ਮਾਨਸਾ, 4 ਸਤੰਬਰ (ਬਲਵਿੰਦਰ ਸਿੰਘ ਧਾਲੀਵਾਲ)- ਡਾਇਰੈਕਟ ਲੈਕਚਰਾਰ ਫ਼ਰੰਟ (ਅਨੁਸੂਚਿਤ ਜਾਤੀ) ਨੇ ਸਿੱਖਿਆ ਮੰਤਰੀ ਤੋਂ ਮੰਗ ਕੀਤੀ ਕਿ ਸੀਨੀਆਰਤਾ ਸੂਚੀ ਨੂੰ ਵੱਡੀਆਂ ਗ਼ਲਤੀਆਂ ਦੇ ਮੱਦੇਨਜ਼ਰ ਤੁਰੰਤ ਰੱਦ ਕੀਤਾ ਜਾਵੇ ਤੇ 2015 ਦੀ ਸੀਨੀਆਰਤਾ ਸੂਚੀ ਮੁਤਾਬਕ ਨਵੇਂ ਪ੍ਰਮੋਟ/ਭਰਤੀ ਹੋਏ ਲੈਕਚਰਾਰਾਂ ਨੂੰ ਇਸ ਸੂਚੀ 'ਚ ਯੋਗ ਸੀਨੀਅਰਤਾ ਨੰਬਰ ਦੇ ਕੇ ਵੇਰਵੇ ਦਰਜ ਕੀਤੇ ਜਾਣ | ਫ਼ਰੰਟ ਦੇ ਆਗੂ ਲੈਕਚਰਾਰ ਗੁਰਦੇਵ ਸਿੰਘ, ਸ਼ਵਿੰਦਰ ਕੌਰ, ਅਵਤਾਰ ਸਿੰਘ, ਬਿਕਰਮ ਸਿੰਘ, ਬਲਵੀਰ ਸਿੰਘ ਆਦਿ ਨੇ ਦੱਸਿਆ ਕਿ ਫਰਵਰੀ 2023 ਉੱਚ ਅਦਾਲਤ ਨੇ ਮਾਸਟਰ ਕਾਡਰ ਦੀ ਸੀਨੀਆਰਤਾ ਸੂਚੀ ਰੱਦ ਕਰਕੇ 6 ਮਹੀਨੇ 'ਚ ਮੁੜ ਬਣਾਉਣ ਦੇ ਆਦੇਸ਼ ਜਾਰੀ ਕੀਤੇ ਸਨ | ਉਨ੍ਹਾਂ ਦੱਸਿਆ ਕਿ ਵਿਭਾਗ ਵਲੋਂ ਨਵੰਬਰ 2024 'ਚ ਲੈਕਚਰਾਰਾਂ ਦੀ ਸੀਨੀਆਰਤਾ ਸੂਚੀ ਦਾ ਡਰਾਫ਼ਟ ਇਤਰਾਜ਼ ਲੈਣ ਲਈ ਜਨਤਕ ਕਰਨ ਉਪਰੰਤ ਲੰਘੀ 21 ਅਗਸਤ ਨੂੰ ਇਤਰਾਜ਼ ਮੰਗੇ ਗਏ ਸਨ | ਉਨ੍ਹਾਂ ਕਿਹਾ ਕਿ ਜਾਰੀ ਸੂਚੀ 'ਚ ਬਹੁਤ ਤਰੁੱਟੀਆਂ ਹਨ ਕਿਉਂਕਿ ਕਈਆਂ ਦੇ ਨਾਂਅ 2-2 ਵਾਰ ਦਰਜ ਹਨ ਤੇ ਬਹੁਤ ਸਾਰਿਆਂ ਨੂੰ ਸੀਨੀਆਰਤਾ ਨੰਬਰ ਵੀ 2-2 ਵਾਰ ਦਿੱਤਾ ਗਿਆ ਹੈ | ਉਨ੍ਹਾਂ ਦੱਸਿਆ ਕਿ ਕਾਫ਼ੀ ਲੈਕਚਰਾਰਾਂ ਨੂੰ ਸਿੱਧੀ ਭਰਤੀ ਅਧੀਨ ਸੀਨੀਅਰਤਾ ਨੰਬਰ ਅਲਾਟ ਕੀਤਾ ਗਿਆ ਹੈ ਤੇ ਉਸੇ ਨੂੰ ਤਰੱਕੀਆਂ ਅਧੀਨ ਵੀ ਸੀਨੀਆਰਤਾ ਨੰਬਰ ਅਲਾਟ ਕਰ ਦਿੱਤਾ ਗਿਆ ਹੈ | ਇਸੇ ਤਰ੍ਹਾਂ 2001 'ਚ ਪਦਉਨਤ ਹੋਏ ਲੈਕਚਰਾਰਾਂ ਨੂੰ ਸਿੱਧੀ ਭਰਤੀ ਲੈਕਚਰਾਰਾਂ ਤੋਂ ਸੀਨੀਆਰਤਾ 'ਚ ਅੱਗੇ ਰੱਖਿਆ ਗਿਆ ਹੈ ਅਤੇ ਪਦਉਨਤ ਲੈਕਚਰਾਰਾਂ ਦੀ ਸੀਨੀਆਰਤਾ ਮਾਸਟਰ ਕਾਡਰ ਵਿਚ ਹਾਜ਼ਰੀ ਤੋਂ ਨਿਰਧਾਰਿਤ ਕੀਤੀ ਗਈ ਹੈ, ਜੋ ਨਿਯਮਾਂ ਦੇ ਉਲਟ ਹੈ | ਉਨ੍ਹਾਂ ਕਿਹਾ ਕਿ ਇਸ ਲਈ ਇਹ ਸੂਚੀ ਰੱਦ ਕਰਨੀ ਬਣਦੀ ਹੈ |
