਿਰਸਾ ਦੀ ਸੰਸਦ ਮੈਂਬਰ ਕੁਮਾਰੀ ਸ਼ੈਲਜਾ ਨੇ ਕਿਹਾ ਕਿ ਲਗਭਗ ਹਰ ਸਾਲ ਬਰਸਾਤ ਦੇ ਮੌਸਮ ਦੌਰਾਨ ਘੱਗਰ ਨਦੀ 'ਚ ਹੜ੍ਹ ਦਾ ਖ਼ਤਰਾ ਰਹਿੰਦਾ ਹੈ, ਕਈ ਵਾਰ ਭਿਆਨਕ ਹਾਲਾਤ ਪੈਦਾ ਹੋਏ ਹਨ | ਸਾਲ 2023 'ਚ ਫਤਿਹਾਬਾਦ ਅਤੇ ਸਿਰਸਾ 'ਚ ਘੱਗਰ ਨਦੀ 'ਚ ਹੜ੍ਹ ਆਉਣ ਅਤੇ ਰੰਗੋਈ ਡਰੇਨ ਦੇ ਓਵਰਫਲੋਅ ਹੋਣ ਕਾਰਨ ਭਾਰੀ ਤਬਾਹੀ ਹੋਈ ਸੀ, ਹਜ਼ਾਰਾਂ ਹੈਕਟੇਅਰ ਫਸਲਾਂ ਤਬਾਹ ਹੋ ਗਈਆਂ ਸਨ | ਇਸ ਵਾਰ ਘੱਗਰ 'ਚ ਪਾਣੀ ਆਇਆ ਹੈ ਪਰ ਸਿੰਚਾਈ ਵਿਭਾਗ ਨਾ ਤਾਂ ਬੰਨ੍ਹ ਨੂੰ ਮਜ਼ਬੂਤ ਕਰ ਸਕਿਆ ਅਤੇ ਨਾ ਹੀ ਇਸ ਦੀ ਸਫਾਈ ਕਰਵਾ ਸਕਿਆ, ਜੇਕਰ ਭਵਿੱਖ 'ਚ ਸੰਭਾਵੀ ਹੜ੍ਹ ਕਾਰਨ ਕੋਈ ਨੁਕਸਾਨ ਹੁੰਦਾ ਹੈ, ਤਾਂ ਅਧਿਕਾਰੀ ਆਪਣੀ ਗਲਤੀ ਸਵੀਕਾਰ ਕਰਨ ਦੀ ਬਜਾਏ ਸਿਰਫ਼ ਇਕ ਗੱਲ ਕਹਿਣਗੇ ਕਿ ਬੰਨ੍ਹ ਸਿਰਫ਼ ਚੂਹਿਆਂ ਦੁਆਰਾ ਖੁੱਡਾਂ ਬਣਾਉਣ ਕਾਰਨ ਟੁੱਟੇ ਹਨ | ਮੀਡੀਆ ਨੂੰ ਜਾਰੀ ਇਕ ਬਿਆਨ 'ਚ ਕੁਮਾਰੀ ਸ਼ੈਲਜਾ ਨੇ ਕਿਹਾ ਕਿ ਘੱਗਰ ਨਦੀ ਜਾਖਲ ਦੇ ਨੇੜੇ ਪੰਜਾਬ ਦੀ ਸਰਹੱਦ ਤੋਂ ਹਰਿਆਣਾ 'ਚ ਦਾਖਲ ਹੁੰਦੀ ਹੈ | ਘੱਗਰ ਨਦੀ ਫਤਿਹਾਬਾਦ ਜ਼ਿਲ੍ਹੇ 'ਚ ਲਗਭਗ 84 ਕਿਲੋਮੀਟਰ ਤੱਕ ਵਗਦੀ ਹੈ | ਸਿਰਸਾ ਜ਼ਿਲ੍ਹੇ 'ਚੋਂ ਲੰਘਦੀ ਘੱਗਰ ਨਦੀ 90 ਕਿਲੋਮੀਟਰ ਲੰਬੀ ਹੈ | ਬਰਸਾਤ ਦੇ ਮੌਸਮ 'ਚ ਇਸ ਨਦੀ 'ਚ ਪਾਣੀ ਦਾ ਪੱਧਰ ਵੱਧ ਜਾਂਦਾ ਹੈ, ਕਈ ਵਾਰ ਹੜ੍ਹ ਦੋਵਾਂ ਜ਼ਿਲਿ੍ਹਆਂ ਵਿੱਚ ਸਥਿਤੀ ਨੂੰ ਹੋਰ ਵੀ ਵਿਗੜ ਦਿੰਦੇ ਹਨ | ਹਰ ਸਾਲ ਘੱਗਰ ਨਦੀ ਦੀ ਸਫਾਈ ਅਤੇ ਇਸਦੇ ਬੰਨ੍ਹਾਂ ਨੂੰ ਮਜ਼ਬੂਤ ਕਰਨ ਲਈ ਇਕ ਬਜਟ ਜਾਰੀ ਕੀਤਾ ਜਾਂਦਾ ਹੈ | ਵਿਭਾਗ ਦੀ ਟੀਮ ਘੱਗਰ ਨਦੀ ਖੇਤਰ 'ਚ ਬੰਨ੍ਹਾਂ ਦਾ ਨਿਰੀਖਣ ਕਰਦੀ ਹੈ, ਜਿੱਥੇ ਇਸ ਦੇ ਬੰਨ੍ਹ ਕਮਜ਼ੋਰ ਦਿਖਾਈ ਦਿੰਦੇ ਹਨ, ਉੱਥੇ ਮੁਰੰਮਤ ਕੀਤੀ ਜਾਂਦੀ ਹੈ, ਦਰਿਆ ਦੇ ਅੰਦਰ ਸਫਾਈ ਕੀਤੀ ਜਾਂਦੀ ਹੈ ਅਤੇ ਇਹ ਕੰਮ ਮਾਨਸੂਨ ਤੋਂ ਪਹਿਲਾਂ ਕੀਤਾ ਜਾਂਦਾ ਹੈ, ਪਰ ਹੁਣ ਤੱਕ ਇਹ ਨਹੀਂ ਦੇਖਿਆ ਗਿਆ ਕਿ ਕੁਝ ਕੀਤਾ ਗਿਆ ਹੈ, ਜਦੋਂ ਕਿ ਘੱਗਰ ਨਦੀ 'ਚ ਪਾਣੀ ਵਧਣ ਲੱਗ ਪਿਆ ਹੈ | ਸੰਸਦ ਮੈਂਬਰ ਕੁਮਾਰੀ ਸ਼ੈਲਜਾ ਨੇ ਕਿਹਾ ਕਿ ਜਦੋਂ ਘੱਗਰ ਨਦੀ ਵਿੱਚ ਪਾਣੀ ਦਾ ਪੱਧਰ ਵਧਦਾ ਹੈ, ਕਮਜ਼ੋਰ ਬੰਨ੍ਹ ਟੁੱਟ ਜਾਂਦੇ ਹਨ ਅਤੇ ਫਸਲਾਂ ਤਬਾਹ ਹੋ ਜਾਂਦੀਆਂ ਹਨ ਅਤੇ ਕਈ ਵਾਰ ਜਦੋਂ ਹੜ੍ਹਾਂ ਕਾਰਨ ਸਥਿਤੀ ਵਿਗੜ ਜਾਂਦੀ ਹੈ, ਤਾਂ ਵਿਭਾਗ ਬੇਵੱਸ ਹੋ ਜਾਂਦਾ ਹੈ | ਇਸ ਤੋਂ ਕਿਸਾਨਾਂ ਨੂੰ ਸਭ ਤੋਂ ਵੱਧ ਨੁਕਸਾਨ ਹੁੰਦਾ ਹੈ | ਸਰਕਾਰ ਨੂੰ ਇਸ ਵੱਲ ਗੰਭੀਰਤਾ ਨਾਲ ਧਿਆਨ ਦੇਣ ਦੀ ਲੋੜ ਹੈ |