ਫਿਲੌਰ, 7 ਦਸੰਬਰ (ਵਿਪਨ ਗੈਰੀ)-ਬਾਮਸੇਫ ਦਾ ਰਾਸ਼ਟਰੀ ਸੰਮੇਲਨ ਫਿਲੌਰ ਦੇ ਦਾਣਾ ਮੰਡੀ ਵਿਖੇ ਜਾਰੀ ਹੈ | ਰਾਸ਼ਟਰੀ ਸੰਮੇਲਨ ਦੇ ਦੂਜੇ ਦਿਨ ਵੱਖ-ਵੱਖ ਵਿਸ਼ਿਆਂ 'ਤੇ ਵਿਚਾਰ-ਵਟਾਂਦਰਾ ਕੀਤਾ | ਸੈਸ਼ਨ ਦੀ ਪ੍ਰਧਾਨਗੀ ਐਨ. ਗੰਗਾਧਰ ਨੇ ਕੀਤੀ | ਦੂਜੇ ਸੈਸ਼ਨ 'ਚ, 'ਆਪਣਾ ਖ਼ੁਦ ਦਾ ਲੋਕਤੰਤਰੀ ਵਿਕਲਪ ਬਣਾਓ, 'ਪੰਜਾਬ ਤੋਂ ਬਾਬਾ ਸਾਹਿਬ ਡਾ. ਅੰਬੇਡਕਰ ਦਾ ਮਾਰਗ ਦਰਸ਼ਨ, ਤੇ 'ਬਾਬਾ ਸਾਹਿਬ ਡਾ. ਅੰਬੇਡਕਰ ਦੀ 27 ਅਕਤੂਬਰ, 1951 ਤੋਂ 29 ਅਕਤੂਬਰ, 1951 ਤੱਕ ਜਲੰਧਰ, ਲੁਧਿਆਣਾ ਤੇ ਪਟਿਆਲਾ ਦੀ ਯਾਤਰਾ ਅਤੇ ਇਸ ਯਾਤਰਾ ਦੌਰਾਨ ਉਨ੍ਹਾਂ ਦੁਆਰਾ ਦਿੱਤੇ ਗਏ ਚਾਰ ਮਹੱਤਵਪੂਰਨ ਭਾਸ਼ਨ ਵਿਸ਼ਿਆਂ 'ਤੇ ਚਰਚਾ ਕੀਤੀ ਗਈ | ਇਨ੍ਹਾਂ ਭਾਸ਼ਨਾਂ ਰਾਹੀਂ, ਬਾਬਾ ਸਾਹਿਬ ਡਾ. ਅੰਬੇਡਕਰ ਨੇ ਬਹੁਜਨ ਸਮਾਜ ਦੇ ਲੋਕਾਂ ਦਾ ਮਾਰਗ ਦਰਸ਼ਨ ਕੀਤਾ | ਕਿ੍ਸ਼ਨ ਕੁਮਾਰ ਜਾਨੂ ਸੂਬਾ ਜਨਰਲ ਸਕੱਤਰ ਜਾਟ ਮਹਾਂਸਭਾ ਰਾਜਸਥਾਨ, ਐਡਵੋਕੇਟ ਅਸ਼ੋਕ ਬਸੋਤਰਾ, ਹਾਈ ਕੋਰਟ ਜੰਮੂ ਤੇ ਕਸ਼ਮੀਰ, ਪ੍ਰੋਫੈਸਰ ਰਮਾਕਾਂਤ ਠਾਕੁਰ, ਹਿੰਦੂ ਕਾਲਜ ਮੁਰਾਦਾਬਾਦ, ਨਿਤਿਨ ਥਬਾਲਕੇ ਕੇਂਦਰੀ ਕਾਰਜਕਾਰੀ ਮੈਂਬਰ ਬਾਮਸੇਫ, ਡਾ. ਜਯੋਤੀ ਕਲਿਆਣੀ ਸਮਾਜਿਕ ਚਿੰਤਕ ਅੰਮਿ੍ਤਸਰ ਤੇ ਡਾ. ਅੰਮਿ੍ਤ ਕੌਰ ਸਮਾਜਿਕ ਵਰਕਰ ਜਲੰਧਰ ਨੇ ਇਨ੍ਹਾਂ ਵਿਸ਼ਿਆਂ 'ਤੇ ਸੰਬੋਧਨ ਕੀਤਾ | ਮੰਚ ਦਾ ਸੰਚਾਲਨ ਡਾ. ਕਰਮਵੀਰ ਟੰਡਨ, ਕੇਂਦਰੀ ਕਾਰਜਕਾਰੀ ਮੈਂਬਰ ਬਾਮਸੇਫ ਨੇ ਕੀਤਾ | ਇਸ ਸੈਸ਼ਨ ਦੀ ਪ੍ਰਧਾਨਗੀ ਕਰਦੇ ਹੋਏ ਬਾਮਸੇਫ ਦੇ ਰਾਸ਼ਟਰੀ ਜਨਰਲ ਸਕਤਰ ਰਮਾ ਸ਼ੰਕਰ ਰਾਮ ਨੇ ਕਿਹਾ ਕਿ ਪੰਜਾਬ ਸਮਾਜਿਕ ਕ੍ਰਾਂਤੀ ਦੀ ਧਰਤੀ ਰਿਹਾ ਹੈ ਤੇ ਸਮਾਜਿਕ ਤਬਦੀਲੀ ਦੀ ਲਹਿਰ ਸਾਡੇ ਪੁਰਖਿਆਂ ਦੁਆਰਾ ਇਥੇ ਸ਼ੁਰੂ ਕੀਤੀ ਗਈ ਸੀ | ਬਾਮਸੇਫ ਨੇ ਭਾਰਤੀ ਸੰਵਿਧਾਨ ਦੇ ਸਤਿਕਾਰ, ਸੁਰੱਖਿਆ ਤੇ ਪ੍ਰਚਾਰ ਲਈ ਇਕ ਦੇਸ਼ ਵਿਆਪੀ ਜਨ ਜਾਗਰੂਕਤਾ ਮੁਹਿੰਮ ਸ਼ੁਰੂ ਕੀਤੀ ਹੈ | ਇਸ ਮੁਹਿੰਮ ਰਾਹੀਂ, ਉਹ ਦੇਸ਼ ਭਰ 'ਚ ਸੰਵਿਧਾਨਕ ਜਾਗਰੂਕਤਾ ਪੈਦਾ ਕਰਨ ਲਈ ਕੰਮ ਕਰ ਰਹੇ ਹਨ | ਹਰ ਘਰ ਗਲੀ ਤੇ ਸ਼ਹਿਰ ਵਿਚ ਇਕ ਜਨਤਕ ਜਾਗਰੂਕਤਾ ਤੇ ਪਹੁੰਚ ਮੁਹਿੰਮ ਚੱਲ ਰਹੀ ਹੈ | ਇਸ ਪ੍ਰਕਿਰਿਆ ਦਾ ਉਦੇਸ਼ ਜਨਤਕ ਰਾਏ ਨੂੰ ਇਕਜੁੱਟ ਕਰਨਾ ਹੈ | ਸੰਵਿਧਾਨ ਦੀ ਭਾਵਨਾ ਨੂੰ ਧਿਆਨ ਵਿਚ ਰੱਖਦੇ ਹੋਏ, ਅੱਜ ਇਸ ਏਜੰਡੇ 'ਤੇ ਡੂੰਘਾਈ ਨਾਲ ਚਰਚਾ ਕੀਤੀ ਗਈ |
