ਜਲੰਧਰ, 23 ਨਵੰਬਰ (ਸ਼ਿਵ)-ਟਾਂਡਾ ਰੋਡ ਹਨੂਮਾਨ ਮੰਦਰ ਚੌਕ 'ਚ ਕਈ ਦਿਨਾਂ ਤੋਂ ਟੁੱਟੀ ਪਾਣੀ ਦੀ ਪਾਈਪ ਕਰਕੇ ਹੁਣ ਤੱਕ ਲੱਖਾਂ ਲੀਟਰ ਪਾਣੀ ਬਰਬਾਦ ਹੋ ਚੁੱਕਾ ਹੈ ਪਰ ਇਸ ਪਾਈਪ ਨੂੰ ਠੀਕ ਨਹੀਂ ਕਰਵਾਇਆ ਜਾ ਸਕਿਆ ਹੈ | ਕੌਂਸਲਰ ਆਪਣੇ ਵਾਰਡਾਂ ਦੀਆਂ ਸਮੱਸਿਆਵਾਂ ਨੂੰ ਹੱਲ ਕਰਵਾਉਣ ਵਿਚ ਦਿਲਚਸਪੀ ਲੈਂਦੇ ਹਨ ਪਰ ਸੜਕਾਂ ਕਿਸੇ ਵਾਰਡ 'ਚ ਨਹੀਂ ਪੈਂਦੀਆਂ ਤਾਂ ਉਨ੍ਹਾਂ ਦੀਆਂ ਸਮੱਸਿਆਵਾਂ ਨੂੰ ਅਣਗੌਲਿਆ ਕੀਤਾ ਜਾ ਰਿਹਾ ਹੈ | ਵਾਟਰ ਸਪਲਾਈ ਵਿਭਾਗ ਦੇ ਲੱਖਾਂ ਰੁਪਏ ਤਨਖ਼ਾਹਾਂ ਲੈਣ ਵਾਲੇ ਵੀ ਕਈ ਜੇ. ਈ. ਚਾਹੇ ਇਸ ਇਲਾਕੇ ਤੋਂ ਲੰਘਦੇ ਹਨ ਪਰ ਉਹ ਵੀ ਬਰਬਾਦ ਹੋ ਰਹੇ ਪਾਣੀ ਦੀ ਸਮੱਸਿਆ ਨੂੰ ਹੱਲ ਨਹੀਂ ਕਰਦੇ ਸਗੋਂ ਜਦੋਂ ਪਾਣੀ ਆਉਣ ਦਾ ਸਮਾਂ ਹੁੰਦਾ ਹੈ ਤਾਂ ਉਸ ਵੇਲੇ ਪਾਣੀ ਸੜਕ 'ਤੇ ਫੈਲ ਜਾਂਦਾ ਹੈ ਤਾਂ ਇਸ ਨਾਲ ਗੱਡੀਆਂ ਦੇ ਹਾਦਸੇ ਦਾ ਸ਼ਿਕਾਰ ਹੋਣ ਦੀ ਸ਼ੰਕਾ ਬਣੀ ਰਹਿੰਦੀ ਹੈ | ਲਗਾਤਾਰ ਪਾਣੀ ਵਹਿ ਜਾਣ ਕਰਕੇ ਸੜਕ ਵੀ ਖ਼ਰਾਬ ਹੋ ਰਹੀ ਹੈ |
