ਜਲੰਧਰ, 25 ਸਤੰਬਰ (ਸ਼ਿਵ)-ਵਰਿਆਣਾ ਕੂੜਾ ਪ੍ਰਾਜੈਕਟ ਦੀ ਮਸ਼ੀਨਰੀ ਤੋਂ ਇਲਾਵਾ ਹੋਰ ਨਵੀਂ ਮਸ਼ੀਨਰੀ ਨੂੰ ਲੈ ਕੇ ਨਿਗਮ ਦੀਆਂ ਯੂਨੀਅਨਾਂ ਵਿਚਕਾਰ ਟਕਰਾਅ ਦੀ ਸਥਿਤੀ ਬਣ ਗਈ | ਚਾਹੇ ਅੱਜ ਸ਼ਾਮ ਨੂੰ ਮਾਮਲਾ ਸੁਲਝਾ ਲਿਆ ਗਿਆ ਪਰ ਮਸ਼ੀਨਰੀ ਲੈਣ ਬਾਰੇ ਯੂਨੀਅਨਾਂ ਤੇ ਨਿਗਮ ਪ੍ਰਸ਼ਾਸਨ ਵਿਚਕਾਰ ਕਾਫੀ ਕਸ਼ਮਕਸ਼ ਵੀ ਰਹੀ | ਦੱਸਿਆਂ ਜਾਂਦਾ ਹੈ ਕਿ ਕੂੜੇ ਦੇ ਕੰਮ ਲਈ ਨਿਗਮ ਪ੍ਰਸ਼ਾਸਨ ਵੱਲੋਂ ਨਵੀਂ ਮਸ਼ੀਨਰੀ ਦੀ ਖ਼ਰੀਦ ਕੀਤੀ ਗਈ | ਕਈ ਸਰਕਾਰੀ ਡਰਾਈਵਰਾਂ ਕੋਲੋਂ ਅਜੇ ਵੀ ਕੂੜਾ ਚੁੱਕਣ ਵਾਲੀ ਮਸ਼ੀਨਰੀ ਕਾਫੀ ਘੱਟ ਹੈ ਤੇ ਇਸ ਲਈ ਯੂਨੀਅਨਾਂ ਵੀ ਨਵੀਂ ਮਸ਼ੀਨਰੀ ਦੇਣ ਦੀ ਮੰਗ ਕਰਦੀਆਂ ਰਹੀਆਂ ਹਨ | ਕੁੱਝ ਸਮਾਂ ਪਹਿਲਾਂ ਜਦੋਂ ਵਰਿਆਣਾ ਸਥਿਤ ਕੂੜਾ ਸੰਭਾਲ ਪ੍ਰਾਜੈਕਟ ਦਾ ਕੰਮ ਕੀਤਾ ਜਾਣਾ ਸੀ ਤਾਂ ਉਸ ਵੇਲੇ ਨਿਗਮ ਪ੍ਰਸ਼ਾਸਨ ਨੇ ਆਪਣੀਆਂ ਸਰਕਾਰੀ ਗੱਡੀਆਂ ਡਰਾਈਵਰਾਂ ਤੋਂ ਲੈ ਕੇ ਕੰਪਨੀ ਨੂੰ ਦੇ ਦਿੱਤੀਆਂ ਸੀ ਤਾਂ ਡਰਾਈਵਰਾਂ ਵੱਲੋਂ ਉਸ ਵੇਲੇ ਤੋਂ ਨਵੀਂ ਮਸ਼ੀਨਰੀ ਦੇਣ ਦੀ ਮੰਗ ਕੀਤੀ ਜਾਂਦੀ ਰਹੀ ਸੀ | ਉਂਜ ਮਸ਼ੀਨਰੀ ਦੀ ਵੰਡ ਦੇ ਮਾਮਲੇ ਵਿਚ ਅੱਜ ਬਹਿਸ ਵੀ ਹੋਈ ਦੱਸੀ ਜਾ ਰਹੀ ਹੈ |
